XXVIII ტურის ცენტრალური პაექრობა უდინეში გაიმართა და რადგან ეს მატჩი კვირას თბილისის დროით გვიან ღამით დაიწყო, მიმოხილვაში ვერ ავსახეთ. ამიტომ "უდინეზე"-"ნაპოლის" დაპირისპირებაზე ახლა უნდა ვთქვათ ორიოდე სიტყვა. მით უმეტეს, თამაში მართლაც სანახაობრივი, მეტად დრამატული და შესაბამისად, საინტერესო გამოვიდა.
ერთმანეთის პირისპირ ჩემპიონთა ლიგის მესამე საგზურისთვის მებრძოლი გუნდები წარსდგნენ და ეს ის შემთხვევა გახლდათ, როდესაც სასწორზე სამ ქულაზე ბევრად მეტი დევს. ამ უმნიშვნელოვანეს დაპირისპირებას ორივე გუნდი დანაკლისით შეხვდა, თუმცა უფრო მეტად მაინც ნეაპოლელები დაიჩაგრნენ, რომლებსაც ესეკილ ლავეცის გარეშე მოუხდათ ფონს გასვლა.
თუ
მატჩი მასპინძელთა ტერიტორიული უპირატესობით დაიწყო, რაც მალე სათამაშოში გადაიზარდა. შედეგად, ტაიმის შუაწელს უდინელებმა გახსნეს კიდეც ანგარიში - ნეაპოლელი პაოლო კანავარო უხეიროდ გაისარჯა და მისგან მოგერიებული ბურთი პირდაპირ ანტონიო დი ნატალეს მიუვიდა. ტოტომ დიეგო ფაბრინი ჩართო თამაშში. ამ უკანასკნელის ზუსტ გადაცემას კი ჯამპიერო პინცის გოლი მოჰყვა, 1:0.
უდინელებს ანტრაქტამდე კიდევ შეეძლოთ გატანა, მაგრამ დამაგვირგვინებელ ფაზაში სცოდავდნენ.
მეორე ნახევრის სტარტზე თამაშის სურათი არ შეცვლილა და ამ ყველაფერმა შედეგი მალევე გამოიღო - 52-ე წუთი მიმდინარეობდა, როდესაც ნეაპოლელთა კიპერმა მორგან დე სანკტისმა პირველი დარტყმული მოიგერია, თუმცა დამატებაზე ყველას ტოტო დი ნატალემ დაასწრო და ეფექტური გოლი გაიტანა, 2:0.
თითქოს ყველაფერი გადაწყდა, როდესაც ფაბრინიმ მეორე ყვითელი ბარათი მიიღო, თანაგუნდელები რიცხობრივ უმცირესობაში დატოვა და ინტრიგაც გააჩინა.
ნეაპოლელები დიდი ძალებით გადავიდნენ შეტევაში და სათამაშო უპირატესობა მოიპოვეს. მატჩის დასრულებამდე დაახლოებით 20 წუთი იყო დარჩენილი, როდესაც სტუმრებმა თერთმეტმეტრიანი გამოიმუშავეს და ნიშნულთან ედინსონ კავანი მივიდა - ურუგვაელმა ფორვარდმა ბურთი ცენტრში დაარტყა და სულ ტყუილად. მორგან დე სანკტისმა ბურთი უკუაგდო და ანგარიში უცვლელი დატოვა...
აი, აქ კი თითქოს უნდა დაეყარათ სტუმრებს ფარ-ხმალი, მაგრამ ასე არ მოხდა - პირიქით, კიდევ უფრო აქტიურად შეუტიეს, კავანიმ სულ მთლად გაიგიჟა თავი და 5-წუთიან მონაკვეთში ორჯერ დალაშქრა დე სანკტისის კარის ბადე - ჯერ საჯარიმო დარტყმა აქცია გოლად, შემდეგ კი მახვილი კუთხიდან აიღო უდინელთა კარი, 2:2.
ბოლო წუთები მეტად დაძაბული გამოდგა, მსაჯთან კამათი, გაწევ-გამოწევა და არეულობა - საბოლოოდ კი საყაიმო შედეგი, რამაც პირველ რიგში "კატანიასთან" დამარცხებულ "ლაციოს" წისქვილზე დაასხა წყალი.
ნამატჩევს ნეაპოლელთა შორის ყველაზე აქტუალური პერსონა დუბლის ავტორი გახლდათ - მოვუსმინოთ ედინსონ კავანის:
"შეხვედრის დიდი ნაწილი ძალიან ცუდად ჩავატარეთ და ჩვენივე ბრალია, რომ მარცხთან ახლოს ვიყავით. საბედნიეროდ, ბოლო მომენტში მოვიკრიბეთ ძალები და უმნიშვნელოვანესი ქულა ავიღეთ. ჩვენი მიზანი ჩემპიონთა ლიგის საგზურის მოპოვებაა და საამისოდ ყველაფერს გავაკეთებთ".
