მოგეხსენებათ, 2008 წელს ქუთაისში მერიის ბიუჯეტით დაფინანსებული "ტორპედო-2008" შეიქმნა და დაარსებიდან მეორე წელს, მის სამართალმემკვიდრედ უმაღლეს ლიგას ტიტულოვანი "ტორპედო" დაუბრუნდა. დღესდღეობით, გუნდში სამი ფეხბურთელი ირიცხება, რომლებიც ქუთაისურ კლუბს პირველი ლიგიდან "მოჰყვებიან". შესაბამისად, თითოეული მათგანი ზედიზედ 2 წელზე მეტია ქალაქის ღირსებას იცავს. ერთ-ერთი სწორედ ჩვენი დღევანდელი რესპონდენტი გიორგი გურულია.
23 წლის მცველისთვის ადგილი განახლებულ "ტორპედოშიც" მოინახა. 23-ე ეროვნულ ჩემპიონატში, მას შემდეგ, რაც ქუთაისური გუნდის თავკაცი გია გეგუჩაძე გახდა, ფეხურთელმა ოფიციალური თამაშების აბსოლუტური უმრავლესობა ძირითად შემადგენლობაში დაიწყო. გიორგი გურულმა "ტორპედოს" ოფიციალური საიტისთვის
- გიორგი, დასრულდა ჩემპიონატის პირველი ნახევარი. მთლიანობაში როგორ შეაფასებ განვლილ პერიოდს?
- ვფიქრობ, ბევრი ფაქტორის გათვალისწინებით, დადებითად უნდა შეფასდეს ჩვენი გამოსვლა. რაც მთავარია, გუნდმა თამაშის ხარისხი გამოაკეთა და ხშირ შემთხვევაში ლამაზ ფეხბურთს უჩვენებდა. ბიჭები მაქსიმუმს ვაკეთებდით იმისთვის, რომ მაყურებლის წინაშე არ შევრცხვენილიყავით.
- უღიმღამო სტარტის შემდეგ, გუნდი ჩემპიონატის ბოლო 13 მატჩში მხოლოდ ერთხელ დამარცხდა, ორჯერ ფრედ ითამაშა და დანარჩენ 10-ში გაიმარჯვა. აღსანიშნავია, რომ ასეთ შედეგებს "ტორპედომ" გია გეგუჩაძის მოსვლის შემდეგ მიაღწია. რა როლი ითამაშა ახალმა მწვრთნელმა?
- მწვრთნელს ყველა გუნდში დიდი როლი აქვს. რაც შეეხება გია გეგუჩაძეს, მისი მოსვლის შემდეგ ცხადია, მდგომარეობა ჩვენს სასიკეთოდ შეიცვალა. ფეხბურთელების მონდომებისა და გამოვლენილი თავდადების მიუხედავად, ასეთ სერიებში მთავარი როლი თუ არა, დიდი წვლილი მას მიუძღვის.
- ალბათ, ის მიზანი, რომელიც გია გეგუჩაძის მოსვლისას დაისახა და საუკეთესო 8 გუნდს შორის მოხვედრაში მდგომარეობდა, შეიცვალა.
- თუკი სატურნირო ცხრილს გადავხედავთ, ჩანს, რომ ჩემპიონობამდე შორს არ ვართ. პირველადგილოსანი იმდენი ქულით გვისწრებს, რისი აღმოფხვრაც სავსებით შესაძლებელია. "ტორპედოზეა" დამოკიდებული ახალი წლიდან, როგორ წარმართავს თამაშებს.
- საერთო ჯამში განვლილ ეტაპზე წარმატებით გამოსვლის მიუხედავად, მცირეოდენი გამართლებით, შეიძლებოდა, მეორე "ფრონტზეც" გაგეგრძელებინათ ბრძოლა.
- ფეხბურთში ყველაფერი ხდება. სამწუხაროა, რომ ისტორიაში ის დღე ჩვენთვის უიღბლოდ ჩაიწერა. არ ვიცი რას დავაბრალო, შოკირებულნი ვიყავით ფეხბურთელები და ალბათ, ჩვენს გარდა, სხვაც ვერავინ იჯერებდა, რომ "ტორპედო" თასიდან გავარდა. დასანანია, თუმცა ახლა მთელი ყურადღება ჩემპიონატზე გვექნება და აქ შევეცდებით მაქსიმუმის მიღწევას.
- გუნდისთვის საჭირო კონკურენციის საკითხს შევეხოთ.
- კონკურენციის გარეშე საშუალო დონეზე ვერცერთი გუნდი ვერ ჩამოყალიბდება. კარგია, კონკურენცია რომ არის. თითოეულ პოზიციაზე რამდენიმე ფეხბურთელია. ვინც თავისი თამაშით დაამტკიცებს, რომ ღირსეულია, ის დაიმსახურებს გუნდში დამკვიდრებას. საერთოდ, გუნდში ფეხბურთელები მეგობრულად არიან ერთმანეთის მიმართ, რაც დადებითად აისახება შედეგებზეც.
- ზოგიერთ გულშემატკივარს სჯერა, რომ თუკი "ტორპედო" ძირითადად ქუთაისელი ფეხბურთელებით იქნება დაკომპლექტებული, უკეთეს შედეგებსაც მიაღწევს.
- ამ საკითხზე ბევრი განხსვავებული აზრი არსებობს. რა თქმა უნდა, თუ გუნდი თამაშობს და ფეხბურთელებში საკუთარი საქმისადმი გულგრილი დამოკიდებულება არ ჩანს, ამაზე ლაპარაკი ცოტა არ იყოს უსაფუძვლოა. ჩემი აზრით, ეს საქართველოა და სადაური ფეხბურთელი ითამაშებს, ზუგდიდელი, თბილისელი თუ სხვა, მნიშვნელობა არ აქვს.
რაც შეეხება საერთოდ ფეხბურთისადმი მათ დამოკიდებულებას, ქუთაისელი გულშემატკივრები სამაგალითოები და სამართლიანად მომთხოვნები არიან, მათ შეძახილებს თამაშის ხასიათზე მოჰყავხარ.
- მიმდინარე შესვენებაზე ინდივიდუალურად თუ ვარჯიშობ?
- აუცილებელია, რომ უქმად არ გავჩერდეთ. მე პირადად ყოველდღე სპორტკომპლექს "ლაგუნაზე" დავდივარ და ვცდილობ ფორმა არ დავკარგო.
- ამჟამინდელი, საკუთარი ფიზიკური ფორმა გაკმაყოფილებს?
- მგონი, როცა ფეხბურთელს თავისი სათამაშო ფორმა დააკმაყოფილებს, მისი კარიერა იქ სრულდება. ფეხბურთელმა ყოველთვის მეტი და მეტი უნდა მოსთხოვოს საკუთარ თავს და მიღწეულით არ დაკმაყოფილდეს.
- და ბოლოს, "ტორპედოს" მომავალი როგორ წარმოგიდგენია?
- "ტორპედო" ისეთი გუნდია, რომ მომავალი ყოველთვის ნათელი უნდა ჰქონდეს და მგონია, სულ ჩემპიონობისთვის მებრძოლი გუნდი იქნება კიდეც.
აქვე ვისარგებლებ შემთხვევით და დამდეგ შობა-ახალ წელს მივულოცავ ქუთაისელების თამადობით მთელს საქართველოს და ყოველივე კარგს ვუსურვებ.
ყოველდღიური სპორტული გაზეთი "ლელო"
