“მარსელის” სპორტულმა დირექტორმა ჟოზე ანიგომ მცირე ინტერვიუ მისცა ფრანგულ პრესას, სადაც მომავალ სეზონში პროვანსელების პერსპექტივებზე გულწრფელად ილაპარაკა. მასალას მონოლოგის სტილში შემოგთავაზებთ. - სტეფან მ’ბიასაც და სესარ ასპილიკუეტასაც აქვთ “მარსელიდან” წასვლის შანსი. ჩვენ ფინანსურად შეზღუდულები ვართ და გადაწყვეტილებას უშუალოდ კლუბში კი არ ვიღებთ, არამედ ამას “მარსელის” მთავარი აქციონერი აკეთებს. ჩვენ ისღა დაგვრჩენია, პატივი ვცეთ მის ნებას. დიახ, მ’ბიაც და ასპილიკუეტაც შესაძლოა წავიდნენ. სესარს აქვს შანსი, რომ რომელიმე დიდ კლუბში გადავიდეს. თუკი გრანდში არ გააგრძელებს კარიერას, უმჯობესია, დარჩეს. ვაღიარებ, ფინანსურად დიდი პრობლემები
გუნდთან ელი ბოპის ადაპტაცია კარგად მიდის. ეს არის ადამიანი, ვისაც იოლად ეხერხება დიალოგი, აზრთა გაცვლა-გამოცვლა. ვფიქრობ, მას არ გაუჭირდება გუნდის გაძღოლა ჩემპიონატის განმავლობაში. იმედი მაქვს, სამწვრთნელო კარიერაში ამხელა პაუზის შემდეგ ის უფრო მონდომებული იქნება. ბოპს ფეხბურთელებს შორის ზოგადად კარგი ატმოსფერო დახვდა. გუნდთან ერთად ემზადება პიერ-ანდრე ჟინიაკიც. ვარჯიშებზე ჯერჯერობით კარგად გამოიყურება, თუმცა ვერ გეტყვით, თამაშებშიც რეგულარულად გაიტანს თუ არა. ყველაფერი მხოლოდ მასზე დამოკიდებული ხომ არ არის.
“პარი სენ-ჟერმენს” შეუძლია ლიგა 1-ის ინტრიგა იოლად დაასამაროს. დადებით გავლენას მოახდენს თუ არა ეს ფრანგულ ფეხბურთზე? არც კი ვიცი, რა გიპასუხოთ. თუმცა უცნაური ისაა, რომ ფრანგულ კლუბს პრაქტიკულად ფრანგი ფეხბურთელების გარეშე ვხედავ, ყოველ შემთხვევაში ძირითად შემადგენლობაში. მგონი, მსგავსი რამ პირველად ხდება. ყველაფერს გავიღებთ, რომ “პარი სენ-ჟერმენს” მაქსიმალური წინააღმდეგობა გავუწიოთ. დედაქალაქელთა ახალწვეულებს ჯერ კიდევ მოუწევთ ჩვენებურ რეალობასთან შეგუება. მათთვის პატარა მატჩებიც კი შეიძლება დიდ პრობლემებად იქცნენ.
ყოველდღიური სპორტული გაზეთი "ლელო"
