მოკლედ, ვერა და ვერ დალაგდა სერია A-ს მიმდინარე გათამაშების ცხრილი - აი ესეა, როდესაც პირველივე ტური გადაიდება და ამით არეულობას დაიბედებ, მერე ყველაფრისთვის მზად უნდა იყო. ჯერ იყო და მთელი პირველი წრე, გუნდებს ტურის რიგოთობასთან ერთით ნაკლები თამაში ჰქონდათ ჩატარებული, 2011 წელი კი სულაც პირველმა ტურმა დახურა.
შემდეგ, თითქოს დალაგდა ყველაფერი, მაგრამ ძლიერი წვიმის გამო "კატანია"-"რომას" პაექრობა გადაიდო - უფრო სწორად, შეწყდა და გუნდებს დარჩენილი ნახევარი საათი აქვთ სათამაშო. ანუ, სიცილიურ და რომაულ გუნდებს თამაშით ნაკლები აქვთ ჩატარებული, თუმცა ვერც
XXI ტურმა კიდევ უფრო ჩახლართა ყველაფერი, ოთხი მატჩი გადაიდო, რამაც სატურნირო ცხრილს კიდევ უფრო ქაოსური სახე მისცა. მეტიც, ადრიანო გალიანი აქედანვე ითხოვს მომდევნო ტურში დაგეგმილი "მილანი"-"ნაპოლის" ჯახის გადადებას, რადგან სინოპტიკოსთან ვარაუდით, ლომბარდიის დედაქალაქში მოახლოებულ უქმეებზე დიდთოვლობა და ძლიერი ყინვა იქნება.
ავად თუ კარგად, სერია A მაინც გრძელდება და ჩვენც, ოთხშაბათს გამართულ, გნებავთ გადარჩენილ შეხვედრებზე მოგითხრობთ.
ცენტრალური პაექრობა რომში გაიმართა, სადაც 5 გრადუსი სითბო იყო და არ თოვდა, ეს კი სრულიად საკმარისი აღმოჩნდა იმისთვის, რომ თამაში გამართულიყო. ოლიმპიურ სტადიონზე მისულ 55 000-მდე გულშემატკივარს კი ნამდვილად არ უნანია უთოვლობა, რადგან მათმა საყვარელმა გუნდმა არც მეტი, არც ნაკლები 14-წლიანი ნავსი გატეხა - დიახ, "ლაციომ" "მილანს" ორი უპასუხო გოლი გაუტანა და წლების განმავლობაში დაუმარცხებელი მეტოქე ბეჭებზე გააკრა.
თამაში სტუმართა ტერიტორიული უპირატესობით წარიმართა, თუმცა მილანელებს ერთი ხეირიანი მომენტი რაა, ის არ შეუქმნიათ. უფრო სწორად, ერთი შექმნეს, თუმცა ისიც შეხვედრის უკანასკნელ წუთებზე, როდესაც ანგარიში უკვე 2:0 იყო რომაელთა სასარგებლოდ. ზლატან იბრაჰიმოვიჩმა გრძელი გადაცემის შემდეგ დაიმორჩილა ბურთი და დაარტყა კიდეც, თუმცა მიზანმა უმტყუნა.
იქამდე უფრო მწვავედ სწორედ მასპინძლები უტევდნენ და ჯერ კიდევ პირველ ტაიმში შეეძლოთ ანგარიშის გახსნა. მომენტებს აღარ მოვყვებით და პირდაპირ 76-ე წუთზე გადავხტებით, როდესაც ტომაზო როკიმ ბურთი ოსტატურად გაატარა და რასაც ერნანესის შესანიშნავი დარტყმა მოჰყვა - კრისტიან აბიატის ნახტომი ამაო გამოდგა და 1:0 მასპინძელთა სასარგებლოდ. სულ რამდენიმე წუთში, რომაელებმა იდენტური კომბინაცია გაითამაშეს, როკი ისევ გადაახტა ბურთს, ერნანესმა ისევ დაარტყა, მაგრამ ამჯერად მცირედით არაზუსტად.
