ხუთშაბათს ევროლიგაზე გამოსვლა დაასრულა სლოვენიის "ოლიმპიამ" და მასთან ერთად ევროტურნირებს დაემშვიდობა საქართველოს ნაკრების ორი კალათბურთელი - გიორგი შერმადინი და ვლადიმერ ბოისა. მართალია, ევროლიგის უმთავრესი მატჩები ახლა იწყება (პლეი ოფები), მაგრამ როგორც უნდა დასრულდეს ეს ტურნირი, ჩვენთვის მთავარ თამაშად "ოლიმპია"-"ბარსელონა" დარჩება. ამ შეხვედრას დიდი დატვირთვა ჰქონდა: სწორედ ევროლიგის 2010 წლის ჩემპიონ "ბარსელონასთან" უნდა გამოჩენილიყო გიორგი შერმადინის რეალური ძალა. კატალონიელთა რიგებში თამაშობენ ესპანეთის ნაკრების მეფარე ფრან ვასკესი და NBA-მოვლილი ცენტრი ბონიფაც ნდონგი.
...23 წუთში 14 ქულა, 6 მოხსნა - და კიდევ არაერთი
მატჩის შემდეგ მივიღეთ ერთმნიშვნელოვანი პასუხი: გიორგი ევროლიგის დონის ცენტრია.
აქამდე მან დიდი გზა გაიარა და, რაც მთავარია, ნაბიჯ-ნაბიჯ უმატებდა: 2008-09 წლების სეზონში ევროლიგაზე "პანათინაიკოსის" მაისურით ერთი მატჩი ჩაატარა და ბერძნებთან ერთად ევროლიგის მოგებით გაიხარა. 2009-10 სეზონში გიორგიმ ევროსარბიელზე თამამად შეაბიჯა: მწვრთნელი ჟელკო ობრადოვიჩი ცოტას ათამაშებდა და უმთავრესად დაცვაში კარგ მოქმედებას სთხოვდა. შეტევაში ახალგაზრდა ქართველი პასებსაც იშვიათად იღებდა და საშუალოდ 4.5 ქულას აგროვებდა.
შერმადინისადმი მწვრთნელის მიდგომა არც მემდინარე სეზონის დასაწყისში, ევროლიგის პირველ ჯგუფურ ეტაპზე შეცვლილა: "პანათინაიკოსიდან" განათხოვრების წესით "ოლიმპიაში" გადავიდა და მწვრთნელი, იურე ჟდოვჩი მას საშუალოდ 12.1 წუთს ათამაშებდა. რეგულარულ ეტაპზე გიორგის მონაგარი 5.9 ქულასა და 2.4 მოხსნას შეადგენდა. არადა, იყო მატჩები, როცა ქართველის მოედანზე შესვლის შემდეგ "ოლიმპიას" თამაში უმჯობესდებოდა, მაგრამ მწვრთნელი მას მოედანზე დიდი ხნით მაინც არ ტოვებდა.
ძნელი სათქმელია, "ოლიმპიას" თავკაცი ევროლიგის ტოპ-16-ს რა აზრებით შეხვდა, მაგრამ ფაქტია - შერმადინის სათამაშო დრო თითქმის გაორმაგდა, იგივე დაემართა მის მონაგარსაც: 21.2 წუთი, 10 ქულა, 5.2 მოხსნა...
ტოპ-16-ში, დაფარებებში გიორგი რაშო ნესტეროვიჩთან ერთად საუკეთესოა - 2.2.
და რაც მთავარია - შერმადინი ტოპ-16-ში ყველაზე სარგებლიან კალათბურთელთა შორის მეათე ადგილზეა. მისი მქკ 15.7-ს შეადგენს. ამ მაჩვენებლით საუკეთესოა "კახა ლაბორალელი" ფერნანდო სან ემეტერიო - 23.4.
თუ სეზონის დასაწყისში ქართველი ცენტრის მთავარი ამოცანა თანაგუნდელთათვის სივრცეების გამოთავისუფლება იყო, ბოლო მატჩებში მწვრთნელმა არაერთხელ უთხრა ოლიმპიელებს - ბურთი შერმადინს ჩაუგდეთო.
სასიხარულოა, რომ ხანგრძლივი შესვენების შემდეგ ევროლიგას ვლადიმერ ბოისა დაუბრუნდა. მასზე მომდევნო კვირაში მოგითხრობთ და სტატისტიკასაც შემოგთავაზებთ.
.
