სერია A-ს მე-16 ტურის ერთ-ერთი ცენტრალური შეხვედრა "სტადიო სან პაოლოზე" გაიმართა, სადაც "ნაპოლიმ" "ინტერი" მიიღო და მეტოქე დრამატულ ბრძოლაში დაამარცხა, 4:2. მატჩმა სრულად გაამართლა გულშემატკივართა მოლოდინი.სტუმრად სახლში
სანამ უშუალოდ თამაშზე, გოლებსა და სახიფათო მომენტებზე ვიტყოდეთ, მწვრთნელებზე უნდა გავამახვილოთ ყურადღება. ნეაპოლში ვალტერ მაცარი სტუმრის რანგში ჩავიდა, რაც უჩვეულო ამბავი გახლდათ. მთლიანობაში, "სტადიო სან პაოლომ" მწვრთნელი თბილად მიიღო - იყვნენ ისეთებიც, რომლებმაც უსტვინეს, მაგრამ უმეტესად მაინც ტაში ისმოდა.
ამან ვალტერს გული აუჩუყა და ამად იყო, რომ კარგა ხანს თავადაც ტაშს უკრავდა
ვალტერ მაცარი (ინტერი): "დიდი მადლობა გულშემატკივრებს, რომლებმაც ძალიან თბილად მიმიღეს და მაგრძნობინეს, რომ ჩემი გაკეთებული საქმეები ნეაპოლში დააფასეს. "ნაპოლის" ულტრასებთან ყოველთვის კარგი ურთიერთობა მქონდა და უკვე დავრწმუნდი, რომ მომავალშიც ასე იქნება, თუმცა დღეს "ინტერის" მთავარი მწვრთნელი ვარ და შესაბამისად, ძალიან დამწუხრებული მარცხის გამო. მით უმეტეს, ბურთს უმეტესად ჩვენ ვაკონტროლებდით, მეტსაც ვუტევდით, მაგრამ სახლში უქულოდ ვბრუნდებით.
ვამაყობ ჩემი შეგირდებით და მჯერა, რომ თუ ასე გავაგრძელებთ, იშვიათად წავაგებთ. ამის შესახებ ბიჭებს მატჩის დასრულებისთანავე ვუთხარი და ეს რწმენა მათშიც დავინახე".
რაფაელ ბენიტესი (ნაპოლი): "კარგ თამაშს ველოდებოდი და ჩემი მოლოდინი სრულად გამართლდა. "ინტერი" შესანიშნავი გუნდია, რაც კიდევ ერთხელ დაადასტურა, ჩვენი გამარჯვება კი მით უფრო დასაფასებელია. თუმცა, თქმა არ სჭირდება, რომ კიდევ ბევრ კომპონენტში გვაქვს მოსამატებელი - ბურთის უკეთ კონტროლია საჭირო, რადგან ჯერჯერობით კონტრშეტევაზე თამაში უფრო გვიადვილდება. რა თქმა უნდა, ეს არაა "ნაპოლის" მაქსიმუმი, ჩვენ გაცილებით უკეთ შეგვიძლია თამაში".
ყოველდღიური სპორტული გაზეთი "ლელო"
ასევე იხილეთ:
იტალია. სერია A. XVI ტური: "იუვემ" და "ფიორემ" გაინავარდეს [VIDEO]
