გუშინ საფეხბურთო სკოლა "საბურთალოს" სტადიონ "ბენდელაზე" ზაზა ბენდელიანის ხსოვნისადმი მიძღვნილი ტრადიციული ტურნირის კენჭისყრა გაიმართა. მოზარდთა შეჯიბრი საფეხბურთო აკადემია "საბურთალოს" სტადიონზე გაიმართება (სამედიცინო უნივერსიტეტთან), მთავარი პრიზისთვის 16 გუნდი იბრძოლებს. დიდების ტრადიციულ ტურნირს კი იოსებიძის ქუჩაზე მდებარე სკოლის მოედანი უმასპინძლებს და მონაწილეობას 4 გუნდი მიიღებს - მატჩები 23-დან 28 დეკემბრამდე ჩატარდება. ცოტა ხნის წინ კი "საბურთალომ" ჭაბუკთა (1996 წელს დაბადებულთა) საერთაშორისო ტურნირს უმასპინძლა - "ფოლკსვაგენის თასის" გათამაშების ინიციატორები იყვნენ "ლევან ჟორდანიას ფონდი" (პრეზიდენტი მერაბ ჟორდანია), "საბურთალო" და "სახალისო ფეხბურთის" ქართული ფილიალი.
მესამე
მასპინძლები მე-3 წუთზე მცველმა გიგი მარგველაშვილმა დააწინაურა. ამის შემდეგ ჰოლანდიელებმა მწვავედ შეუტიეს, მათ რიგებში განსაკუთრებით წარმოშობით სიერალეონელი ნახევარმცველი ისა კალონი აქტიურობდა, რომელმაც ყველას ტიჯანი ბაბანგიდა გაახსენა და გულშემატკივარი მოხიბლა. საინტერესო ფეხბურთელები იყვნენ მასპინძელთა რიგებშიც.
"ვიტესს" ანგარიშის გათანაბრების რეალური შანსიც ჰქონდა, მაგრამ "საბურთალომ" სწრაფი და ეფექტური კონტრშეტევა განავითარა, რომელიც თენგო მაკასარაშვილმა ზუსტი დარტყმით დააგვირგვინა, გიორგი მიქაძის გაწვრთნილმა "საბურთალომ" 2:0 გაიმარჯვა და "ფოლკსვაგენის თასს" დაეუფლა.
გამარჯვებულები და საუკეთესო მოთამაშეები ქართული ფეხბურთის ვეტერანებმა დააჯილდოვეს: საუკეთესო ფეხბურთელად "ვიტესის" ცენტრალური ნახევარმცველი ტრისტან ბერჰაუსი დაასახელეს, რომელმაც სტადიონზე შეკრებილ მრავალრიცხოვან გულშემატკივარს თავი ლამაზი ჟესტით დაამახსოვრა: გუნდის სახელით "საბურთალოს" წარმატება საჯაროდ მიულოცა.
"ვიტესის" კაპიტანი ლევან ჟორდანია წაგებით გულდაწყვეტილი იყო:
"თბილისში სრული შემადგენლობით ვერ ჩამოვედით, რადგან ძირითადის 5 ფეხბურთელი დამტვრეული გვყავდა. წაგებას ამას მივაწერ. შეთამაშებული გუნდით რომ ჩამოვსულიყავით, ვფიქრობ, დღეს ჩვენ გავიმარჯვებდით. თუმცა "საბურთალო" მომეწონა, შეწყობილი, კარგი გუნდია.
გუნდებს შორის რა განსხვავება დავინახე? ჩვენ ფიზიკურად უკეთ მომზადებულები ვართ, რადგან ჰოლანდიაში მომზადების განსხვავებული სისტემაა".
კახა ჭუმბურიძე, "საბურთალოს" გენერალური დირექტორი:
"არნემულ კლუბთან მეგობრობა გვაკავშირებს და მართალია, ჯერ ოფიციალური ხელშეკრულება არ გაფორმებულა, მაგრამ ფაქტობრივად პარტნიორები ვართ. ჩვენი სკოლის ორი აღზრდილი "ვიტესში" თამაშობს, გუნდი ტურნირზე გამოაგზავნეს, მომავალში კი, შესაძლოა, ჰოლანდიას ჩვენ ვესტუმროთ, სტაჟირებაზე გავაგზავნოთ მწვრთნელები, ფიზმომზადების სპეციალისტები, ფეხბურთელები და მენეჯმენტში გამოცდილება შევიძინოთ. ასეთი კავშირები ქართულ ფეხბურთს ძალიან წაადგება".
ტარიელ ხეჩიკაშვილი, "საბურთალოს" პრეზიდენტი, "იბერია ბიზნეს ჯგუფის" დამფუძნებელი:
"სამომავლოდ 16-წლამდელთა ტურნირის ჩატარება გვსურს, სადაც "საბურთალოსა" და "ვიტესის" გარდა, საქართველოს 16-წლამდელთა ნაკრების მოწვევა გვსურს. ვფიქრობთ, რომ ეს შეიძლება გახდეს 16-წლამდელთა ნაკრებისთვის მიმზიდველი ტურნირი, სადაც ნაკრების მწვრთნელს სელექციისა და გუნდის შეთამაშების საშუალება მიეცემა.
ამით ფეხბურთის ფედერაციასაც შევუწყობთ ხელს - შესარჩევ ციკლამდე 16-წლამდელები ტურნირებით განებივრებულები არ არიან და მწვრთნელს შეუძლია გუნდის ნაკლი ნახოს და ოფიციალურ მატჩებამდე მისი გამოსწორება სცადოს.
ჩვენი პარტნიორი "ვიტესია", მაგრამ ევროპაში ფანჯრის ფართოდ გაღებაც არ გვაწყენდა. ამჟამად ვცდილობთ წინასწარ შევითანხმოთ რამდენიმე სერიოზული კლუბი. მოლაპარაკება ბუნდესლიგისა და უკრაინის კლუბებთან გვაქვს, მათ შორის, კიევის "დინამოსთან".
ყოველდღიური სპორტული გაზეთი "ლელო"
