სექტემბერში ინგლისის ნაკრებს ევროპის 2016 წლის ჩემპიონატის ორი შესარჩევი შეხვედრა უწევს. უკვე ცნობილია ის შემადგენლობა, რომლითაც ინგლისელთა მთავარი მწვრთნელი როი ჰოჯსონი ამ მატჩებში იხელმძღვანელებს. 68 წლის სპეციალისტი თავის "ლომებს" 5 სექტემბერს სან მარინოში ათამაშებს, ხოლო 8 სექტემბერს შვეიცარიის ნაკრებს უმასპინძლებს, რომელსაც იგი 1992-95 წლებში წვრთნიდა და რომელსაც ახლა, პირველ ადგილზე მოკალათებული, 6 ქულით უსწრებს.
წარუმატებლად ჩატარებული მსოფლიოს ჩემპიონატის შემდეგ ინგლისმა 10 შეხვედრა გამართა, აქედან ექვსივე ოფიციალური მატჩი მოიგო (ბურთების შეფარდება - 18:3), ხოლო 4 ამხანაგურიდან 2 მოიგო და ორი ფრედ
ძირითად მეკარედ კვლავ ჯო ჰარტი გვევლინება, მის დუბლიორად კი - ჯეკ ბატლენდი. ეს ნიჭიერი გოლკიპერი "სტოკიდან" ასმირ ბეგოვიჩის წასვლის მერე პირველი ნომერი გახდა და შესანიშნავად გამოიყურება. მესამე გოლკიპერი "ბარნლის" ტომ ჰიტონი კი ერთადერთი ფეხბურთელია შემადგენლობაში, რომელიც არა პრემიერლიგას, არამედ ჩემპიონშიპს წარმოადგენს. რობერტ გრინი, ფრეიზერ ფორსტერი და ბენ ფოსტერი ამ ეტაპზე დავივიწყოთ.
მცველებს შორის ვეღარ ვხედავთ ფილ ჯოუნსსა და ლეიტონ ბეინსს. ისინი, რაიან ბერტრანისა არ იყოს, დაშავებულნი არიან. სამაგიეროდ, პოზიციის პრობლემურობის გამო კვლავაც გამოძახებულია კირან გიბსი. თავისი ადგილი შეინარჩუნა "საუთჰემპტონიდან" "ლივერპულში" გადასულმა ნათანიელ კლაინმა. ხოლო ლუკ შოუ ნაკრებს დაუბრუნდა. არ არის კაილ უოკერი. სამაგიეროდ, სტაბილურად ინარჩუნებენ საკუთარ პოზიციებს "ევერტონის" ცენტრალური მცველები, გამოცდილი ფილ ჯაგიელკა და ახალგაზრდა ჯონ სტოუნსი, რომელიც თავის მხრივ, "კანფეტებმა" შეინარჩუნეს და "ჩელსის" არ დაუთმეს.
მიუხედავად იმისა, რომ ცოტა ხნის წინათ მომჯობინდა და ახალ გუნდში ჯერ დიდი სათამაშო დრო არ აქვს, "ასტონ ვილადან" "სიტიში" გადასული ფაბიან დელფი "პოსტზეა". საინტერესო სიახლეა ჯონჯო შელვის გამოძახება. ბევრისთვის ეს რატომღაც, მოულოდნელი გამოდგა, არადა, "სუონსის" შუახაზელი ძალიან კარგ ფორმაშია და ჰოჯსონიც მას ისევ აძლევს შანსს.
"ჯონჯო შელვი იმსახურებს ახალ შანსს, მას მოწვევა ეკუთვნის, რადგან სეზონი უაღრესად შთამბეჭდავად დაიწყო. როგორც ხედავთ, ძალიან დიდი არჩევანი გვაქვს, კიდევ ბევრი კანდიდატი და ტრავმირებული მოთამაშე არ უნდა დაგვავიწყდეს. ეს კარგია, ყველამ უნდა იბრძოლოს ნაკრებში თავისი ადგილისთვის და დაიმსახუროს იგი" - განაცხადა ჰოჯსონმა.
