შარშან გაზაფხულზე ყველა ვხარობდით, როცა ვასილ მაისურაძის დამოძღვრილმა საქართველოს 17-წლამდელთა ნაკრებმა მართლაც სასიამოვნო სიურპრიზი შემოგვთავაზა და ევროპის ოთხ საუკეთესო გუნდში მოხვდა! იმ გუნდის ფეხბურთელთა უმრავლესობა დღესდღეობით საქართველოს ჩემპიონატში, კერძოდ, პირველი ლიგის "ლოკომოტივში" ასპარეზობს და მათი თამაშის ხილვა ერთი სიამოვნებაა!
თანაც, ეს მხოლოდ ჩვენი აზრი არ არის და "ბენდელას" სტადიონზე შეკრებილმა გულშემატკივარმაც (უმაღლესი ლიგის ბევრ მატჩზე ასეთი აუდიტორია სანატრელია) ალალი ტაშით გააცილა "ლოკომოტივის" ახალგაზრდა ფეხბურთელები.
თითქმის მთელი მატჩის განმავლობაში თვალშისაცემი იყო სტუმართა ორგანიზებული თამაში: დაცვიდან ბურთი სწრაფად და, რაც მთავარია, ზუსტად
ფაქტია, რომ ამ ნიჭიერ ბიჭებს მწვრთნელის ხელიც ეტყობათ: "ბარსელონას" საფეხბურთო აკადემიაში ნამუშევარმა ჟერარდ სარაგოსამ თამაშის განმავლობაში სწორი კორექტივები (გნებავთ, გადაადგილებები) შეიტანა მატჩის საბოლოო შედეგიც, ალბათ, ლოგიკური იყო.
არადა, ამ წყვილის უპირობო ფავორიტად მასპინძლები მიიჩნეოდნენ. გამოცდილი სპეციალისტის, ვლადიმერ ხაჩიძის გუნდი სავსებით დამსახურებულად ლიდერობს თავის ჯგუფში და თუ რაიმე გაუთვალისწინებელი არ მოხდა, ერთწლიანი პაუზის შემდეგ უმაღლეს ლიგაში უნდა ვიხილოთ.
თანაც, ამ მატჩის წინადღეს, საკუთარ მოედანზე დამარცხდა "სპარტაკის" უახლოესი მდევარი "შუქურა", - მოკლედ, "ლოკომოტივთან" გამარჯვების შემთხვევაში ცხინვალელებს 14-ქულიანი უპირატესობა ექნებოდათ, მაგრამ...
...მატჩის დასაწყისი მასპინძელთა აქტიურობით აღინიშნა და გუნდის კაპიტანს თეიმურაზ შონიას ადრეული გოლის გატანაც შეეძლო, მაგრამ მისი "ერთი შეხებით" შესრულებული დარტყმა მიზანს მცირედით ასცდა.
თუმცა, მასპინძლებმა სწრაფი გოლი მაინც გაიტანეს: მარჯვენა გარემარბის პოზიციაზე გამწესებულმა ვალერი კილასონიამ თითქმის დაკარგული ბურთისათვის ბოლომდე იბრძოლა, კუთხური "მოინაგრა", თავადვე ჩააწოდა და შონიას თავური დარტყმაც ზუსტი აღმოჩნდა!
ამის მერე "სპარტაკს" კიდევ ერთი კარგი მომენტი ჰქონდა: კილასონია - ბურძენაძე-მეტრეველის ეფექტური კომბინაცია "სპარტაკის" საუკეთესო ბომბარდირის დარტყმით დამთავრდა, მაგრამ ბაჩო მიქავამ უშეცდომოდ ითამაშა და ზვიად მეტრეველს ჩემპიონატში მე-13 გოლის გატანა არ დაანება.
ამასობაში სტუმრებიც "გათამამდნენ" და ეს, განსაკუთრებით მარცხენა გარემარბზე, დავით ჯიქიაზე ითქმის - 18 წლის შემტევი, ვიდრე გამოცვლიდნენ, ერთ-ერთი გამორჩეული გახლდათ მოედანზე.
იგივეს თქმა შეიძლება მის თანატოლებსა და პარტნიორებზე: ცენტრალური მცველი ნიკა ჭანტურია, საყრდენი ნახევარმცველი გიორგი გორგოზია და ცენტრფორვარდი დათო დარციმელია ასაკთან შეუფერებელი ოსტატობით ირჯებოდნენ.
სტუმრებს აქტიური თამაში პირველ ტაიმშივე დაუფასდათ: "სპარტაკის" მცველებმა ბურთი უხეიროდ მოიგერიეს და 18 წლის დავით მთივლიშვილმა მოჭრილი დარტყმით საქართველოს 21-წლამდელთა ნაკრების მეკარეს გიორგი ნადირაძეს შანსი არ დაუტოვა.