შეხვედრის დასრულებამდე ხუთიოდე წუთით ადრე კი ყველა კითხვას გაეცა პასუხი - ახლო მანძილიდან ტომაზო როკიმ აბიატის კარის ახლო ცხრიანი დალაშქრა და შეხვედრის საბოლოო შედეგი დააფიქსირა, 2:0.
მატჩის შემდეგ, მასიმილიანო ალეგრიმ შემდეგი განაცხადა:
"ბოლო პერიოდში, ძალიან მოვუკელით და ვერ ვაჩვენებთ ისეთ ფეხბურთს, რამაც გასულ სეზონში სკუდეტო მოგვაგებინა. ეს კარგად უნდა გავიაზროთ და განვლილი მატჩებიდან სწორი დასკვნები გამოვიტანოთ. დარწმუნებული ვარ, მალე გამოვასწორებთ მდგომარეობას და დაკარგულ ქულებსაც ავინაზღაურებთ. მით უმეტეს, წინ კიდევ ბევრი თამაშია დარჩენილი. ამიტომ, ტურინელებს არ ვურჩევდი რომ მოდუნდნენ და სკუდეტო უკვე მოგებულად ჩათვალონ".
ანტონიო კონტეს ეგეთები არ ეშლება და ალეგრი სულ ტყუილად ნერვიულობს - "იუვეს" თავკაცი როგორც წესი ძალიან ფრთხილია და ვგონებთ, იქამდე არ დაძრავს სკუდეტოზე სიტყვას, სანამ თასს ჰაერში არ აღმართავს.
ჯერ კიდევ სამშაბათს, ტურინულ გრანდს "პარმასთან" უნდა გაემართა გასვლითი პაექრობა, მაგრამ დიდთოვლობის გამო, მატჩი გადაიდო. როგორც ზემოთ აღვნიშნეთ, ოთხშაბათს იგივე ბედი კიდევ ოთხმა შეხვედრამ გაიზიარა. სამაგიეროდ, თოვლს გაუძლო "ჯუზეპე მეაცას" გაზონმა, სადაც "ინტერი" "პალერმოს" დაუხვდა და იქ ამბები დატრიალდა, სიტყვებით ძნელი გადმოსაცემია...
მილანური მატჩის გოლები რომ სათითაოდ აღვწეროთ, ნახევარი გვერდი არ გვეყოფა - ამიტომ, მოკლედ ვთქვათ, რომ შეხვედრას ორი გმირი ჰყავდა: დიეგო მილიტო და ფაბრიციო მიკოლი. პირველმა პოკერი შეასრულა და კიდევ ერთხელ დაგვანახვა, რომ ნელნელნა, უფრო სწორად სწრაფ-სწრაფად ოპტიმალურ ფორმას იბრუნებს - აი მიკოლიმ კი მორიგი ფანტასტიკური შეხვედრა ჩაატარა და ერთი ისეთი გოლი გაიტანა, ისტორიას რომ შემორჩება: მარცხენა ფრთიდან არა ჩაწოდებულს, დარტყმულს გამოეხმაურა და ნახტომში თავით შეუცვალა ბურთს მიმართულება, რის შემდეგაც ანგარიში 3:3 გახდა.
მას შემდეგ, გუნდებმა კიდევ თითო გოლი გაცვალეს და საბოლოოდ, 4:4 იტალიური ფეხბურთის სასარგებლოდ. დიახ, კალჩოშიც ხდება ასეთი რამეები და არც თუ იშვიათად...
"უდინეზემ" "ლეჩეს" უმასპინძლა და მეტოქე მინიმალური ანგარიშით დაამარცხა, 2:1. უდინელთა შორის პირველი გოლი ახალწვეულმა, მიკელე პაციენცამ გაიტანა, ხოლო მეორე მარადიულმა მეგოლემ, ანტონიო დი ნატალემ. ფრიულელებმა უმნიშვნელოვანესი ქულები ჩაიწერეს აქტივში და "მილანს" კუდზე დააჯდნენ.
