კურასაო, მარტინიკა, ახალი კალედონია და ლაოსი ევროპის ტოპდივიზიონებში.ევროპის საუკეთესო ხუთ ჩემპიონატში არიან ლეგიონერები ეგზოტიკური, არასაფეხბურთო ქვეყნებიდან.
ფეხბურთში ეგზოტიკა ტკბილი ლუკმაა. დღევანდელი ჩვენი წერილი სწორედ ამ ფეხბურთელებს ეხებათ.
კუკო მარტინა, კურასაო
საუთჰემპტონი, 26 წლის, მარჯვენა მცველი
კუკო მარტინა როტერდამში დაიბადა. თამაშობდა ჰოლანდიის ყველა ასაკობრივ ნაკრებში. "ფეიენოორდში" მისი ადგილი არ მოიძებნა. მან კარიერა ჰოლანდიის რანგით მეორე ლიგაში დაიწყო და ერთ დღესაც "ტვენტეში" ჩაირიცხა.
ამ ზაფხულს ორწლიანი კონრაქტი გააფორმა "საუთჰემპტონთან". კურასაოს ეროვნულ ნაკრებში 2011 წლიდან თამაშობს და უკვე 19 მატჩი ჩაატარა ეროვნულ
სტივ ელანა, მარტინიკა
ლილი, 35 წლის, მეკარე
საფრანგეთის უმაღლეს ლიგაში პირველად 2004 წელს ითამაშა "კანის" შემადგენლობაში. მაშინ უმაღლეს ლიგაში "კანმა" ადგილი ვეღარ შეინარჩუნა. ამის შემდეგ ელანა "ბასტიაში" გადავიდა.
"ლილის" შემადგენლობაში მიკაელ ლანდროს დუბლიორი იყო. მან ლანდროს ძირითადში ადგილი წაართვა. მერე სათადარიგოთა სკამზე გადაჯდა -მისი ადგილი ნიგერიელმა ვისენტ ენიამამ დაიკავა. 34 წლის ასაკში ელანამ საერთაშორისო კარიერის დაწყება გადაწყვიტა და მარტინიკის ნაკრების ფორმა მოირგო.
ალი ადნანი, ერაყი
უდინეზე, 21 წლის, მარცხენა მცველი
ერაყი არ არის კურასაო და მარტინიკა, მაგრამ ამ ქვეყნის წარმომადგენელი ფეხბურთელის ხილვა ევროპის ერთ-ერთ უძლიერეს ლიგაში მაინც ეგზოტიკასთან ასოცირდება.
2013 წელს ერაყის ახალგაზრდულ ნაკრებთან ერთად ადნანი მსოფლიოს ჩემპიონატზე მეოთხე ადგილზე გავიდა და ის აზიის საუკეთესო ახალგაზრდა ფეხბურთელად დაასახელეს. მას "აზიელი ბეილი" დაარქვეს. წარმატებული მუნდიალის შემდეგ ადნანი ეგრევე გადავიდა თურქულ "რიზესპორში".
ორი სეზონის განმავლობაში ის გუნდის ლიდერი იყო. ზაფხულში ალი "უდინეზეში" მივიდა. იტალიურ კლუბში იმედოვნებენ, რომ ადნანს მალე მილიონებად გაყიდიან რომელიმე გრანდში.
მარსელ ბუხელი, ლიხტენშტეინი
ემპოლი, 24 წლის, ცენტრალური ნახევარმცველი
მისი საფეხბურთო გზა შვეიცარიიდან დაიწყო. ის "სენტ გალენში" მივიდა. სულ მალე ლიხტენშტეინელი ფეხბურთელი "სიენამ" წაიყვანა. მერე იყო რამდენიმე იჯარა. მათ შორის - ტურინის "იუვენტუსში".
ამ ზაფხულს მივიდა "ემპოლიში" და იტალიის მთავარ ლიგაში დებიუტიც ჰქონდა. მან "რომას" გაუტანა. ლიხტენშეინის ნაკრებში მიმდინარე წლიდან თამაშობს და მხოლოდ ორი შეხვედრის ჩატარება მოასწრო.
უესლი ლოტოა, ახალი კალედონია
ლორიანი, 28 წლის, ცენტრალური მცველი
დაიბადა და საფეხბურთო განათლება მიიღო საფრანგეთში. თამაში დაიწყო იქაურ დაბალ ლიგებში. დღეს "ლორიანის" ძირითადი შემადგენლობის ფეხბურთელია. ახალი კალედონიის ნაკრებში 2008 წლიდან თამაშობს.
ბილი კეტკეოფომფონი, ლაოსი
ანჟერი, 25 წლის, მარჯვენა ნახევარმცველი
ითამაშა საფრანგეთის ჩემპიონატის მეორე ლიგაში და შვეიცარიულ "სიონში". დაიბადა საფრანგეთში, თუმცა ამ ქვეყნის არც ერთ ნაკრებში არ უთამაშია.
მათ შორის - არც ასაკობრივ გუნდებში. დროა, ლაოსის ნაკრებში თამაშს დათანხმდეს და საერთაშორისო ფეხბურთს გაუსინჯოს გემო.
ლუდოვიკ ბაალი, ფრანგული გვიანა
რენი, 29 წლის, მარცხენა მცველი
ბაალის შესახებ უკვე დიდი ხანია ალაპარაკდნენ სპეციალისტები. ის ჯერ კიდევ მაშინ გამოჩნდა ასპარეზზე, როცა "ლე მანი" საფრანგეთის ელიტურ დივიზიონში თამაშობდა.
ფრანგული გვიანას ნაკრებში 4 მატჩი ჩაატარა და უკვე გოლის გატანაც მოახერხა. ამ გუნდის ერთ-ერთი ლიდერია.
შაკერ ალ-ხადური, კომორის კუნძულები
კანი, 23 წლის, მარჯვენა მცველი
შაკერი ნანტში დაიბადა და დიდ ფეხბურთში სწორედ ამ ქალაქის წარმომადგენელი გუნდის შემადგენლობაში ჰქონდა დებიუტი. ზაფხულში "კანში" მივიდა, მაგრამ ჯერჯერობით სათამაშო პრაქტიკით განებივრებული არ არის.
მარტიდან კომორის კუნძულების ნაკრებში თამაშობს და კმაყოფილი უნდა იყოს, რადგან საფრანგეთის ნაკრებში ნამდვილად ვერ მოხვდებოდა.
კლაუდიო ბოვუ, გვადელუპა
ლიონი, 27 წლის, თავდამსხმელი
დაიბადა გვადელუპაში. კარიერის პირველი წლები "ტრუასთან" ერთად საფრანგეთის მეორე და მესამე ლიგაში გაატარა. ამის შემდეგ გადავიდა "შატორუში", რასაც საფრანგეთის უმაღლეს ლიგაში დებიუტი მოჰყვა "ბასტიას" რიგებში.
"გენგამთან" ერთად საფრანგეთის თასი მოიგო. პირველივე სეზონში 17 გოლი შეაგდო ელიტურ ლიგაში და "ლიონის" მიწვევაც გაირტყა. 2009 წელს რამდენიმე მატჩი ჩაატარა გვადალუპეს ეროვნულ გუნდში.
ყოველდღიური სპორტული გაზეთი "ლელო"
