8 ოქტომბერს კოალიცია "ქართული ოცნების" ლიდერმა ბიძინა ივანიშვილმა მთავრობის მომავალი შემადგენლობა დაასახელა. "ქართული ოცნების" მიერ წარდგენილ კაბინეტს საფეხბურთო "ელფერი" დაჰკრავს: ახალ მთავრობაში მინისტრების პოსტები საფეხბურთო სამყაროს ორ წარმომადგენელს შესთავაზეს: საქართველოს ნაკრებისა და "მილანის" ყოფილი ფეხბურთელი კახა კალაძე რეგიონული განვითარებისა და ინფრასტრუქტურის მინისტრი იქნება და ამავე დროს, სავარაუდოდ, მეორე ვიცე-პრემიერის პოსტზეც ვიხილავთ.
სპორტისა და ახალგაზრდობის საქმეთა სამინისტროს თავკაცად ივანიშვილმა მოძრაობა "ჩვენი ფეხბურთის" ერთ-ერთი დამფუძნებელი ლევან ყიფიანი წარადგინა.
შესაძლოა, ბევრისთვის უცნობი ფაქტია, რომ რეინტეგრაციის საკითხებში სახელმწიფო მინისტრის პოსტზე წარდგენილი პაატა ზაქარეიშვილი ორგანიზაცია
შეხვედრის დასრულების შემდეგ "ლელომ" კახა კალაძეს ინტერვიუ ჩამოართვა.
- უპირველესად, საპასუხისმგებლო პოსტზე წარდგენას გილოცავთ. საფეხბურთო მოედნიდან მინისტრთა კაბინეტში გადართვა ძალიან რთული იქნება.
- სიმართლე გითხრათ, თანამდებობაზე წარდგენა ჩემთვისაც მოულოდნელი აღმოჩნდა, მაგრამ მიმაჩნია, რომ გადართვა პრობლემას არ წარმოადგენს, რადგან ცხოვრებაში ბევრი სირთულე შემხვედრია და მიმაჩნია, რომ მისი გადალახვა აუცილებელი არის.
დარწმუნებული ვარ, ამ სირთულესაც წარმატებით გადავლახავ და ისე ვიმსახურებ ამ თანამდებობაზე, როგორც ქვეყანასა და ქართველ ხალხს სჭირდება.
- ფეხბურთს ვერ ავცდებით: დღეს რეგიონებში ფეხბურთისადმი დამოკიდებულება პრეზიდენტის რწმუნებულების შეხედულებაზეა დამოკიდებული, მაგრამ ერთიანი მიდგომა არ არსებობს. ამ საკითხის მოგვარება როგორ წარმოგიდგენიათ?
- საქართველოში სპორტშიც ყველაფერი მოშლილია და ყველა სხვა დარგშიც. მე კი მიმაჩნია, როგორი მნიშვნელოვანიც არის ქვეყნისთვის განათლება და ჯანდაცვა, ასეთივე დონეზე უნდა განიხილებოდეს სპორტიც.
მისი ადგილი საქართველოს პრიორიტეტებს შორის წარმომიდგენია. სპორტსა და მის განვითარებას სახელმწიფოს მხრიდან ხელშეწყობა ექნება.
- გითამაშია უკრაინაში, იტალიაში და საინტერესოა, როგორ წარმოგიდგენია სპორტისა და ფეხბურთის განვითარება და თანამედროვე მართვის სისტემების რეალური დანერგვა?
- პირველი, რაც აუცილებელია, მასობრივად უნდა დაიწყოს სპორტული ინფრასტრუქტურის შექმნა, რომელიც დღეს განადგურებულია.
ვითომ რაღაცები შენდებოდა, მაგრამ რაც დაინგრა, იმის ნახევარიც არ აშენებულა. ინფრასტრუქტურის გარეშე კი სპორტის წინსვლა და ჩვენთვის სასურველი შედეგების მიღწევა წარმოუდგენელია.
ჯერ საფუძველი უნდა გავამაგროთ და მერე ავაშენოთ მასზე ახალი ქართული სპორტი, რომელიც გამოცდილებას დაეყრდნობა.
- ბოლო წლებში ფეხბურთის ფედერაციამ და სახელმწიფომ რამდენიმე მოედანი და სტადიონი ააშენეს და განაახლეს.
