ლა ლიგა. ბოლო დღის ტრანსფერები: როგორ ვერ გადავიდა დე ხეა "რეალში"

31 აგვისტო და საფეხბურთო სატრანსფერო ფანჯარა სრულდებოდა და ევროპის დღის ტრანსფერად ყველა დავიდ დე ხეას სავარაუდო ტრანსფერს ასახელებდა "მანჩესტერ იუნაიტედიდან" მადრიდის "რეალში".

რაღა სავარაუდოს - "მარკამ" დაწერა, რომ კლუბებმა ყველაფერი შეათანხმეს, 24 წლის ესპანელი მეკარე დედაქალაქს, ოღონდ სხვა კლუბს უბრუნდებოდა, სამაგიეროდ, "იუნაიტედი" "სამეფო კლუბისგან" 30 მილიონ ევროს და ხურდაში კოსტარიკელ მეკარე კეილორ ნავასს მიიღებდა.

ხალხი "რეალის" ოფიციალურ საიტზე გადაერთო, მაგრამ გვიან ღამემდე იქ მთავარი თემა კაზემიროს მიერ კონტრაქტის გაგრძელება იყო... და აი, მოწმენდილ ცაზე მეხის გავარდნას ჰგავდა AS-ის და "სქაი სპორტის" ჟურნალისტის, გილიემ ბალაგეს შეტყობინება: დე ხეას ტრანსფერი ჩაიშალა!

აღმოჩნდა, რომ კლუბებმა ესპანეთის ფეხბურთის ფედერაციას დროულად (ადგილობრივი დროით, შუაღამისთვის) ვერ მიაწოდეს საბუთები. ესპანური მხარე ყველაფერში "წითელ ეშმაკებს" ადანაშაულებს. მაშ ასე, დე ხეა სულ მცირე, იანვრამდე "ნისლიან ალბიონზე" რჩება, სადაც საბოლოოდ გაუფუჭდა ურთიერთობა ლუი ვან გაალთან.

"რეალის" მხარე თავისი სიმართლის დამტკიცებას აპირებს. მათი თქმით, "მანჩესტერ იუნაიტედმა" ძალიან დაუგვიანა "რეალს" საჭირო საბუთები. ამ ტრანსფერით კეილორ ნავასიც დაზარალდა. მართალია, ის დარჩა "რეალში", მაგრამ "მანჩესტერში" გადასვლის შემთხვევაში, კოსტარიკელი ორჯერ მეტ ხელფასს აიღებდა.

"მარკამ" გამოიძია, რა ხდებოდა ბოლო წუთებში დე ხეას ტრანსფერთან დაკავშირებით. შუაღამემდე, ანუ სატრანსფერო ფანჯრის დახურვამდე წუთებით ადრე კეილორ ნავასი წარმომადგენელთან ერთად "რეალის" ოფისში გამოცხადდა. ისინი გაეცნენ ახალ ხელშეკრულებას "მანჩესტერ იუნაიტედთან". მათ გარკვეული ცვლილებების შეტანა მოითხოვეს.

ამას კი დრო დასჭირდა, დოკუმენტები "რეალის" ოფისში დროულად ვერ მივიდა. საბოლოოდ, "რეალმა" LFP-ში საჭირო დოკუმენტები 00:30-ზე გააგზავნა, სატრანსფერო სეზონი ნახევარი საათის დახურული იყო...

ცოტა სხვა ვერსია აქვს "სამეფო კლუბს" - გუშინ საღამოს "რეალის" ოფიციალურ საიტზე კლუბის ახსნა-განმარტება დაიდო, თუ რატომ ჩაიშალა ეს ტრანსფერი. გთავაზობთ კლუბის განცხადებას:

"მანჩესტერ იუნაიტედი" მოლაპარაკებაზე 31 აგვისტომდე არ მოდიოდა. 31-ში მოლაპარაკება მალევე შედგა და პირველი კონტრაქტები 13:39-ზე დაიგზავნა. "მანჩესტერის" კომენტარები 8 საათის მერე მივიღეთ - 21:43-ზე. "რეალი" მაშინვე დათანხმდა ყველა ცვლილებას კონტრაქტში. ორივე გოლკიპერმა მოაწერა ხელი და "იუნაიტედის" ოფისში ხელშეკრულებები 23:32-ზე გაიგზავნა. ინგლისური კლუბი ნავასის აგენტებს 23:53-ზე შეუთანხმდა.

"იუნაიტედმა" ფიფას შეატყობინა დე ხეას ტრანსფერის შესახებ, მაგრამ არა კეილორ ნავასის შესახებ. ეს მოხდა 00:00-ზე. იმავდროულად, ხელმოწერილი დოკუმენტები "რეალის" ოფისშიც გადმოიგზავნა. "რეალმა" ყველა დოკუმენტი 00:02-ზე მიიღო და შეეცადა TMS-ში შესვლას, მაგრამ სისტემა უკვე დაბლოკილი იყო. 00:26-ზე TMS-დან შემოგვთავაზეს, შეგვევსო მონაცემები დე ხეას ტრანსფერზე, რადგან ინგლისში ფანჯარა დღემდე ღია რჩებოდა. "რეალმა" ყველაფერი გადაგზავნა ესპანურ ლიგაში, თუმცა წინასწარ ცნობილი იყო, რომ დედლაინი გასული იყო. ზოგადად, "რეალი" ყოველთვის ყველანაირად ცდილობდა, რომ ტრანსფერი განხორციელებულიყო".

