ზუსტად ისე, როგორც შარშან, გერმანიის ნაკრების გულშემატკივრებმა 2012 წლის საუკეთესო ბუნდესგუნდელადაც მესუთ იოზილი დაასახელეს. "ფან-კლუბ ნაციონალმანშტაფში" ჩატარებულ გამოკითხვაში მადრიდის "რეალის" გამთამაშებელმა ხმების 32,49 პროცენტი მიიღო. აღსანიშნავია, რომ მეორე ადგილი მიროსლავ კლოზემ ("ლაციო", 13.89%) დაიკავა, მესამეზე კი მარკო როისი (დორტმუნდის "ბორუსია", 13.1%) გავიდა.
გარდა ამისა, გამოკითხვა ჩატარდა გერმანიის ნაკრების წლის ულამაზესი გოლის გამოსავლენადაც და ბუნდესგუნდის ფანებმა 2012 წლის საუკეთესო გოლად კლოზეს ის დარტყმა დაასახელეს, რომლითაც მირომ 16 ოქტომბერს გერმანია შვედეთთან 2:0 დააწინაურა. შეგახსენებთ, რომ ის შეხვედრა 4:4 დასრულდა.
აქვე ვთქვათ, რომ
მესუთმა 2012 წელს ბუნდესგუნდის ფორმა 14-დან 13 მატჩში მოირგო. საერთო ჯამში მან გერმანიის ნაკრებში 2012 წელს 1089 წუთი ითამაშა, რაც საუკეთესო მაჩვენებელია. ამასთან, იოზილმა ყველაზე მეტი, 6 გოლი გაიტანა და 6 საგოლე პასი მიითვალა. გამოკითხვაში სულ ბუნდესგუნდის ფან-კლუბის 19 505-მა წევრმა მიიღო მონაწილეობა - მათ არჩევანი გერმანიის ნაკრების იმ 17 ფეხბურთელს შორის გააკეთეს, რომლებმაც გასულ წელს ბუნდესგუნდში მინიმუმ 7 მატჩი ჩაატარეს.
ყოველდღიური სპორტული გაზეთი "ლელო"
ასევე იხილეთ:
მესუთ იოზილი: ბედნიერი ვარ, დუბლი რომ შევასრულე
