ორი წელია, "ბაიერნს" ტიტული არ მოუგია, რაც რეკორდმაისტერისთვის კატასტროფის ტოლფასია. მიუნხენური გრანდის გულშემატკივრებს და ხელმძღვანელებს ეს კარგად აქვთ გაცნობიერებული, ახლა კი იგივეს ფეხბურთელებისგანაც მოითხოვენ. "ბაიერნის" ვიცე-პრეზიდენტმა კარლ-ჰაინც რუმენიგემ "ბილდისთვის" მიცემულ ინტერვიუში ხმა აიმაღლა.
"ზედიზედ ორ სეზონში ხელცარიელები დავრჩით და უტიტულობას სასწრაფოდ ბოლო უნდა მოეღოს, - აცხადებს 56 წლის კალე, - არ ვარ დარწმუნებული იმაში, რომ ეს ყველაფერი ყველა ფეხბურთელს ზედმიწევნით ზუსტად ესმის და სწორედ მათ გასაგონად მინდა გავიმეორო: ტიტულების მოგების დროა!
მოთამაშეების მონდომებაში ეჭვი რომ გვეპარება, იმიტომაც დავნიშნეთ მათიას ზამერი
როგორც ხედავთ, რუმენიგე ფეხბურთელების შემართებაზე ზრუნვას პირველ რიგში სწორედ ზამერს ავალებს და თამამად შეიძლება ითქვას, რომ ეს უკანასკნელი საქმეს ძალიან კარგად შეუდგა. მათიასი "უნტერჰახინგთან" ამხანაგური მატჩის დროს მთავარი მწვრთნელის, იუპ ჰაინკესის გვერდით იჯდა და როგორც თამაშის დაწყებამდე, ისე შესვენებაზეც, "დონ იუპს" გასახდელშიც შეჰყვა. ჰაინკესი ამის გამო დისკომფორტს არ განიცდის. პირიქით, ამბობს, მათიასთან აზრის გაცვლა აუცილებელიაო.
ზამერი ტრანსფერებზეც აქტიურად მუშაობს. როგორც იცით, "ბაიერნმა" უკვე გადაიბირა ისეთი ფეხბურთელები, როგორებიც არიან კლაუდიო პისარო, მარიო მანჯუკიჩი და დანტე, თუმცა ბავარიელები ამ ტრანსფერებზე შეჩერებას არ აპირებენ.
"სატრანსფერო ფანჯარა 31 აგვისტოს უნდა დაიხუროს და მანამდე ბევრი დრო გვაქვს. თუ ზამერი და ჰაინკესი იტყვიან, რომ შემადგენლობას გაძლიერება კიდევ სჭირდება, მზად ვართ, შესაძლებლობების ფარგლებში ვიმოქმედოთ," - ესეც რუმენიგეს სიტყვებია.
ყოველდღიური სპორტული გაზეთი "ლელო"