კინაღამ გამოგვრჩა, რომ მეორე ტაიმის მსავლელობისას არბიტრმა წითელი ბარათი უდინელთა მთავარ მწვრთნელს, ფრანჩესკო გვიდოლინსაც აუფრიალა - მატჩის შემდეგ "უდინეზეს" თავკაცი ემიციური გახლდათ და ბოლოს სწორედ მას გადავცეთ სიტყვა:
"არბიტრებზე ლაპარაკი არ მიყვარს, მაგრამ ფაქტია, რომ უკვე მერამდენედ დავიჩაგრეთ. თერთმეტმეტრიანი, წითელი ბარათები, უამრავი ჯარიმა ჩვენს საწინააღმდეგოდ და ამ ყველაფერმა შეხვედრის საბოლოო შედეგზე უდიდესი გავლენა იქონია.
თუმცა, არ იფიქროთ, რომ ყველაფერს მსაჯს ვაბრალებდე - შეცდომები მრავლად დავუშვით და ეს ჭკუის სასწავლებლად უნდა გამოვიყენოთ".
იტალია. სერია A. XXVIII ტური
უდინეზე-ნაპოლი 2:2
გოლები: 1:0 პინცი (28), 2:0 დი ნატალე (52), 2:1 კავანი (81), 2:2 კავანი (85).
გაძევება: ფაბრინი (60. უდინეზე).
რომა-ჯენოა 1:0
რომა (4-3-3): სტეკელენბურგი - ტადეი, კიაერი, ჰაინცე, ანხელი - გაგო (87. სიმპილისიო), დე როსი, გრეკო (74. მარკინიო) - ოსვალდო, ლამელა (58. ბოიანი), ბორინი.
ჯენოა (4-3-1-2): ფრეი - მორეტი, კარვალიო, კალაძე, მესტო - როსი (46. იანკოვიჩი), ველოზო, ბიონდინი - ბელუსკი (64. ხორკერა) - პალასიო, ჯილარდინო.
გოლი: 1:0 ოსვალდო (2).
გაფრთხილება: დე როსი - კალაძე, იანკოვიჩი.
კუთხური: 7-3; ჯარიმა: 9-9; თამაშგარე: 6-0; კარში დარტყმა: 15(8)-7(4); ბურთის ფლობა: 53%-47%.
მაყურებელი: 45 000
სატურნირო ცხრილი
ა თ მ ფ წ ბ ქ
1. მილანი 28 18 6 4 57-22 60
2. იუვენტუსი 28 14 14 0 44-17 56
3. ლაციო 28 14 6 8 42-34 48
4. ნაპოლი 28 12 11 5 52-30 47
5. უდინეზე 28 13 8 7 39-26 47
6. რომა 28 13 5 10 41-33 44
7. ინტერი 28 12 5 11 38-36 41
8. კატანია 28 10 11 7 36-35 41
9. ბოლონია 28 9 9 10 31-33 36
10. პალერმო 28 10 5 13 40-45 35
11. კიევო 28 9 8 11 24-35 35
12. ატალანტა 28 9 13 6 31-29 34
13. კალიარი 28 8 10 10 29-35 34
14. ჯენოა 28 9 6 13 35-49 33
15. სიენა 28 8 8 12 32-30 32
16. ფიორენტინა 28 8 8 12 27-33 32
17. პარმა 28 7 10 11 33-44 31
18. ლეჩე 28 6 8 14 31-45 26
19. ნოვარა 28 5 8 15 24-46 23
20. ჩეზენა 28 4 5 19 16-45 17
შენიშვნა: ატალანტა - 6 ქულა
ბომბარდირები
20 - იბრაჰიმოვიჩი (მილანი); 19 - დი ნატალე (უდინეზე); 18 - კავანი (ნაპოლი); 15 - დენისი (ატალანტა); 14 - პალასიო (ჯენოა), მილიტო (ინტერი).
მომდევნო ტური
25 მარტი: ატალანტა-ბოლონია, ლაციო-კალიარი, ნაპოლი-კატანია, ჯენოა-ფიორენტინა, იუვენტუსი-ინტერი, ნოვარა-ლეჩე, ჩეზენა-პარმა, მილანი-რომა, კიევო-სიენა, პალერმო-უდინეზე.
20 მარტი
იტალიის თასი. ნახევარფინალი. საპასუხო მატჩი
იუვენტუსი-მილანი 23.45 (2:1)
ყოველდღიური სპორტული გაზეთი "ლელო"
