ზინედინ ზიდანი - ფლორენტინო პერესის არჩევანი

ოთხშაბათს "რეალი" "სანტიაგო ბერნაბეუზე" "რეალ სოსიედადს" მასპინძლობს. ბევრის აზრით, ეს რაფა ბენიტესის უკანასკნელი მატჩი იქნება "სამეფო კლუბის" თავკაცის პოსტზე. ფლორენტინო პერესს მისი შემცვლელიც მოუფიქრებია - ზინედინ ზიდანი.

მართლაც, რა უნდა მოხდეს სანსებასტიანელებთან მატჩში, რომ რაფაელ ბენიტესის მიმართ დამოკიდებულება რადიკალურად შეიცვალოს, თუკი ეს არ მოხდა წინა ტურის შემდეგ, როცა ბენიტესის "რეალმა" 10:2 გაანადგურა დერბიში "რაიო ვალეკანო". არც არაფერი - ამიტომაც ბენიტესი მართლაც განწირული გვგონია.

"მარკას" მტკიცებით, ზინედინ ზიდანი "რეალ მადრიდ კასტილიას" ფეხბურთელებმა, რომლებსაც ის 2014/15 წლების სეზონში და დღემდე წვრთნიდა, უკვე გააცილეს აპლოდისმენტებით - ზიზუ "დიდ ავიაციაში" მოდის.

"მარკა" იუწყება, რომ ზიდანმა უკვე კარგა ხანია, იცის ფლორენტინო პერესის გადაწყვეტილების შესახებ.

ფრანგმა ნაყოფიერად გამოიყენა საშობაო არდადეგები, მან იოგას ცენტრს მიაკითხა რელაქსაციისთვის.

ცნობილია, რომ წარსულში სახელოვანი ფეხბურთელი იოგას დიდი ტრფიალია. ესპანეთში ის ხშირად ესწრება კლასებს, სამშობლოში კი იოგას სპეციალური ცენტრიც გახსნა. ახლა ზინედინი დამშვიდებული ელოდება, როდის გახდება მისი დანიშვნა ოფიციალური.

ცნობილია, რომ ფლორენტინო პერესი მწვრთნელის შუა სეზონში მოხსნის დიდი ტრფიალი არ არის. "რეალმა" ბოლოს მწვრთნელი შუა სეზონში 2005 წლის დეკემბერში, ათი წლის წინათ გაათავისუფლა.

მაშინ გუნდს ბრაზილიელი ვანდერლეი ლუშემბურგო წვრთნიდა. სხვებს (ვისენტე დელ ბოსკე, კარლოს კეირუში, მანუელ პელეგრინი, ჟოზე მოურინიო და კარლო ანჩელოტი) "სამეფო კლუბის" პრეზიდენტი სულ მცირე, სეზონის ჩამთავრებას მაინც აცლიდა.

ლუშემბურგომდე იგივე დაემართა მარიანო გარსია რემონს, რომელიც დანიშვნიდან 4 თვეში, 2004 წლის დეკემბერში მოხსნეს და სწორედ ლუშემბურგოთი ჩაანაცვლეს. ისტორიას თუ დავუჯერებთ, წესით, ბენიტესმაც უნდა მიაღწიოს სეზონის ბოლომდე, მაგრამ "მარკა" და სხვა ესპანური გაზეთები სხვა აზრზე არიან.

ზიზუ ამ კლუბის წარმატების ნაწილია, ის კლუბის პრეზიდენტისა და ფანების ფავორიტია. მას არასოდეს ექნება იმ სახის პრობლემები ვარსკვლავებთან, რაც ახლა ბენიტესს აქვს, რადგან თანამედროვე მოთამაშეთაგან ვერც ერთი ვერ იტყვის დაბეჯითებით, რომ ზიდანზე დიდი ვარსკვლავია, ვერც რონალდო...

მოკლედ, რაფა ბენიტესის ნდობა კლუბის ხელმძღვანელობას დღითიდღე უქრება. "ლივერპულისა" და "ნაპოლის" ექსთავკაცმა შესაძლოა, "სოსიედადთან" თამაშამდე მიაღწიოს, მაგრამ საეჭვოა, რომ ახალ წელს ისევ "რეალის" თავკაცად შეხვდეს.

ეს ის ვითარებაა, როცა ყველა და ყველაფერი მწვრთნელის წინააღმდეგაა. ყველა გამოკითხვით, რაფას დაკარგული აქვს პოპულარულობა "რეალის" ფანებს შორის (თუკი ჰქონდა). ყველა მედიასაშუალება, რომელსაც "სამეფო კლუბის" სამზარეულოზე ხელი მიუწვდება, ამტკიცებს, რომ ფეხბურთელთა დიდი ნაწილიც მზადაა, დაემშვიდობოს მწვრთნელს.

არაესპანური მედია კი "რეალის" მომავალ თავკაცად უფრო ჟოზე მოურინიოს ხედავს. "მირორი" ამტკიცებს, რომ ფლორენტინო პერესი იმედოვნებს, 52 წლის პორტუგალიელს დაიყოლიებს, რომ "რეალში" დაბრუნების დროა. ბრიტანული გაზეთი ამტკიცებს, რომ "რეალის" ხელმძღვანელობა უკვე გავიდა კონტაქტზე მოუს გარემოცვასთან და პირველი კონკრეტული წინადადებითაც მიმართა მწვრთნელს. მოურინიოს ხელში ჩასაგდებად "რეალის" მთავარი კონკურენტი "მანჩესტერ იუნაიტედია".

"გაძეტა დელო სპორტს" თუ დავუჯერებთ, "რეალის" ექსთავკაცი კარლო ანჩელოტი "სამეფო კლუბიდან" "ბაიერნში" სამი ფეხბურთელის გადაყვანას შეეცდება, როცა სეზონის ბოლოს გერმანულ გრანდს ჩაიბარებს. ლაპარაკია ტონი კროოსზე, ლუკა მოდრიჩსა და გარეთ ბეილზე. ასევე, ანჩელოტის "ნაპოლის" ფეხბურთელები - ლორენცო ინსინიე და გონსალო იგუაინი ("რეალის" ყოფილი ფორვარდი) აინტერესებს.

"რეალი" კი გამალებით ემზადება "სოსიედადთან" მატჩისთვის. ჯგუფთან ერთად ვარჯიში დაიწყო გამოჯანმრთელებულმა რაფაელ ვარანმა. ფრანგმა მცველმა შესაძლოა, ითამაშოს კიდეც ბასკებთან. სამაგიეროდ, საეჭვო გახდა სერხიო რამოსისა და ტონი კროოსის თამაში. მათი ტრავმები მნიშვნელოვანი არ არის, თუმცა ყველაფერი თამაშის დღეს გადაწყდება.

(იბეჭდება მცირე ცვლილებით)
ყოველდღიური სპორტული გაზეთი "ლელო"