გიორგი ილურიძემ მახაჩყალის "ანჟი" დატოვა და საქართველოში დაბრუნდა. 19 წლის თავდამსხმელი რუსულ კლუბში 2010 წლიდან ირიცხება, იყო საქართველოს 17, 19-წლამდელ და ახალგაზრდულ ნაკრებთა კანდიდატი. გიორგიმ რუსეთის პრემიერლიგაში 5 შეხვედრა ჩაატარა, მაგრამ "ანჟიში" სულეიმან კერიმოვის მისვლის შემდეგ მხოლოდ დუბლებში გამოდიოდა. შესაძლოა, ილურიძემ თამაში გორის "დილაში" გააგრძელოს. შევიტყვეთ, რომ გუნდს უკვე შეუერთდა, მაგრამ ჯერ კონტრაქტი არ გაუფორმებია.
გორში დაიწყებს სეზონისთვის მზადებას საქართველოს ეროვნულ ნაკრებში ნათამაშები, მაგრამ ტრავმებისგან გაწვალებული რევაზ ბარაბაძეც. 23 წლის ფეხბურთელს ტრავმების გამო 2008 წლის შემდეგ თითქმის არ უთამაშია. შარშან
და რაც მთავარია, "დილაში" ითამაშებს ნიჟნი ნოვგოროდის "ვოლგას" შემტევი ნახევარმცველი გოჩა ხოჯავა. ეს ყველაფერი "დილას" მთავარმა მწვრთნელმა თემურ მახარაძემ დაგვიდასტურა.
"ბარაბაძე, ილურიძე და ხოჯავა მართლაც ჩვენთან ვარჯიშობენ. ამ უკანასკნელს მართალია, კონტრაქტი არ გაუფორმებია, მაგრამ დღეს ჩვენთან იძუნძულა და საგაზაფხულო ეტაპზე "დილაში" ითამაშებს", - ამბობს მახარაძე.
შესაძლოა ისიც, რომ გუნდში მალე კახა ალადაშვილიც გამოჩნდეს, თუ "ზესტაფონი" მის გაშვებას დათანხმდება. კახას კონტრაქტი ექვს თვეში უმთავრდება და წასვლა სურს. გავრცელდა ხმები, რომ 27 წლის მცველს თბილისის "დინამოში" გასინჯავდნენ, მაგრამ, როგორც ჩანს, ეს ლაპარაკი ლაპარაკადვე დარჩა.
თავად ალადაშვილი ამ თემაზე კომენტარს თავს არიდებს, მაგრამ ფაქტია, რომ "ზესტაფონში" აღარ ვარჯიშობს. მახარაძემ ალადაშვილისადმი ინტერესიც დაადასტურა, მაგრამ იმერულ კლუბთან საკითხი ჯერ შესათანხმებელიაო.
რაც შეეხება ლაშა სალუქვაძეს, მას "ვოლგასთან" სასამართლო დავა აქვს და საკითხის გადაწყვეტამდე კონტრაქტს ვერ გააფორმებს. თანაც მას რუსეთში სხვა კლუბშიც იწვევენ. ამას გარდა, ლაპარაკია კიდევ ერთი ვოლგელის, ზურაბ არზიანის დამატებაზეც.
გორის "დილა" "ამერის" სტადიონზე დღეს მორიგ საკონტროლო შეხვედრას "გაგრასთან" გამართავს.
ყოველდღიური სპორტული გაზეთი "ლელო"