აქვე ვთქვათ, რომ "ნაპოლის" კრიზისი "ჩეზენასთან" საშინაო შეხვედრაში გაგრძელდა - დიდ ხანს უტრიალეს მასპინძლებმა სტუმართა კარს, მომენტებიც უხვად შექმნეს, მაგრამ ბურთმა არაფრით ინება "ჩეზენას" კარის ხაზის გადაკვეთა. ამრიგად, "ნაპოლი" კიდევ უფრო ჩამორჩა ლიდერებს და ალბათ, ვეღარც დაეწევა მათ. ვნახოთ, დანარჩენს მომავალი გვიჩვენებს.
იტალია. სერია A. XXI ტური
პარმა-იუვენტუსი გადაიდო
ბოლონია-ფიორენტინა გადაიდო
სიენა-კატანია გადაიდო
ატალანტა-ჯენოა გადაიდო
კალიარი-რომა 4:2
გოლები: 1:0 რიბეირო (6), 1:1 ჟუანი (13), 1:2 ბორინი (34), 2:2 პინილია (41), 3:2 რიბეირო (49), 4:2 ეკდალი (90).
ინტერი-პალერმო 4:4
გოლები: 0:1 მანტოვანი (17), 1:1 მილიტო (22), 1:2 მიკოლი (52), 2:2 მილიტო (55-პენ.), 3:2 მილიტო (61), 3:3 მიკოლი (66), 4:3 მილიტო (69), 4:4 მიკოლი (85).
ლაციო-მილანი 2:0
გოლები: 1:0 ერნანესი (76), 2:0 როკი (85).
ნაპოლი-ჩეზენა 0:0
უდინეზე-ლეჩე 2:1
გოლები: 1:0 პაციენცა (2), 1:1 დი მიკელე (26), 2:1 დი ნატალე (36).
ნოვარა-კიევო დღეს
სატურნირო ცხრილი
თ მ ფ წ ბ ქ
1. იუვენტუსი 20 12 8 0 33-13 44
2. მილანი 21 13 4 4 43-19 43
3. უდინეზე 21 12 5 4 31-17 41
4. ლაციო 21 11 6 4 32-19 39
5. ინტერი 21 11 3 7 34-25 36
6. რომა 20 9 4 7 31-25 31
7. ნაპოლი 21 7 9 5 36-24 30
8. პალერმო 21 8 4 9 30-31 28
9. ჯენოა 20 8 3 9 28-36 27
10. კალიარი 21 6 8 7 20-22 26
11. ფიორენტინა 20 6 7 7 20-17 25
12. პარმა 20 6 6 8 25-33 24
13. კიევო 20 6 6 8 16-25 24
14. კატანია 19 5 8 6 22-28 23
15. ატალანტა 20 7 8 5 24-25 23
16. ბოლონია 20 5 6 9 18-26 21
17. სიენა 20 4 7 9 21-22 19
18. ლეჩე 21 4 4 13 22-38 16
19. ჩეზენა 21 4 4 13 13-31 16
20. ნოვარა 20 2 6 12 18-40 12
შენიშვნა: ატალანტა -6 ქულა
ბომბარდირები
15 - იბრაჰიმოვიჩი (მილანი), დი ნატალე (უდინეზე); 12 - დენისი (ატალანტა), კავანი (ნაპოლი), კლოზე (ლაციო), მილიტო (ინტერი).
მომდევნო ტური
4 თებერვალი: ჩეზენა-კატანია, რომა-ინტერი; 5 თებერვალი: ჯენოა-ლაციო, პალერმო-ატალანტა, ლეჩე-ბოლონია, ნოვარა-კალიარი, კიევო-პარმა, იუვენტუსი-სიენა, ფიორენტინა-უდინეზე, მილანი-ნაპოლი.
ყოველდღიური სპორტული გაზეთი "ლელო"