შეგახსენებთ, რომ TMS ფიფას ონლაინბაზაა, სადაც უნდა დარეგისტრირდეს ყველა ტრანსფერი.

აქვე ვიტყვით, რომ დე ხეას ტრანსფერის ჩაფლავებამ სოციალურ ქსელებში დიდი გამოცოცხლება გამოიწვია, "რეალი" და "მანჩესტერი" საყოველთაო დაცინვის ობიექტები გახდნენ. "ევროსპორტის" კარიკატურას აქვე გთავაზობთ.

შევეცდებით, 31 აგვისტოს განხორციელებულ ყველა ტრანსფერზე მოგითხროთ. დავიწყოთ მთავარით: სევილიურ "ბეტისს" ლეგენდა დაუბრუნდა - ხოაკინ სანჩესი, რომლის სანაცვლოდაც "ფიორენტინას" 1 მილიონი ევრო გადაუხადეს.

ანდალუსიურმა კლუბმა "ნორვიჩისგან" იჯარით ჰოლანდიელი ფორვარდი რიკი ვან ვოლფსვინკელი აიყვანა. ამასთან, "ბეტისმა" ჩილელი ლოლო რეიესი "ალმერიაში" გაანათხოვრა.

34 წლის ხოაკინმა "ბეტისი" 2006 წელს დატოვა. ახლა კი ის სევილიას და მშობლიურ გუნდს დაუბრუნდა. "ფიორენტინამ" ხოაკინი ორი წლის წინათ, "მალაგადან" აიყვანა. ესპანელმა "იების" შემადგენლობაში 49 მატჩში მიიღო მონაწილეობა. მას "ფიორენტინასთან" კიდევ ერთწლიანი კონტრაქტი აკავშირებდა. ხოაკინი 13 წლის ასაკიდან "ბეტისშია", 2000 წელს მისი პროფესიული დებიუტი შედგა.

"ჩემი ოცნება ასრულდა - ბოლო დროს ყველაზე მეტად "ბეტისში" დაბრუნება მინდოდა. მიუხედავად იმისა, რომ მოლაპარაკება რთული იყო და ის დროში გაიწელა, წვალებად ღირდა - შინ დავბრუნდი", - განაცხადა ხოაკინმა.

"სელტამ" "მალიორკაში" გაანათხოვრა დავიდ კოსტასი. "დეპორტივომ" "ლეგანესში" იჯარით ბიჩო გაუშვა და არგენტინელი ხონას გუტიერესი დაიმატა.

31 აგვისტოს "ეიბარმა" "ვერდერისგან" ბოსნიელი იზეტ ჰაიროვიჩი ინათხოვრა, ხონ ერასტი კი იტალიურ "სპეციაში" გაუშვა.

სატრანსფერო სეზონის ბოლო დღეს "ესპანიოლისგან" სენეგალელი პაპაკული დიოპი დაიმატა, მარკ კაბალიე კი "ლუგოში" გაუშვა იჯარით.

"ხეტაფემ" გლაზგოს "სელტიკიდან" სერბი სტეფან შჩეპოვიჩი ინათხოვრა. "გრანადამ" იჯარით ორი ბრაზილიელი აიყვანა, "უდინეზედან" ნეუტონი, ხოლო "მარსელიდან" - დორია. სამაგიეროდ, იჯარით "მაინცში" გაუშვა ხონ კორდობა, რიკი კი "გვადალახარაში" თავისუფალ აგენტად მიავლინა.

"ლევანტემ" "ვალიადოლიდისგან" დიეგო მარინიო შეიძინა. "მალაგამ" "მილანისგან" მაროკოელი ჰაჩიმ მასტური იჯარით წაიყვანა. მცირე ცვლილებები შეეხო "რაიო ვალეკანოსაც" - "ელვებმა" "კარდიფ სიტიდან" ხავი გერა მიიყვანეს, ხოლო პაბლო ერნანდესი "ალ არაბიდან" იჯარით აიყვანეს, ალეხანდრო პოსუელო კი "გენკში" ზარანდიასა და ოქრიაშვილის გუნდელი გახდა.

"სევილიამ" მილანის "ინტერიდან" მცველი მარკო ანდრეოლი იჯარით დაიმატა. "პორტუმ" ადრიან ლოპესი იჯარით "ვილიარეალში" გაუშვა. "ყვითელმა წყალქვეშა ნავმა" ხელშეკრულება გაუწყვიტა ხონათან პერეირას.

ვალენსიურმა კლუბმა სულ ბოლოს კიდევ ერთი ტრანსფერი განახორციელა - "მილანიდან" 34 წლის მცველი დანიელე ბონერა აიყვანა და მას 1-წლიანი კონტრაქტი გაუფორმა. ბონერა იტალიის ნაკრების ყოფილი ფეხბურთელია, ის "მილანში" 2006 წლიდან ასპარეზობდა.

აქ არ ვახსენებთ რაულ გარსიას, რომელიც წინა დღით გადავიდა "ატლეტიკოდან" ბილბაოს "ატლეტიკში".

ყოველდღიური სპორტული გაზეთი "ლელო"