ჯოვანი ვან ბრონკჰორსტისგან უარის მიღების შემდეგ ჰოლანდიის ნაკრების ახალმა მთავარმა მწვრთნელმა ლუის ვან გაალმა მიზანი ახლა პატრიკ კლუივერტისკენ მიმართა და როგორც ჩვენი ჰოლანდიელი კოლეგები წერენ, ყოფილ შეგირდს ასისტენტობა შესთავაზა. კლუივერტი ახლა "ტვენტეში" მუშაობს და ენსხედურმა კლუბმა კვირას გაზეთ "დე ტელეგრააფს" დაუდასტურა, რომ პატრიკმა ჰოლანდიის საფეხბურთო კავშირისგან მართლაც მიიღო წინადადება და ახლა ფიქრობს, დათანხმდეს თუ არა ვან გაალის ასისტენტად მუშაობას.
"ვფიქრობთ, ეს მისთვის კარგი გამოწვევაა და თუ კლუივერტი ვან გაალის ასისტენტად მუშაობას დათანხმდება, დიდი გამოცდილების მიღების შესაძლებლობა მიეცემა, რის გამოც თანახმა
პატრიკ კლუივერტი ახლა "ტვენტეს" ახალგაზრდული გუნდის თავკაცია და გასულ სეზონში "იონგ ტვენტეს" ჰოლანდიის ჩემპიონობა მოაპოვებინა.
ლუის ვან გაალს მის კარიერაში უდიდესი როლი აქვს: დღეს უკვე 36 წლის კლუივერტმა 1995 წელს ჩემპიონთა ლიგა სწორედ იმ "აიაქსთან" ერთად მოიგო, რომელსაც ვან გაალი წვრთნიდა. თანაც, ფინალში "მილანს" გადამწყვეტი გოლი სწორედ პატრიკმა გაუტანა. საინტერესოა ისიც, რომ ვან გაალმა კლუივერტი მერე "ბარსელონაშიც" წაიყვანა.
ერთი სიტყვით, თუ ჩვენს ჰოლანდიელ კოლეგებს დავუჯერებთ, კლუივერტის ვან გაალის ასისტენტად დანიშვნა გადაწყვეტილია. ჰოლანდიის საფეხბურთო კავშირში ლუისის თანაშემწის ოფიციალურად წარდგენას 10 აგვისტოს აპირებენ.
ყოველდღიური სპორტული გაზეთი "ლელო"
