წარმოგიდგენიათ "რომა" ფრანჩესკო ტოტის გარეშე? - ან ფრანჩესკო ტოტი სხვა გუნდის მაისურით? - ვერც ჩვენ, მაგრამ ყველაფერს აქვს დასასრული და მათ შორის პუპონეს რომაულ კარიერასაც. ეს დასასრული აშკარად მოაახლოვა ლუის ენრიკემ, რომელსაც "რომა" ხანგრძლივი დროით ჩააბარს და ამას კლუბის მესვეურები არ მალავენ - ესპანელმა იტალიის დედაქალაქში ახალი "ბარსელონა" უნდა შექმნას, რომელიც არა მარტო აპენინებზე, ევროპის მასშტაბით საუკეთესო იქნება. ლუის ენრიკეს გეგმებში ფრანჩესკო ტოტი არ ჯდება, ეს აშკარაა და ამას უკვე აღარც თავად ფეხბურთელი მალავს. მოვუსმინოთ ტოტის და შემდეგ განვავრცოთ თემა:
ტოტის მიმართ კრიტიკამ მას შემდეგ იმატა, რაც "იუვენტუსთან" შეხვედრაში თერთმეტმეტრიანი გააფუჭა, მისმა გუნდმა კი გამარჯვების შესანიშნავი შანსი გაუშვა ხელიდან - რა გასაკვირია, რომ ყოველივე ამის შემდეგ, კაპიტანი შეხვედრის ანტიგმირად მოინათლა. ჟურნალისტები ლუის ენრიკეს შეეხმიანენ და სწორედ ტოტის შესახებ ჩამოუგდეს სიტყვა:
"ტოტი "რომას" ლეგენდაა და ეს ჩვენ ყველამ კარგად ვიცით - ამიტომ, მის აზრს უდიდეს პატივს ვცემ და რა თქმა უნდა, ვითვალისწინებ. თუმცა, ეს იმას არ ნიშნავს, რომ რადგან ტოტიმ მუდმივად ძირითად შენადგენლობაში იქნება. ფრანჩესკო გუნდისთვის საჭირო ფეხბურთელია, დღეს ასეა და რა იქნება ხვალ, რთული სათქმელია".
იტალიელი ჟურნალისტები დარწმუნებულნი არიან, რომ სეზონის დასრულების შემდეგ, ტოტის ისევე მოუწევს "რომადან" აბარგება, როგორც ალესანდრო დელ პიეროს "იუვენტუსიდან". ყველაფერი სწორედ აქეთკენ მიდის, რადგან ლუის ენრიკე ახალგაზრდა ფეხბურთელებზე აკეთებს აქცენტს, მათზე ვინც მოედანზე მთელი 90 წუთის განმავლობაში გაუჩერებლად ირბენს.
ტოტი საუკეთესო პერიოდშიც არ განეკუთვნებოდა იმ მოთამაშეთა კატეგორიას, რომლებიც გაუჩერებლად დარბიან და მით უმეტეს ვერ ირბენს 35 წლის ასაკში. მოკლედ, საქმეს ისეთი პირი უანს, რომ ტოტი დელ პიეროს კვალს დაადგება - ანუ, როგორც თავად ამბობს, სხვა გუნდში მოუწევს გადაბარგება. "პინტურიკიოს" მსგავსად, "პუპონეც" სხვაგან გადასვლაზე აკეთებს განცხადებას და არა კარიერის დასრულებაზე, ანუ, დიდია შანსი ვიხილოთ ის, რაც ვერ წარმოგვიდგენია და რაზეც თავშივე ვთქვით: ტოტი სხვა გუნდის მაისურით... მაინც სად შეიძლება გააგრძელოს კარიერა ფრანესკომ? - ამაზე თვითონ ისაუბრებს და ბოლოს, კიდევ ერთხელ გადავცეთ მას სიტყვა:
"ერთი დანამდვილებით ვიცი, ვერასდროს ვითამაშებ "რომას" წინააღმდეგ და გამომდინარე აქედან, იტალიურ გუნდში ნამდვილად არ გადავბარგდები. თუ მაინც მომიწევს "ჯალოროსიდან" წასვლა, კარიერას საზღვარგარეთ, ალბათ რომელიმე ევროპულ გუნდში გავაგრძელებ.
დიდი სიამოვნებით მოვსინჯავდი ძალებს ინგლისურ პრემიერლიგაში, თუმცა რომელ გუნდში, დღეს ამაზე საუბარი გამიჭირდება. ბოლოს კიდევ ერთხელ ვიტყვი, რომ ჩემი სურვილია კარიერა "რომაში" დავასრულო, მაგრამ მომეცემა თუ არა ამის საშუალება, დღეს რთული სათქმელია".
ყოველდღიური სპორტული გაზეთი "ლელო"
