ევერტონი-სიტი. გამოხმაურება: გვარდიოლას კაპიტულაცია

"მანჩესტერ სიტის" "გუდისონ პარკზე" ბურთის ფლობა 71% ჰქონდა, "ქალაქელებმა" უფრო მეტჯერ დაარტყეს მეტოქის კარისკენ და კარში უფრო მეტი კუთხურიც მოაწოდეს… მაგრამ მაინც 0:4 წააგეს.

რაც მთავარია, ვერავინ იტყვის, რომ ეს უსამართლობა იყო, რადგან "ევერტონი" გაცილებით მწვავედ და აზრიანად გამოიყურებოდა და უფრო თამაშობდა ან გამოსდიოდა თამაში გოლზე. "სიტის" კი დებიუტში ჰქონდა ორი შანსი და ამის მერე თითქმის აღარაფერი შეუქმნია. ახლა მანჩესტერელები მეხუთე ადგილზე არიან და ლიდერს 10 ქულით ჩამორჩებიან. ამიტომაც, ხოსეპ გვარდიოლას თავისი პირით რომ არ ეთქვა, ჩემპიონობისთვის ბრძოლა ჩვენთვის ამ მარცხის მერე საბოლოოდ დამთავრებულიაო, ამას ჩვენ მაინც ვიტყოდით.

პეპს არ ჰყავდა დისკვალიფიცირებული ფერნანდინიო და ტრავმირებული ფერნანდო, ასევე, ილქაი გიუნდოგანი. საყრდენად პაბლო საბალეტამ ითამაშა. ექსპერიმენტებმა არ გაამართლა. თამაში დიდად არავის წაუვიდა. სერხიო აგუეროს კი უკვე 3 სეზონია "ევერტონისთვის" გოლი ვერ გააქვს.

სამაგიეროდ, "კანფეტებმა" გაიბრწყინეს და რონალდ კუმანის არჩეულმა და მოდაში შემოსულმა სამცველიანმა ტაქტიკამ გაამართლა. შეუდარებელი გახლდათ ახალგაზრდა ტომ დევისი, რომელმაც უკვე მოიგო ფანების გული. მინდორზე 90-ე წუთზე შესულმა 18 წლის ადემოლა ლუკმენმა გოლის გატანა მოასწრო და დებიუტი ასე აღნიშნა. ტკბილი ლუკმა და ლუკმენი კუმანმა ბოლოსკენ მოიტოვა.

ძალიან კარგი მატჩი ჩაატარეს კევინ მირალასმა და რომელუ ლუკაკუმ. არც როს ბარკლის დაეწუნებოდა რამე და შედგა მორგან შნედერლენის დებიუტიც. "ევერტონი" სულ არა და ასე თუ ისე, ხშირად მაინც რომ თამაშობდეს ასე, ჰოლანდიელი სპეციალისტის გუნდი სერიოზულად იბრძოლებდა ჩემპიონთა ლიგის საგზურისთვის.

"პირველ ტაიმში ძალიან კარგ დროს გავიტანეთ და დაიწყო თუ არა მეორე ნახევარი, სხვაობა გავზარდეთ. ამან მეტოქე უაღრესად რთულ მდგომარეობაში ჩააგდო. "ევერტონს" დღეს დიდი კომპლიმენტი ეკუთვნის. განსაკუთრებით, დაცვაში ორგანიზებულად თამაშის გამო და შეტევაშიც ძალზე კარგად ვითამაშეთ. მთავარი ამ ფორმის შენარჩუნება და ასე გაგრძელებაა. ვაჩვენეთ, რაც შეგვიძლია, მაგრამ რთულია სტაბილურად ასე თამაში და თუ წარმატების მიღწევა გსურს, ეს უნდა მოახერხო" - თქვა კუმანმა.

პეპ გვარდიოლა: "ჩვენ საკმაოდ ბევრი მომენტი შევქმენით, მაგრამ მეტოქემ პირველი და შემდეგ მეორე რეალური შანსი გამოიყენა და ორი გოლი გაგვიტანა. ამან ბიჭები ძალიან რთულ ფსიქოლოგიურ მდგომარეობაში ჩააგდო და ბევრი უნდა ვიმუშაოთ, რომ ვითარება გამოვასწოროთ და მომავალში მსგავსი სირთულეები თავიდან ავირიდოთ ან ამისთვის მზად ვიყოთ".

