"ლივერპულის" იტალიელი თავდამსხმელი მარიო ბალოტელი თავის ეროვნულ ნაკრებს ევროპის 2016 წლის ჩემპიონატის შესარჩევ ციკლში, ხორვატიასთან შეხვედრაში ვერ დაეხმარება. სუპერმარიო ვერც მოგვიანებით - ალბანეთთან ამხანაგურ მატჩში ითამაშებს.იტალიური პრესის ინფორმაციით, ფორვარდმა 14 ნოემბერს გამართულ ვარჯიშზე კუნთი იტკინა და უკვე დატოვა "სკუადრა აძურას" საწვრთნელი ბანაკი.
ანტონიო კონტეს გუნდს სხვა დანაკლისიც აქვს - ნაკრებს უახლოეს მატჩებში ვერ ითამაშებს "იუვენტუსის" მცველი ანჯელო ოგბონაც, რომელსაც ტრავმა აწუხებს.
შეგახსენებთ, რომ იტალიისა და ხორვატიის ნაკრებთა შეხვედრა 16 ნოემბერს, მილანში გაიმართება.
