ქუთაისიდან ტრაბზონამდე, უამინდობის გამო დამღლელი 10-საათიანი მგზავრობის შემდეგ, "ტორპედომ" დანიშნულების ადგილას თვითმფრინავით გაემგზავრა. ამის მიუხედავად, "ტორპედო" სასტუმროში დროულად განთავსდა და როგორც თურქეთში მყოფმა კლუბის პრესსამსახურის უფროსმა რამაზ ჩხიკვაძემ შეგვატყობინა, 21 იანვრის საღამოს 7-ის ნახევარზე პირველ ვარჯიშს შეუდგა.ფეხბურთელთაგან ყველანი ჯანზე არიან და მწვრთნელთა დავალებებს პირნათლად ასრულებენ. დღეს დილით, ადგილობრივი დროით 11-ის ნახევარზე (თურქეთთან სხვაობა 2 საათს შეადგენს), 25-ვე ფეხბურთელი ფიზმომზადების მწვრთნელის ივო კატუშიჩის განკარგულებაში იყო.
ტორპედოელებმა სპორტკომპლექს "მარდანის" ფიტნესის დარბაზში ივარჯიშეს. დღეს 16 საათზე კი გუნდი მეორედ, უკვე მინდორზე ივარჯიშებს.
ამრიგად, 25 იანვარს გია გეგუჩაძის გაწვრთნილებს, თურქული დროით 15 საათსა და 30 წუთიდან რუმინეთის ჩემპიონატში მე-12 ადგილზე მყოფი "ბრაშოვი" დაუპირისპირდება.
ცნობილია, რომ სპორტკომპლექს "მარდანში", "ტორპედოს" გარდა კიევის "არსენალი", მოსკოვის ცსკა-ს ახალგაზრდული გუნდი, ბაქოს "ნეფტჩი" და ზაქათალის "სიმურგია" დაბინავებული. გია გეგუჩაძეს "სიმურგის" ხელმძღვანელმა სერგეი იურანმა, ამხანაგური მატჩის გამართვა შეთავაზა.
ამჯერად განიხილება ზაქათალელებთან თამაშის 2 ვარიანტი - 25 იანვრის დილით, ან 26 იანვარს. ორივე შემთხვევაში, ტორპედოელთა ღირსებას ისინი დაიცავენ, ვისაც გეგუჩაძე "ბრაშოვთან" არ ათამაშებს.
ასევე მიდის მოლაპარაკებები "ტორპედოს" საკონტროლო შეხვედრების განრიგში თავისუფალი 3 თებერვლის შესავსებად. ქართულ გუნდთან თამაშის სურვილი გამოუთქვამს ვლადივოსტოკის "ლუჩ-ენერგიას". ეს გუნდი რუსეთის პირველ დივიზიონში ასპარეზობს, ამიტომ მეტოქის წარმომადგენლებმა უარი მიიღეს - გეგუჩაძის სურვილია, რომ შეკრება "ტორპედომ" უფრო ძლიერ გუნდთან თამაშით დაასრულოს.
შეგახსენებთ იმასაც, რომ 25-ის გარდა, თურქეთში გუნდი 28 იანვარს პოლონეთის "კორონას", ხოლო 1 თებერვალს სლოვაკეთის "ბანიკს" ეთამაშება.
fctorpedo.ge
