ბოლო ორი წელიწადია, რაც მთელი საფეხბურთო სამყარო ამ ბიჭზე საუბრობს - 20 წლის ნეიმარი ხომ უკვე თავისი კლუბის "სანტოსისა" და ბრაზილიის ნაკრების ლიდერია. ნეიმარის უახლოესი გეგმა ლონდონის ოლიმპიადას უკავშირდება, სადაც ხუთგზის მსოფლიოს ჩემპიონი ბრაზილია ერთი დიდი უსამართლობის აღმოფხვრას შეეცდება - ბრაზილიის ნაკრებს ოლიმპიადა არასოდეს მოუგია.
რა საკვირველია, ეს ყველაფერი პრელუდიაა 2014 წლის მუნდიალისთვის, რომელიც ნეიმარის სამშობლოში გაიმართება.
- ბავშვობაში თუ უყურებდით ოლიმპიურ თამაშებს და თუ შედიოდა თქვენს გეგმებში ლონდონის ოლიმპიადა?
- ოლიმპიადას ხშირად ვუყურებდი და მხოლოდ საფეხბურთო მატჩებს არა. ჩემი
- საინტერესოა, ფეხბურთელები სხვა სახეობის სპორტსმენებთან თუ იკონტაქტებთ?
- რას ამბობთ, ერთი სული მაქვს, როდის ვნახავ ლებრონ ჯეიმსს და უსაინ ბოლტს, სხვებსაც. ჩათვალეთ, რომ ერთ-ერთ ფანად მივდივარ, უამრავ ფოტოსაც გადავიღებ და ავტოგრაფებსაც ავიღებ.
- ფიქრობთ, რომ ბრაზილიას ახლა უკეთესი შანსი აქვს გამარჯვების, ვიდრე წინა ოლიმპიადებზე?
- ჩვენ ყველაფერი მოვიგეთ და ახლა ოლიმპიური ოქრო გვსურს. ბრაზილია ყველგან ფავორიტია, მნიშვნელობა არა აქვს რა ტურნირზე თამაშობს ის. კარგი ნაკრები გვყავს, ძალიან პერსპექტიული, დიდი პოტენციალით.
- ამხანაგურმა მატჩებმა რა შთაბეჭდილება დატოვა თქვენზე, ხართ საბრძოლველად მზად?
- ერთი-ორი მწარე მარცხი ვიგემეთ, 0:2 მექსიკასთან, 3:4 არგენტინასთან. არგენტინელებს ფანტასტიკური გუნდი ჰყავთ და ჩვენ მათ კინაღამ ვაჯობეთ. ახლა ვარჯიშებზე რამდენიმე დეტალის დახვეწა გვმართებს.
- ალბათ ამ ოლიმპიადაზე თქვენზე ბევრი იქნება დამოკიდებული, მზად ხართ?
- ვფიქრობ, ნაკრებში ყველა საჭირო ფეხბურთელია და ყველა მნიშვნელოვანი. ჩვენ 18-ივეს გვმართებს ერთად დგომა და გუნდური თამაში, რათა წარმატებას მივაღწიოთ.
- ამხანაგური მატჩებისას პირველად მოგიწიათ ბრაზილიიდან ამდენი ხნით გასვლა, არის დიდი სხვაობა?
- საზღვარგარეთ უფრო მეტი ხალხი მცნობს ქუჩაში. მოედანზე უფრო მეტ ყურადღებას მითმობენ მეტოქეები და თავის გამოჩენაც უფრო ჭირს, მაგრამ ამას აუცილებლად უნდა მივეჩვიო და გუნდისთვის ვიმუშავო.
- ტვიტერით აღფრთოვანებულმა მიულოცეთ ანდრეს ინიესტას ევრო 2012-ის საუკეთესო ფეხბურთელად გახდომა. ტურნირს თუ უყურეთ და რა შთაბეჭდილება დატოვა ჩემპიონატმა თქვენზე?
- ისეთივე მაღალი დონის გამოდგა, როგორც მუნდიალი. მხოლოდ ორი რამ აკლდა ევროს: ჩვენ და არგენტინის ნაკრებები. ესპანეთის ნაკრები ძალიან, ძალიან ძლიერია.
- ხშირად კამათობენ, თქვენს მომავალზე, რა სჯობს კარიერისთვის, ახლავე ევროპაში წასვლა თუ მოცდა?
- ევროპაში სულ სხვა ფეხბურთია, ბრაზილიაში - სხვა. ევროპულ ფეხბურთს რომ შეეგუო დრო და შრომაა საჭირო.
- სხვა მოქმედი ფეხბურთელებიდან ვინ მოგწონთ?
- ძალიან მომწონს ინიესტა, ის სენსაციური ფეხბურთელია. კრიშტიანო რონალდოც ძალიან კარგი ფეხბურთელია და მიყვარს მესუთ იოზილის თამაშიც ყურება. გერმანელის დიდი ფანი ვარ.
ყოველდღიური სპორტული გაზეთი "ლელო"