ეს შესაძლოა, "ბარსელონას" ყოფილი და მომავალი მწვრთნელების დუელიც იყო, რადგან კუმანს აქტიურად განიხილავენ ლუის ენრიკეს შესაძლო შემცვლელად. ჰოლანდიელი და ხოსეპი ერთადაც იყვნენ "ბარსელონაში", მაშინ პეპი ახალგაზრდა გახლდათ, კუმანი კი - გამოცდილი ვეტერანი.

რაღაც პერიოდი მათ ერთ ოთახშიც უწევდათ ცხოვრება და სინათლეს ბოლოს გვარდიოლა აქრობდა ხოლმე, როგორც უმცროსი. ამის გაკეთება ამჯერადაც პეპს მოუხდა და სიბნელეში დარჩა, დაბნეული… მთავარია, გვირაბის ბოლოს სინათლეს თუ დაინახავს, თორემ ბოლო პერიოდში ის ძალიან სასოწარკვეთილი, გაღიზიანებული და გაბრაზებული ადამიანის შთაბეჭდილებას ტოვებს.

ამ მატჩის დროსაც იყო ერთი მომენტი, რომელსაც რეჟისორებსა და ოპერატორებს ვერ გამოაპარებდი - გვარდიოლა არცთუ მცირე დროის განმავლობაში ერთ წერტილს მიაშტერდა და სევდიანად ჩაფიქრდა რაღაცაზე. ამას დიდი გამოხმაურებები და ხუმრობები მოჰყვა, სოციალურ ქსელში ფანებმა პეპი აიკლეს.

სინამდვილეში კი მას, ალბათ, გარდასული წლების დიდება ახსენდებოდა, თუ როგორ ეთხოვებოდა მზე ტურფა "კამპ ნოუს", "გუდისონ პარკზე" კი 3:0 ენთო ტაბლოზე. ეს სიცხადეა, პეპ გვარდიოლავ, თუ ფანტაზია? რეალობა კი ის გახლდათ, რომ ნორჩმა ლუკმენმა ცოტა ხანში 4:0 გახადა ანგარიში.

სტატისტიკა
* ასეთი სხვაობით "ევერტონს" "სიტი" პრემიერლიგაში აქამდე არ დაემარცხებინა.

* "კანფეტებმა" მეტოქის კარში ზუსტად 4-ჯერ დაარტყეს და ოთხივეჯერ გაიტანეს.

* ჩემპიონატის ბოლო 7 მატჩიდან 4-ში "მანჩესტერ სიტიმ" გოლი მეტოქის პირველივე ზუსტი დარტყმით გაუშვა.

* რომელუ ლუკაკუმ "ევერტონის" ბოლო 9 საშინაო მატჩში 8 გოლში მიიღო მონაწილეობა - 5 გოლი, 3 პასი.

* ამ მატჩში პირველი დარტყმა 25-ე წუთზე ვნახეთ. ამაზე დიდხანს დარტყმას ფანები მხოლოდ იმავე ტურის შეხვედრაში ელოდნენ "უოტფორდსა" და "მიდლსბროს" შორის, იმ შეხვედრაში პირველი დარტყმა 26-ე წუთზე შედგა.

* ტომ დევისი და ადემოლა ლუკმენი გახდნენ მე-16 და მე-17 თინეიჯერი, რომლებმაც "ევერტონის" მაისურით პრემიერლიგაში გოლი გაიტანეს. ამ მაჩვენებლით "ევერტონი" "არსენალს" გაუთანაბრდა.

* 2014 წლის აგვისტოს მერე, კონკრეტულად კი, სამუელ ეტო’ოს მერე, ლუკმენი გახდა "ევერტონის" პირველი ფეხბურთელი, ვინც სადებიუტო მატჩში გაიტანა გოლი. ეტო'ომ მაშინ ყოფილი გუნდის, "ჩელსის" კარის აღება მოახერხა.

ყოველდღიური სპორტული გაზეთი "ლელო"