სხვათა შორის, პირველ ტაიმში ჯერ სტუმრები ითხოვდნენ პენალტს (მათე ცინცაძის წაქცევისათვის), მერე კი, მასპინძლები - ტრიბუნიდანაც ისე სჩანდა, რომ "ლოკომოტივის" ერთ-ერთ მცველს საკუთარ საჯარიმოში ბურთი ხელზე მოხვდა...
მეორე ტაიმი პირველზე უკეთესი გამოდგა: სტუმართა რიგებში მარცხენა გარემარბის პოზიციაზე კიდევ ერთი ნიჭიერი ქართველი შემტევი, 17 წლის ლუკა ზარანდია გამოჩნდა, "ლოკომოტივმა" სისწრაფეს მოუმატა და დათო დარციმელიას ეფექტური შორეული რეიდი გოლით უნდა დაეგვირგვინებინა, მაგრამ უშეცდომოდ ითამაშა გიორგი ნადირაძემ.
მანამდე კი კიდევ ერთი საკამათო ეპიზოდი იყო: შეტევაში წასული ენდიკა ბორდასი ზვიად მეტრეველთან ორთაბრძოლაში წაიქცა და პენალტის დანიშვნას იმდენად ემოციურად ითხოვდა, ფიფას არბიტრის, ლევან კვარაცხელიასაგან გაფრთხილებაც დაიმსახურა.
ცნობისათვის: 31 წლის ენდიკა ბორდასს თავის დროზე ბილბაოს "ატლეტიკში" არაერთი მატჩი ჩაუტარებია. თუმცა სტუმართა გუნდში ბორდასის გარდა სხვა "ცნობადი" ახალწვეულიც ვიხილეთ: ბოლო წლების ერთ-ერთმა ყველაზე უიღბლო ფორვარდმა რატი ბარაბაძემ პირველი მატჩი ჩაატარა "ლოკომოტივის" შემადგენლობაში და სწორედ მან გაუწია ასისტენტობა დათო დარციმელიას, რომელმაც მოხდენილი მოძრაობით ჯერ მეურვე ჩამოიცილა, შემდეგ კი აუღებელი დაურტყა გიორგი ნადირაძეს!
ამ გოლამდე "სპარტაკს" ორი მეტ-ნაკლები სახიფათო მომენტი ჰქონდა: ლაშა კემუხტაშვილის დარტყმის შემდეგ სტუმრები კვლავაც მიქავამ გადაარჩინა, ზვიად მეტრეველის ეშმაკური დარტყმა კი მცირეოდენ არაზუსტი აღმოჩნდა...
19. 08. თბილისი. "ბენდელა". 400 მაყურებელი
სპარტაკი - ლოკომოტივი 1:2
1:0 შონია (12, კილასონიას პასით), 1:1 მთივლიშვილი (26), 1:2 დარციმელია (85, ბარაბაძის პასით)
გაფრთხილება: ენდიკა ბორდასი (65), დარციმელია (85)
არბიტრი: ლ. კვარაცხელია
სპარტაკი: ნადირაძე, ჭაფოძე, მგელაძე, ქურდაძე, ლემონჯავა, თ. შონია, ბურძენაძე, ვ. კილასონია, ნარიმანიძე, კ. ხიზანეიშვილი, მეტრეველი
მწვრთნელი: ვ. ხაჩიძე
შეცვლები: ნარიმანიძე - კემუხტაშვილი (59), ხიზანეიშვილი - მაქაცარია (70), კილასონია - კაკაშვილი (86)
სათადარიგოები: თვალავაძე, ზუხბაია
ლოკომოტივი: მიქავა, გაბაძე, ნ. ჭანტურია, ენდიკა ბორდასი, მთივლიშვილი, სულთანიშვილი, გოროზია, მზევაშვილი, ცინცაძე, ჯიქია, დარციმელია
მწვრნთელი: ჟერარდ სარაგოსა
შეცვლები: მზევაშვილი - ზარანდია (46), სულთანიშვილი - ბარაბაძე (63), ჯიქია - კიკაბიძე (72)
სათადარიგოები: ბ. საჯაია, ჩიტეიშვილი, ყანჩაშვილი, მაკასარაშვილი
სხვა მატჩები
შუქურა - კოლხეთი 0:1
ჩხერიმელა - სამტრედია 1:2
ადელი - სამგურალი 0:1
ლიახვი - ალგეთი 0:2
სატურნირო ცხრილი
ა გ თ მ ფ წ ბ ქ
1. სპარტაკი 22 18 2 3 58-12 56
2. ლოკომოტივი 24 14 5 5 60-26 47
3. შუქურა 22 14 3 5 42-17 45
4. კოლხეთი (ხ) 24 14 2 8 31-24 44
5. სამგურალი 24 12 7 5 48-32 43
6. სამტრედია 24 13 4 7 40-30 43
7. ალგეთი 23 9 3 11 36-40 30
8. მერცხალი 23 3 8 12 28-41 17
9. ლიახვი 24 3 6 15 22-56 15
10. ჩხერიმელა 23 4 1 19 24-61 13
11. ადელი 24 4 1 19 25-66 13
ყოველდღიური სპორტული გაზეთი "ლელო"
