ამ დღეებში ფრანგული პრესა წერდა, "პარი სენ-ჟერმენი" იანვარში "ლილს" ედენ აზარში 50 მილიონს გადაუხდის და ფეხბურთელს "წაართმევსო". აღნიშნულთან დაკავშირებით დედაქალაქური კლუბის ადმინისტრაციიდან განცხადება არავის გაუკეთებია, მაგრამ კვამლი უცეცხლოდ რომ არ ჩნდება, ეს მშვენივრად მოგეხსენებათ.
სამაგიეროდ ინფორმაცია ღიმილს ჰგვრის "ძაღლების" 47 წლის თავკაც რუდი გარსიას. "ეკიპის" ჟურნალისტმა მას კომენტარი სთხოვა და აი რა მიიღო პასუხად: "იქნებ ლუშენში "ლილის" საწვრთნელი ცენტრის მთლიანად ყიდვასაც აპირებენ, რათა თავიანთი "კამ ლე ლოჟის" ბაზა შეცვალონ? ამას გარდა იმედია შეისწავლიან ლა მანშის სრუტის ქვეშ გამავალი გვირაბის პარიზამდე
ორიოდე დღის წინ შემოგთავაზეთ მიშელ პლატინის კომენტარი პსჟ-ში დევიდ ბექჰემის ტრანსფერის შესახებ, სადაც უეფას პრეზიდენტი ამბობდა, ინგლისელის გადაბირება უფრო მეტად მარკეტინგული სვლაა, ვიდრე საფეხბურთოო. ანალოგიურად ფიქრობს კიდევ ერთი ლეგენდარული ფრანგი ლორან ბლანიც. "პარი სენ-ჟერმენში" აზარის გადასვლა მართლა კარგი ინფორმაცია იქნება, - განუცხადა საფრანგეთის ნაკრების დამრიგებელმა "ფრანს ფუტბოლს". - რაც შეეხება ბექჰემს, ყველასთვის ცხადია, რომ ეს გარიგება მხოლოდ კომერციული ხასიათის არის.
სპორტული კუთხეზე აქ სალაპარაკოც კი არაფერია. თუმცა დარწმუნებული ვარ, რომ ბექზის მაისურები მშვენივრად გაიყიდება. პარიზში ძლიერი გუნდი ყალიბდება და მთავარი მწვრთნელისთვის ალბათ ძნელი იქნება კლუბის ხელმძღვანელობის სურვილისთვის წინააღმდეგობის გაწევა, გუნდში ახალი და ახალი ფეხბურთელები მოიყვანონ".
რახან ლაპარაკი ბექჰემსა და მაისურებზე ჩამოვარდა, ბარემ აქვე მოკლედ გეტყვით, რომ "პარი სენ-ჟერმენის" ალბათ მომავალი ფეხბურთელის მეუღლემ, ყოფილმა მომღერალმა და მოქმედმა დიზაინერმა ვიქტორია ადამსმა 2011 წლის განმავლობაში საკუთარი სამოდელო სახლის წყალობით 95,5 მილიონი დოლარის შემოსავალი მიიღო.
განსაკუთრებით მომგებიანი გახდა კომპანია ვიქტორიას მიერ საშუალო ფასიანი ხაზის გაშვების შემდეგ, სადაც ტანსაცმლის ღირებულება 550-დან 900 დოლარამდე მერყეობს. როგორც ამბობენ, შარშანდელთან შედარებით ვიქტორიას შემოსავალმა 70%-ით მოიმატა. ამას დაუმატეთ დევიდის შემოსავლებიც და შესაბამისად არ გაგიკვირდებათ თუ გეტყვით, რომ "ფორბსის" მონაცემებით ისინი ყველაზე შემოსავლიან წყვილთა შორის მსოფლიოში მე-4 ადგილზე გავიდნენ.
ყოველდღიური სპორტული გაზეთი "ლელო"