- ეს კარგია, მაგრამ ჩვენ რა გვაქვს სალაპარაკო, როდესაც მთელი საქართველოს მასშტაბით რამდენიმე ნორმალური მოედანი და ბაზა გვაქვს: "დინამო-არენა", "მიხეილ მესხი", "დინამოს", ეროვნული ნაკრებისა და "ზესტაფონის" ბაზები და კიდევ ორიოდე ქალაქის სტადიონი - სხვაგან სად შეიძლება მაღალი დონის თამაშების ჩატარება?
უფრო მეტი ხარისხიანი მოედანი იტალიასა და უკრაინაში საფეხბურთო სკოლებს აქვთ და თავი რითი მოგვაქვს, ესეც რომ არ იყო და ახლა გავაკეთეთ? ეს საკმარისი არ არის.
ასეთ პირობებში ფეხბურთის განვითარებაზე ლაპარაკი უადგილოა. ამიტომ ვამბობ, ყველაფერი დასაწყებია ნულიდან, ქართულ ფეხბურთს მართლაც ღირსეული საფუძველი რომ ჩავუყაროთ.
- კიდევ ერთი მნიშვნელოვანი თემაა, როგორ მოვიზიდოთ ქართულ ფეხბურთში ფინანსები.
- თქვენ კარგად იცით, როგორი დამოკიდებულება ჰქონდა ძველ ხელისუფლებას ქართული ბიზნესის მიმართ.
ასეთი მიდგომა და ზეწოლები ახალ მთავრობას არ ექნება. პირიქით, გვსურს, ბიზნესს ხელი შევუწყოთ და შევუქმნათ ის გარემო, რომ ადამიანები დასაქმდნენ, შეიქმნას მეტი ეროვნული პროდუქცია და საერთო დოვლათი, ხალხს არ უჭირდეს.
მისი განვითარება ქვეყნის წინსვლის წინაპირობა გახდება. ადრე თუ გვიან, ნორმალურ, განვითარებულ სახელმწიფოში ხომ უნდა ვიცხოვროთ?!
ბიზნესი სპორტისკენ მხოლოდ ასეთ შემთხვევაში გაიხედავს. თუ მას უჭირს, არც ფეხბურთის დაფინანსებას მოინდომებს და არც სხვა სფეროსკენ გაიხედავს.
ასე რომ, დარწმუნებული იყავით, ბიზნესი სპორტს ახლა უფრო დაეხმარება.
- სერიოზულ საქმეს შეეჭიდეთ, მაგრამ ამავე დროს, დაასრულეთ კარიერა და ყველას აინტერესებს, როდის გაიმართება თქვენი გამოსამშვიდობებელი მატჩი.
- ვიცი, რომ ამ შეხვედრის გამართვა გულშემატკივრებს ძალიან სურთ. მათ ვაძლევ პირობას, რომ მატჩი აუცილებლად ჩატარდება.
- და "მილანი" ჩამოვა?
- დიახ, ჩამოვა, ეს პრობლემა არ არის. იმედი მაქვს, უახლოეს ხანებში ჩვენს ხალხს ძალიან ბევრი ცნობილი ვარსკვლავის ხილვის საშუალება მიეცემა.
იტალიელების გარდა, კიდევ ბევრი სხვა ვარსკვლავი გვესტუმრება და ქართველებს ძალიან ლამაზ საღამოს ვაჩუქებთ.
- როდესაც პარლამენტი დაგამტკიცებთ, სამტრედიაში ახალი მაჟორიტარული არჩევნები გაიმართება, მაგრამ თქვენს ამომრჩეველს საფეხბურთო კლუბის აღორძინებას შეპირდით და ამ დაპირების შესრულება მოგიწევთ.
- მე სამტრედიელებს მივეცი პირობა, რომ ჩემს მშობლიურ ქალაქს ეყოლება საქართველოში ერთ-ერთი საუკეთესო გუნდი და ექნება საბავშვო სკოლა.
დიდი სურვილი მაქვს, სამტრედიამ ძლიერი საფეხბურთო ცენტრის სახელი დაიბრუნოს. ჩემს რაიონს ბევრად უფრო თანამედროვე და ელეგანტური სტადიონი შეეფერება.
ეს ძალიან მალე მოხდება და ევროპული სტანდარტებით გაკეთდება. იგივე იგეგმება სხვა ქალაქებშიც, მაგრამ როგორ და რა სახით, ამას მალე შეიტყობთ.
(იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
კახა კალაძეს მინისტრობა ჯენარო გატუზომ და ალესანდრო ნესტამ მიულოცეს
გიორგი დემეტრაძეს მალე გაათავისუფლებენ?
