მიუხედავად არცთუ იდეალური კლიმატური პირობებისა (პარიზში თოვდა), შეხვედრამ მოლოდინი ბოლომდე გაამართლა. ფრანგული ფეხბურთის კლასიკა ძალიან სანახაობრივი და დაძაბული გამოდგა. მატჩის დაწყების წინ მოედნის ცენტრში ლეგენდარული რონალდო გამოჩნდა, რომელსაც ზლატან იბრაჰიმოვიჩმა პსჟ-ის 9-ნომრიანი მაისური გადასცა. შეხვედრის ერთ-ერთი გმირი სალვატორე სირიგუ გახდა, რომელმაც რამდენიმე რთული ბურთი მოიგერია და საკუთარი გუნდი არაერთხელ იხსნა. იტალიელი მეკარე ძირითადად მეორე ტაიმში დაიტვირთა, იქამდე კი უპირატესობას მასპინძლები ფლობდნენ.
ანგარიშის გახსნა უკვე მეორე წუთზე ესეკილ ლავეცის შეეძლო, მაგრამ არგენტინელს სტივ მანდანდა გადაეღობა. მე-11 წუთზე არ გაუმართლა ნიკოლას ნკულუს
"ოლიმპიკს" პსჟ-ის კარში გოლი ზედიზედ 13 შეხვედრაში ჰქონდა გატანილი და წარმატებული სერიის გაგრძელებასთან ელი ბოპის გუნდი საკმაოდ ახლოს იყო, მაგრამ სირიგუ კვირას საოცრებებს სჩადიოდა. განსაკუთრებით კარგი მომენტები ფუედ კადირის და მატიო ვალბუენას ჰქონდათ, მაგრამ იტალიელი მეკარე ბრწყინვალედ თამაშობდა.
მეორე გოლის გატანა შეეძლოთ ხავიერ პასტორეს და ესეკილ ლავეცისაც, მაგრამ ვიზავის არც მანდანდა ჩამორჩა.
მატჩის ერთ-ერთი ღირსშესანიშნავი მომენტი 75-ე წუთზე დადგა, როდესაც პასტორეს ნაცვლად მოედანზე დევიდ ბექჰემი გამოჩნდა. საინტერესოა, რომ ინგლისელი პსჟ-ის ისტორიაში მე-400 ფეხბურთელი გახდა და მან თავი სადებიუტი მატჩშივე გამოიჩინა. სწორედ ბექჰემმა წამოიწყო საგოლე შეტევა, რომელიც ჟერემი მენეზმა გააგრძელა და ზლატან იბრაჰიმოვიჩმა დააგვირგვინა. ეს ყველაფერი შეხვედრის ბოლო წუთზე მოხდა და მატჩიც მალე დასრულდა.
აქვე გეტყვით, რომ ეს გუნდები ერთმანეთს კიდევ ერთხელ ოთხშაბათს, უკვე საფრანგეთის თასის ეგიდით შეხვდებიან.
მატჩის შემდეგ გუნდების მწვრთნელები განსხვავებულ განწყობაზე იყვნენ.
კარლო ანჩელოტი (პარი სენ-ჟერმენი): "საკმაოდ რთული მატჩი გამოვიდა, რომელშიც ძალიან მნიშვნელოვანი გამარჯვება მოვიპოვეთ. ამ სამ ქულას დიდი ფასი აქვს, რადგან "მარსელთან" სხვაობა 8 ქულამდე გავზარდეთ. მეტოქემ სერიოზული პრობლემები შეგვიქმნა, მაგრამ გოლის გატანის შანსები ჩვენც გვქონდა. ბექჰემმა დღეს ითამაშა, რადგან მზად იყო, ხოლო ზოგიერთ ფეხბურთელს დასვენება სჭირდებოდა. ოთხშაბათს დევიდმა შესაძლოა ძირითადში ითამაშოს".
ელი ბოპი (მარსელი): "იმედგაცრუებული ვარ, რადგან ანგარიში უნდა გაგვეთანაბრებინა. საკმაოდ კარგად ვითამაშეთ, ნახევარდაცვაში არაერთი ბურთი მოვიგეთ და სახიფათოდაც ვუტევდით. დამაგვირგვინებელ ფაზაში მეტი სიზუსტის და ცივსისხლიანობის გამოჩენა გვმართებდა. შედეგი დამაკმაყოფილებელი არაა, მაგრამ ჩემი ფეხბურთელების გამოსვლით კმაყოფილი ვარ. ჯერ არ ვიცი, ოთხშაბათს როგორი შემადგენლობით ვითამაშებთ, რადგან დღეს ბევრი ფეხბურთელი დაიღალა და ყველაფერი მათ მიერ კონდიციების სწრაფად აღდგენაზე იქნება დამოკიდებული".
ციფრი 400 კიდევ ერთხელ უნდა ვახსენოთ. თუ ბექჰემი პსჟ-ის ისტორიაში მე-400 ფეხბურთელი გახდა, სილვენ არმანმა ლიგა 1-ში მე-400 შეხვედრა ჩაატარა (118 "ნანტში", 282 "პარი სენ ჟერმენში"). ვეტერანი მცველი კმაყოფილი იყო:
"დღევანდელი კლასიკა, ალბათ, საუკეთესო პსჟ-"მარსელი" იყო. ძალიან მნიშვნელოვანია, რომ ეს მატჩი მოვიგეთ, თანაც ეს ყველაფერი ჩემთვის საიუბილეო, მე-400 შეხვედრაში მოხდა. ამაზე უკეთეს იუბილეზე ნამდვილად ვერ ვიოცნებებდი," – განაცხადა არმანმა.
ყოველდღიური სპორტული გაზეთი "ლელო"
ასევე იხილეთ:
დევიდ ბექჰემი: ეს საღამო განსაკუთრებული იყო ჩემთვის
