გერმანიის ნაკრები 15 აგვისტოს (22:30) არგენტინასთან ამხანაგურ მატჩს გამართავს. 13 აგვისტოს ბუნდესნაკრების მთავარმა მწვრთნელმა იოახიმ ლიოვმა პრესკონფერენცია გამართა, რომელიც, ყველასათვის მოულოდნელად, ძალიან ხმაურიანი გამოვიდა. 52 წლის იოგიმ მკაცრად გააკრიტიკა გერმანული პრესა იმის გამო, რაც ჟურნალ-გაზეთებში გერმანიის ნაკრებზე იტალიასთან ნახევარფინალში წაგების შემდეგ დაიწერა.
"იტალიის ნაკრებთან წაგებული მატჩის შემდეგ კრიტიკის ქარცეცხლი დაგვატყდა. სპორტული კრიტიკა ჩემთვის ყოველთვის მისაღებია, მაგრამ მიმაჩნია, რომ კრიტიკული განცხადებებისა და მოსაზრებების უდიდესი ნაწილი გაუმართლებელი იყო. სიმართლე გითხრათ, ამგვარმა კრიტიკამ ძალიან დამღალა და ვინ მოთვლის, მერამდენედ მიწევს ამაზე საუბარი, -
ამ ლიდერებთან ერთად ჩვენ უდიდესი პროგრესი განვიცადეთ და ძალიან ბევრ რამეს მივაღწიეთ! ფილიპ ლამმა, მიროსლავ კლოზემ და ბასტიან შვაინშტაიგერმა ევროპის ჩემპიონატზე ყველაფერი ისე გააკეთეს, როგორც ველოდი.
დღეს ფეხბურთში სხვანაირი ლიდერები არსებობენ - ნურავინ ელის ისეთებს, როგორებიც თუნდაც 90-იან წლებში გვყავდა. ამიტომაც მიმაჩნია ეს დისკუსია არასწორად. იმედია, ამის შესახებ საუბარი უკანასკნელად მიწევს. როგორ ფიქრობთ, ნაკრებს ლიდერები რომ არ უვარგოდეს, ჩვენი გუნდის თამაშებს მილიონობით ადამიანი უყურებდა?"
ლიოვი ხმამაღლა და მკაცრი ტონით საუბრობდა: "რაც შეეხება მეორე პრობლემას - ჟურნალ-გაზეთებში წავიკითხე, რომ არაეთნიკური გერმანელი ფეხბურთელები ჩვენს ჰიმნს არ მღერიან და მოედანზე არ იბრძვიან.
მიმაჩნია, რომ ეს ფატალური მოსაზრებაა! ამის მთქმელი, ფაქტობრივად, იმას გულისხმობს, რომ ასეთი მოთამაშეები არ არიან კარგი გერმანელები, რაც ძალიან ცუდია! ჰიმნის შესრულება, რა თქმა უნდა, ძალიან ლამაზი, ულამაზესი სანახავია, მაგრამ ეს არ არის და ვერ იქნება იმის დასტური, რომ გუნდი შედეგს ამიტომ ვერ აღწევს.
მით უმეტეს, არც იმის მიზეზია, რომ ამის გამო ფეხბურთელმა შეიძლება მოედანზე არ იბრძოლოს".
გერმანულმა პრესამ იტალიასთან მარცხის (1:2) შემდეგ ბუნდესგუნდის ფეხბურთელები მართლაც მაგრად გააკრიტიკა იმის გამო, რომ ზოგიერთი ჰიმნს საერთოდ არ მღეროდა, დანარჩენები კი მხოლოდ ჩურჩულებდნენ - ეს იმ დროს, როცა იტალიელებმა თავიანთი ჰიმნი მართლაც სამაგალითოდ შეასრულეს.
"ჩემთვის ასეთი კრიტიკაც მიუღებელია. ჩვენს ფეხბურთელებს გუნდთან და გერმანიის დროშასთან იდენტიფიცირების პრობლემა არ აქვთ! იოზილს, ხედირას და სხვებს ეს არაერთხელ დაუმტკიცებიათ," - განაცხადა იოგიმ.
მესამე საკითხი, რაც ლიოვს ასევე პრობლემურად მიაჩნია და რაშიც ექსპერტებს კატეგორიულად არ ეთანხმება, არის კრიტიკა იმის შესახებ, რომ გერმანიის ნაკრების ფეხბურთელები ზედმეტად განებივრებულები არიან.
ლიოვი: "ჩვენ ფეხბურთელებისგან ყოველთვის საუკეთესო ფეხბურთს ველით და ვითხოვთ. შესაბამისად, მათ ყოველთვის საუკეთესო პირობები უნდა შევუქმნათ. ესპანეთისა და იტალიის ნაკრების ფეხბურთელებსაც თავიანთი შეფ-მზარეული ჰყავთ და ყოველთვის ავტობუსით არ დადიან!"
ვნახოთ, როგორ შეხვდება საფეხბურთო გერმანია ბუნდესმწვრთნელის ამ განცხადებებს - გაკეთდება თუ არა კონტრ-განცხადებები. გერმანულ პრესაში ლიოვის ამ განცხადებებს უკვე მოჰყვა გარკვეული, რა თქმა უნდა, კრიტიკული რეაქცია.
შეგახსენებთ, რომ გერმანიის საფეხბურთო კავშირმა ლიოვს სრული მხარდაჭერა აღუთქვა და ასპროცენტიანი ნდობა გამოუცხადა. იოგის მიზანი ახლა გუნდის მსოფლიოს 2014 წლის ჩემპიონატისთვის მომზადებაა.
ტერ შტეგენი ნოიერის ნაცვლად
გერმანიის სუპერთასის (ბაიერნი-დორტმუნდი 2:1) შემდეგ მიუნხენური გრანდის მეკარე მანუელ ნოიერმა ლიოვს შეუთვალა, რომ არგენტინასთან ტესტ-მატჩში მონაწილეობას ვერ მიიღებს - 26 წლის მეკარე, რომელსაც ნაკრებში 32-ე თამაში უნდა ჩაეტარებინა, "დორტმუნდთან" შეხვედრაში დაშავდა.
შესაბამისად, იოგიმ ხვალინდელი მატჩისთვის ნაკრებში მიონხენგლადბახის კარის დარაჯ მარკ-ანდრე ტერ შტეგენს უხმო.
შეგახსენებთ, რომ იოახიმ ლიოვის გაფართოებულ სიაში ტერ შტეგენისა და რონ-რობერტ ცილერის (ჰანოვერი) გარდა, რენე ადლერი (ჰამბურგი), ბერნდ ლენო (ლევერკუზენი), ტიმ ვიზე (ჰოფენჰაიმი) და სვენ ულრაიხი (შტუტგარტი) არიან.
ყოველდღიური სპორტული გაზეთი "ლელო"
