ურუგვაი-მექსიკა 1:0ურუგვაი: მუსლერა, მ. პერეირა, ლუგანო, კოატესი, ა. პერეირა, რიოსი, პერესი, როდრიგესი (83. ეგურენი), გონსალესი (68. ლოდიერო), ფორლანი (89. აბრეუ), სუარესი.
მექსიკა: მიჩელი, მიერი, არაუხო, რეინოსო, აგუილარი (46. აქუინო), რეიესი, ენრიკესი, ჩავესი, პონსე (70. პაჩეკო), ჯ. დოს სანტოსი (46. პერალტა), ლუგო.
გოლი: 1:0 ალვარო პერეირა (14)
მატჩის საუკეთესო ფეხბურთელი: დიეგო ფორლანი (ურუგვაი)
ლა პლატაში ურუგვაიმ მექსიკას მოუგო და მეოთხედფინალში არგენტინას ხვდება. შეხვედრის ერთადერთი გოლი მე-14 წუთზე ალვარო პერეირამ გაიტანა. მისი წყალობით ურუგვაელებმა C ჯგუფში ჩილეს შემდეგ მეორე ადგილი დაიკავეს.
ურუგვაელებმა, დიეგო ფორლანმა და ნიკოლას ლოდეირომ ძელს გაარტყეს ბურთი, მექსიკელ რაფაელ მარკეს ლუგოს კი გოლი არ ჩაუთვალეს - თანამსაჯმა ალამი აღმართა, თამაშგარეაო.
თამაში ურუგვაელთა ინიციატივით დაიწყო, მექსიკას კი, სავარაუდოდ, კონტრშეტევაზე თამაში თავად ჰქონდა გეგმაში. როგორც მოგახსენეთ, მატჩის ერთადერთი გოლი შეხვედრის დასაწყისშივე გავიდა. ეს პერეირას მეორე შედეგიანი დარტყმა გახლდათ მიმდინარე „კოპა ამერიკაზე“. წარმატებას მან, ამჟამად, მას მერე მიაღწია, რაც ფორლანის დარტყმული ბურთი მეკარე ლუის მიჩელმა მოიგერია, რასაც მექსიკელთა საჯარიმოში არეულობა მოჰყვა. ზუსტად ერთ წუთში ფორლანმა შორეული დარტყმით კინაღამ გაზარდა ანგარიში, მაგრამ მიჩელმა ამ ჯერზე საქმეს თავი ჩინებულად გაართვა. 25-ე წუთზე კი ხიფათი უკვე მოედნის მეორე ბოლოში შეიქმნა, როდესაც ჯოვანი დოს სანტოსმა მარცხენა ფრთიდან მოხერხებული გარღვევის შემდეგ დაბლა და ძლიერად დაარტყა, მაგრამ ურუგვაელმა მეკარე ფერნანდო მუსლერამ იყოჩაღა. თუმცა, ხუთი წუთის შემდეგ გოლი კინაღამ ისევ მიჩელის კარში გავიდა: მახსი პერეირაც ჩაწოდებულ ბურთს მცველმა ჰირამ მიერმა ვერ უხელთა და ფორლანმა ძელს გაარტყა ბურთი. ამ ამბიდან ექვსი წუთი რომ გავიდა ლუის სუარესმა შორიდან სცადა ბედი, დაარტყა, მაგრამ მიჩელმა ბურთი თითის წვერებით კუთხურზე გადააგდო.
