პირველი, რაც აუცილებლად უნდა ვთქვათ, გახლავთ ის, რომ იტალიის თასის ნახევარფინალში "იუვენტუსისა" და "მილანის" დაპირისპირებას ვიხილავთ - თანაც, ამ ორი დიდი გუნდის ჯახი ორ-რაუნდიანი იქნება. პირველი შეხვედრა 8 თებერვალს "სან სიროზე" გაიმართება, განმეორებითი კი 21 მარტს "იუვენტუს არენაზე".
მოკლედ, წინ იტალიის ორი ყველაზე ტიტულოვანი გუნდის დაპირისპირება გველის და ისღა დაგვრჩენია, რომ ხელები მოვიფშვნიტოთ... თუმცა, იქამდე "მილანი"-"ლაციოს" მეოთხედფინალურ პაექრობაზე უნდა ვთქვათ ორიოდე სიტყვა, რომელმაც "სიენას", "ნაპოლის" და "იუვენტუსის" შემდეგ, მეოთხე ნახევარფინალისტი გამოავლინა.
მასიმილიანო ალეგრიმ ტრადიცია არ დააღვია და სათასო პაექრობაში ძირითადად
როგორც იქნა, მოედანს დაუბრუნდა კლარენს ზეედორფი, რომელმაც შუა ხაზს აშკარად შემატა კრეატივი. თავდასხმაში სტეფან ელ შაარავისა და რობინიოს ტანდემი ვიხილეთ, ანუ, ფილიპო ინძაგისთვის თასზეც კი აღარ გამოიძებნა ადგილი შემადგენლობაში.
ექესპერიმენტებს ედუარდო რეიამაც მიმართა, შემადგენლობა გადაახალისა და რაც ყველაზე საინტერესოა, ტაქტიკა შეცვალა - მართალია, მცირედით, მაგრამ მაინც... თუ აქამდე მუდმივად 4-3-1-2-ს იყენებდა, ამჯერად, 4-4-2 შეარჩია და ტრადიციულად გამთამაშებელი ერნანესი ცენტრალურ ნახევარმცველად გაამწესა. თადარიგში დატოვა მიროსლავ კლოზე, შეტევის წინა ხაზზე კი ჯიბრილ სისესა და ტომაზო როკის ტანდემი ვიხილეთ.
შეხვედრის დაწყებიდან სულ რაღაც 5 წუთი იყო გასული, როდესაც ჯიბრილ სისემ ანგარიში გახსნა და სტუმრები დააწინაურა. საგულისხმოა, რომ სისესთვის ეს მეორე გოლია რომაული გუნდის შემადგენლობაში და პირველიც სწორედ "როსონერის" კარში აქვს გატანილი. "მილანელები" მალევე მოეგნენ გონს და მეტოქის ნახევარზე დიდი ძალებით გადავიდნენ. ამან შედეგი მალევე გამოიღო - მე-15 წუთზე რობინიო საჭირო დროს საჭირო ადგილზე აღმოჩნდა და უძლიერესი დარტყმით სტუმართა კიპერი უშანსოდ დატოვა, 1:1.
სულ მალე, კლარენს ზეედორფმა გამოიჩინა თავი და მასპინძლები წინ გაიყვანა - ჰოლანდიელმა ერთ მეურვეს ოსტატურად აუარა გვერდი და ჩვეული დარტყმით ბურთი მეტოქის კარის ბადეში გაახვია, 2:0. ტაიმის ბოლომდე მილანელებს კიდევ შეეძლოთ გატანა, მაგრამ დამაგვირგვინებელ ფაზაში სცოდავდნენ.
მეორე ნახევარში თამაშის სურათი არ შეცვლილა, "მილანი" უფრო მწვავედ უტევდა და შეხვედრის უკანასკნელ წუთზე მესამე გოლის გატანაც მოახერხა. შედეგიანი დარტყმა ზლატან იბრაჰიმოვიჩის ანგარიშზეა, რომელიც ურბი ემანუელსონმა რომაელთა კიპერს პირისპირ შეატოვა.
ურბიც და ზლატანიც შეცვლაზე შევიდნენ მოედანზე და თავისი გასაკეთებელი ზედ საფინალო სასტვენის წინ გააკეთეს. ერთი სიტყვით, "მილანმა" მეტოქე უშანსოდ დაამარცხა და დამსახურებულად გავიდა ნახევარფინალში.
იტალიის თასი. 1/4 ფინალი
მილანი-ლაციო 3:1
გოლები: 0:1 სისე (5), 1:1 რობინიო (15), 2:1 ზეედორფი (18), 3:1 იბრაჰიმოვიჩი (84).
ნახევარფინალები
8 თებერვალი
მილანი-იუვენტუსი
სიენა-ნაპოლი
21 მარტი
იუვენტუსი-მილანი
ნაპოლი-სიენა
ყოველდღიური სპორტული გაზეთი "ლელო"