ვერ ვიხილავთ ჯორდან ჰენდერსონს, რისი მიზეზიც ყველასთვის ნაცნობია - ის დაშავებულია. ლაზარეთში იმყოფება მისი თანაგუნდელი ადამ ლალანა და ტრავმაა ჯეკ უილშირის არყოფნის მიზეზიც. სანაცვლოდ, მისი თანაკლუბელი ალექს-ოქსლეიდ ჩემბერლენი შეეცდება ორმაგად ასახელოს "არსენალი". ისევ იქნება ჯეიმს მილნერი, ოღონდ ამჯერად უკვე "ლივერპულის" ფეხბურთელის რანგში. აღარავის ახსოვს ანდროს თაუნსენდი, სამაგიეროდ, მისი თანაკლუბელი რაიან მეისონი ამჯერადაც განაცხადშია.
კიდევ ერთმა "ტოტენჰემელმა" ჰარი კეინმა ნაკრებში ადგილი არ დაკარგა, სათამაშო ფორმის დაკარგვის მიუხედავად. ახალგაზრდა თავდამსხმელისთვის ესეც დამატებითი წამქეზებელი უნდა გამოდგეს, რომ იგი ისევ ძველებურად ათამაშდეს. დანიელ სტარიჯი დაშავებულია, დენი უელბეკიც. დენი ინგსი "ენფილდზე" გადაბარგების მერე სათამაშო პრაქტიკის ნაკლებობას უჩივის. ჩარლი ოსტინი ჩემპიონშიპშიც აგრძელებს გოლების გატანას, მაგრამ გამოძახებას ვერ ეღირსა. საიდო ბერაჰინო გაურკვევლობაშია და ისე ვეღარ ბრწყინავს, ამიტომ ამ მოწვევის ნაკრებში არც ისაა. რიკი ლამბერტზე უკვე ლაპარაკიც ზედმეტია.
გუნდში ძველ-ახალი სახე ჯეიმი ვარდი იქნება. იგი შესანიშნავად ბურთაობს, მაგრამ "ლესტერის" თავდამსხმელის გამოძახებას დიდი მითქმა-მოთქმა მოჰყვა, რადგან სულ ცოტა ხნის წინათ იგი სკანდალში გაეხვა. მოგეხსენებათ, შეზარხოშებულმა ვარდიმ სამორინეში იაპონელს რასისტული ხასიათის შეურაცხყოფა მიაყენა, რისთვისაც მერე დიდი ბოდიშები იხადა.
იგი 40 ათასი გირვანქით დააჯარიმეს და აღმზრდელობით კურსზე დასწრებაც დაავალეს. მას მერე, რაც მხარეები ერთმანეთს შეხვდნენ და ვარდიმ თავის მსხვერპლს პირადადაც მოუბოდიშა, ისინი შეთანხმდნენ, რომ ფეხბურთელი დაზარალებულის მიერ არჩეულ საქველმოქმედო ორგანიზაციაში გადარიცხავდა თანხას.
ასეთი საკითხებისას ინგლისში როგორი მგრძნობიარეები არიან, თვით ჯონ ტერის მაგალითზეც გვახსოვს. თუმცა ჰოჯსონს ვარდი სჭირდება, მიიჩნევს, რომ ახლა ამ ფეხბურთელის ადგილი ნაკრებშია და შეცდომასაც მიხვდა და გაიაზრა.
თავდამსხმელთა კვოტით სიაშია თეო უოლკოტიც, მაგრამ რამდენად და რამდენს ითამაშებს იგი ფორვარდად, ეს უცნობია.