შესვენებისას მექსიკელებმა დოს სანტოსი გამოცვალეს, რამაც მათ შეტევას აშკარად დააკლო ძალა. რაც შეეხება ურუგვაიელებს, მათ შესვენების შემდეგაც ეპყრათ ინიციატივა და სახიფათო მომენტებსაც ხშირად ქმნიდნენ, მაგრამ მუხლნატკენი ედინსონ კავანის არყოფნის გამო თუ რაიმე სხვა მიზეზით, გოლის გატანა ვეღარ შეძლეს. რამდენიმე კუთხურის დროს თავურის დარტყმა რკისტიამ როდრიგესმა სცადა, მაგრამ მეკარე მიჩელს ამ ეპიზოდებში საყვედური არ ეთქმოდა. კიდევ, 64-ე წუთზე იყო ერთი თვალშისაცემი მომენტი, როდესაც სუარესმა ფორლანს მიაწოდა საგოლე პასი, მან კი ბურთი კარს გადააცილა. ორ წუთში „ლივერპულის“ თავდამსხმელმა თავად ააცილა, შემდეგ ისევ ფორლანის ჯერი დადგა, მაგრამ მისი დარტყმა მოიგერიეს, ხეირიანად ვერ დაუმიზნა დიეგო პერესმაც, თამაშის დასრულებამდე 13 წუთით ადრე კი ლოდეირო გახდა მეორე ურუგვაელი, რომელმაც ძელს მოარტყა ბურთი.
და ბოლოს იმ ეპიზოდის შესახებ, ზემოთ რომ მოგახსენეთ: მე-80 წუთზე ყველას ეგონა, რომ მექსიკამ გაათანაბრა. ედგარ პაჩეკოს მიერ ჯარიმიდან ჩაწოდებული ბურთი მარკეს ლუგომ ურუგვაელთა კარში შეაგდო, მაგრამ თანამსაჯმა ოფსაიდი აღმართა.
მატჩის საუკეთესო ფეხბურთელად ტელემაყურებელმა და იმავდროულად ინტერნეტის მომხმარებელმა ფორლანი დაასახელა. სტატისტიკა მეტყველებს, რომ „ატლეტიკოს“ ვარსკვლავმა კარში რვაჯერ დაარტყა, თუმცა ამაზე მთავარი მისი პასები გახლდათ - ფორლანმა ამ შეხვედრაში თანაგუნდელებს 47 პასი გადააწოდა და ორჯერ ფლანგიდანაც სწორად ჩაჰკიდა.
ოსკარ ტაბარესი, ურუგვაის ნაკრების მწვრთნელი: „თამაშის წინ არასდროს არაფერია ცნობილი. ამჯერადაც, ერთადერთი, რისი თქმაც შეიძლებოდა ის იყო, რომ მექსიკა ძლიერი გუნდი, რთული მოწინააღმდეგეა. სულერთია, „კოპა ამერიკაზე“ ხვდები თუ სხვა შეჯიბრებაში, მასთან თამაში ძნელია“.
შაბათს კი სანტა ფეს „ბრიგადიერ ლოპესზე“ ურუგვაი არგენტინას ხვდება...
„შარშანდელი მსოფლიოს ჩემპიონატი და ურუგვაის ის გუნდი უნდა დავივიწყოთ. „კოპა ამერიკასადმი“ დიდი პატივისცემის მიუხედავად, მსოფლიოს ჩემპიონატი უფრო პრესტიჟული შეჯიბრებაა და გუნდებს იქ უფრო დიდი მოტივაცია აქვთ. თუმცა, ჩვენ მაინც გამარჯვება გვინდა. თუ ჩვენ არგენტინას დავამარცხებთ, ჟურნალისტები დაწერენ, რომ ურუგვაი იმ დონეს დაუბრუნდა, სამხრეთ აფრიკაში მუნდიალზე რომ აჩვენებდა.
ვფიქრობ, ეს მთლად მართალი მაინც არ იქნება. ჩვენ ჯერ ვერ ვთამაშობთ ისე, როგორც გვინდა და გვჩვევია. ფეხბურთელთა ჯგუფი იგივეა, სამხრეთ აფრიკაში თავი, რომ გამოიჩინა, მაგრამ ვფიქრობ, სწორედ ახლა რთულ პერიოდს გავდივართ. თუმცა, ვიმეორებ, ჩვენ გამარჯვების ჟინითაც ვართ ანთებული“, - დასძინა ტაბარესმა.
ყოველდღიური სპორტული გაზეთი "ლელო"
