იტალიურ სპორტულ პრესაში გავრცელებული ინფორმაციის თანახმად, "ლაციო"-"ჯენოას" შეხვედრაში დაშავებული ტომაზო როკი მინიმუმ ერთ თვეს იუქმებს. არადა, ექიმების პირველადი დასკვნით, ტომაზო მაქსიმუმ ორ კვირაში უნდა გამოჯანმრთელებულიყო, მაგრამ ტრავმა უფრო სერიოზული გამოდგა.
34 წლის ფორვარდი სერია A-ს რამდენიმე შეხვედრას და პლუს ევროპა ლიგის პაექრობას გამოტოვებს, რომელიც "ლაციომ" მადრიდის "ატლეტიკოს" წინააღმდეგ უნდა გამართოს.
"ბიანკოჩელესტეს" მთავარი მწვრთნელი ედუარდო რეია მართლაც მძიმე მდგომარეობაშია - იმის მაგივრად, რომ რომაელებს ზამთრის სატრანსფერო პერიოდში შემადგენლობა გაეძლიერებინათ, პირიქით, დასუსტდნენ, რამაც შეიძლება ფატალური შედეგები გამოიღოს.
ჯიბრილ სისე ინგლისში გადაბარგდა, მართალია,
ბოლო პერიოდში, მიროსლავ კლოზესთან ტანდემში ტომაზო როკი თამაშობდა და ბედის ირონიით, მთელი თვით ჩამოშორდა ფეხბურთს. ანუ, რა გამოდის? - "ლაციოს" მთავარ მწვრთნელს კლოზეს სახით ერთადერთი მაღალი კლასის ფორვარდი ჰყავს და მასაც რომ რამე დაემართოს, რომაული გუნდი უთავდამსხმელოდ დარჩება. სწორედ ამ საკითხზე დაეკითხა "კორიერე დელო სპორტის" ჟურნალისტი ედი რეიას:
"ჩემი სურვილი იყო, რომ ზამთრის სატრანსფერო პერიოდში მინიმუმ სამი-ოთხი მაღალი კლასის ფეხბურთელი დაგვემატებინა, მაგრამ სამწუხაროდ, არ გამოვიდა.
დიდი იმედი მქონდა, რომ მოსკოვის ცსკა-დან კეისუკე ჰონდას გადავიბირებდით, მაგრამ ეს საქმეც ჩაიშალა. კლუბის ხელძღვანელები მაქსიმუმს აკეთებენ, რომ გუნდი კონკურენტუნარიანი იყოს, მაგრამ თავს ზემოთ ძალა არ არის. მსოფლიო ეკონომიკური კრიზისის პირობებში, შეუძლებელია ტრანსფერებში კოლოსალური თანხები დახარჯო".
რეია ყველანაირად ცდილობს, რომ კლუბის მესვეურებს კრიტიკა ააცილოს თავიდან, მაგრამ არ გამოსდის - მაღალი მიზნებისთვის მებრძოლი გუნდი ერთადერრთი ფორვარდის იმედზეა და ბუნებრივია, რომ ეს თემა აპენინურ სპორტულ პრესაში აქტიური განხილვის საგანია. ამ საკითხზე კლუბის სპორტულმა დირექტორმა იგლი ტარემ გააკეთა კომენტარი და ბოლოს, სწორედ მას მოვუსმინოთ:
"საკადრო პრობლემები ნამდვილად გვაქვს, შემადგენლობა გაძლიერებას საჭიროებს, მაგრამ ეს იმას არ ნიშნავს, რომ კლუბის ხელძღვანერლობა არაფერს აკეთებს. პრესა მუდმივად გვაკრიტიკებს და ამას ბოლო არ უჩანს, მაშინ, როდესაც "რომას" ახალ პროექტზე ყველა აღფრთოვანებით საუბრობს.
ჩახედეთ სატურნირო ცხრილს და ნახეთ, სად არის "ლაციო" და სად არის "რომა"... გასაგებია, რომ თანაქალაქელებს უფრო ახალგაზრდული შემადგენლობა ჰყავთ, მაგრამ ეს ბევრს არაფერს ნიშნავს - "არსენალს" ოცი წელია ახალგაზრდული შემადგენლობა ჰყავს, მაგრამ კაი ხანია აღარაფერი მოუგია".
ყოველდღიური სპორტული გაზეთი "ლელო"