რასაკვირველია, უეინ რუნის ისევე ვერ ავცდებოდით, როგორც ნახევარდაცვაში შესაშურ ფორმაში შესულ ნორჩ როს ბარკლის (ის და სტოუნსი 21 წლისები და შესაბამისად, ყველაზე ახალგაზრდები არიან სიაში), ყველაზე გამოცდილ მაიკლ კერიკს (34 წლის მანჩესტერელი გამოძახებულთა შორის უხუცესია) და უძვირფასეს ინგლისელ ფხბურთელს, რაჰიმ სტერლინგს.
რუნი კიდევ ცალკე სასაუბრო თემაა: მოგეხსენებათ, მას ძალიან ცოტა აკლია იქამდე, რომ ინგლისის ნაკრების ყველა დროის საუკეთესო ბომბარდირი გახდეს. "შრეკის" აქტივში ახლა 47 გოლია და იგი ერთით ჩამორჩება გარი ლინეკერს. სან მარინო ნამდვილად არის ის მეტოქე, რომელთანაც უეინს ერთი-ორი გოლის გატანა შეუძლია და არც შვეიცარიელებთან არის მისი აქტიურობა გამორიცხული.
თანაც, 29 წლის თავდამსხმელისთვის პრემიერლიგა მძიმედ დაიწყო, პირობა კი დადო, 20 და მეტ გოლს გავიტან, თუ მთელი სეზონი ფორვარდად ვითამაშებო, მაგრამ ჯერ ერთიც არ გაუტანია და გაბრაზებულია. ამას ისიც ემატება, რომ გოლების დიდი ნაწილი მას სწორედ შესარჩევი ეტაპების მატჩებში გააქვს ხოლმე. ახლაც უკვე 6 მატჩში 5 ბურთს მოუყარა თავი და მხოლოდ უკვე ხსენებული, ამჟამად ტრავმირებული უელბეკი უსწრებს, რომელმაც 6-ჯერ გაიტანა.
ინგლისური ფეხბურთის მამებს უკვე მომზადებულიც კი ჰქონიათ ერთგვარი ჯილდო, რომელსაც რუნის გადასცემენ, რადგან ალბათობა იმისა, რომ ამ ორი შეხვედრის მერე იგი რეკორდსმენი გახდება, ძალიან დიდია.
თუმცა ეს მინი-ცერემონია ოქტომბერში იგეგმება, კერძოდ კი, 9 ოქტომბერს, როდესაც ინგლისი მორიგ საშინაო შეხვედრას ჩაატარებს ესტონეთის წინააღმდეგ. 12-ში კი "ლომები" ლიტვას ეწვევიან. აი, ასეთი ამბები და გეგმები აქვთ ჰოჯსონსა და მის ამალას.
ინგლისის ნაკრები
მეკარეები: ჯო ჰარტი (სიტი), ჯეკ ბატლენდი (სტოკი), ტომ ჰიტონი (ბარნლი)
მცველები: ნათანიელ კლაინი (ლივერპული), ლუკ შოუ (მანჩესტერი), კირან გიბსი (არსენალი), გარი კეჰილი (ინგლისი), კრის სმოლინგი (მანჩესტერი), ჯონ სტოუნსი (ევერტონი), ფილ ჯაგიელკა (ევერტონი)
ნახევარმცველები: მაიკლ კერიკი (მანჩესტერი), ჯეიმს მილნერი (ლივერპული), როს ბარკლი (ევერტონი), ჯონჯო შელვი (სუონსი), რაიან მეისონი (ტოტენჰემი), ალექს ოქსლეიდ-ჩემბერლენი (არსენალი), ფაბიან დელფი (სიტი), რაჰიმ სტერლინგი (სიტი)
თავდამსხმელები: უეინ რუნი (მანჩესტერი), ჰარი კეინი (ტოტენჰემი), ჯეიმი ვარდი (ლესტერი), თეო უოლკოტი (არსენალი)
ყოველდღიური სპორტული გაზეთი "ლელო"
