მარგარიტა ლუი დრეიფუსი მარსელის “ოლიმპიკის” სათავეში, შეიძლება ითქვას, შემთხვევით მოხვდა. ის პროვანსელთა კლუბის ლეგენდარული პრეზიდენტის რობერ ლუი დრეიფუსის მეუღლე იყო და მისი გარდაცვალების შემდეგ ყველანაირი საქმე გადაიბარა. მართალია, კლუბის საქმეებში ჩარევის მცდელობა ქალბატონს არასოდეს ჰქონია, მაგრამ პრეზიდენტი, რომელიც კლუბის თამაშებზეც კი იშვიათად დადის, გულშემატკივრებისთვის რთული შესაგუებელია.
მიმდინარე სეზონში დიდე დეშამის გუნდის წარუმატებელი სტარტის შემდეგ ქალბატონმა მარგარიტამ, როგორც ჩანს, კლუბის შენახვა ზედმეტ ფუფუნებად მიიჩნია და განაცხადა, ღირსეული წინადადების შემთხვევაში მას იოლად შეველევიო. ასეთი კომენტარი მან გაზეთ “ლე მონდის” კორესპონდენტთან საუბრისას გააკეთა.
გეტყვით, რომ “მარსელმა” ქალბატონი მესაკუთრისგან 20 მილიონი ევრო მიიღო ბიუჯეტის შესავსებად.
პროვანსელებმა იანვრისთვის ერთ ფეხბურთელს უკვე დაადგეს თვალი. ლაპარაკია 21 წლის შვედ განაპირა ნახევარმცველ ნიკლას ჰულტზე, ვინც ამჟამად სამშობლოში “ელფსბორგის” ღირსებას იცავს. კლუბთან გაფორმებული ხელშეკრულება ფეხბურთელს 2014 წლამდე აკავშირებს, ასე რომ, ფრანგებს ჯიბეზე ხელის გაკვრა მოუწევთ.
“ელფსბორგი” ნიკლასში 1 მილიონ ევროს ითხოვს. აქვე გეტყვით, რომ ჰულტმა შთამბეჭდავი სეზონი ჩაატარა შვედეთის ჩემპიონატში, სადაც 30 შეხვედრაში 7 გოლი გაიტანა და 4 საგოლე გადაცემა მიითვალა. ჩვენი აზრით, მხარეებს ტრანსფერზე შეთანხმება არ უნდა გაუჭირდეთ.
ყოველდღიური სპორტული გაზეთი "ლელო"
