კლაიპედას არენა, არვიდას საბონისის ვიზიტი, ქართული კლუბები ევროთასებზე, საქართველოს ნაკრები - ამ და სხვა საკითხებზე კალათბურთის ფედერაციის პრეზიდენტ ბესიკ ლიპარტელიანს ვესაუბრეთ. - ევროპის ჩემპიონატის ორგანიზატორებმა შეჯიბრების მონაწილე ყველა ქვეყნის ფედერაციის ხელმძღვანელი ლიტვაში მიგვიწვიეს, რათა ადრევე გვენახა ყველა ის ადგილი, რომელთანაც ევრობასკეტის მსვლელობისას ჩვენს ნაკრებს შეხება ექნება. დავათვალიერეთ კლაიპედას სასტუმრო "ამბერტონი", რომელშიც ჩვენი ჯგუფის ყველა წარმომადგენელი იცხოვრებს. სასტუმროს არაფერი დაეწუნება, ასევე კარგია, რომ დარბაზთან ახლოსაა და გზაში დიდი დრო არ დაგვეკარგება.
- კლაიპედას არენა ახალი აშენებულია. ყველა სამუშაო დასრულებულია?
- როცა
- საქართველოს ნაკრები სად ივარჯიშებს?
- კლაიპედას არენას აქვს სათადარიგო მოედანიც. ჩვენი გუნდიც იქ ივარჯიშებს, თუმცა სამი მატჩი ძალიან ადრე იმართება და არ ვიცი, როგორ მოესწრება დილის
ვარჯიშის გამართვა.
- საქართველოში ოფიციალური ვიზიტით ევრობასკეტის ელჩი არვიდას საბონისი იყო...
- იგი დიდი სპორტსმენი გახლდათ და ევროპის ჩემპიონატის ელჩად შემთხვევით არ აურჩევიათ. საქართველოში საბონისის ვიზიტი მნიშვნელოვანი მოვლენა იყო, ევრობასკეტის პრეზენტაცია მოაწყო. ჩვენი მხრივ კი დავათვალიერებინეთ ქართული დარბაზები. გაისად ხომ რომელიმე ახალგაზრდულ ასაკში ევროპის ჩემპიონატის შესარჩევი ტურნირის მასპინძლობას ვაპირებთ.
- გუშინ საქართველოს ნაკრების წევრებს ფედერაციაში შეხვდით.
- ვინც ადრე ჩამოდის, ყოველწლიურად ვხვდებით და სამომავლო გეგმებზე ვლაპარაკობთ. კალათბურთელები ამჟამად ისვენებენ, 1 ივლისიდან კი ვარჯიშს შეუდგებიან. ჯერაც არ დაუსრულებიათ სეზონი ვლადიმერ ბოისას, გიორგი შერმადინსა და მანუჩარ მარკოიშვილს. პირველი ორი სლოვენიის ჩემპიონატის ფინალურ სერიას ახლა ამთავრებს, ხოლო მანუჩარს იტალიის პირველობის ფინალები ჯერ არ დაუწყია. იგი ბოლომდე იხარჯება, თავს არ ზოგავს, ამიტომ, იტალიიდან ჩამოსვლის შემდეგ დასვენება დასჭირდება.
- ტორინ გრინის ტრავმა სერიოზული არ ყოფილა.
- მას ფეხზე ფალანგა ჰქონია გაბზარული, არადა ექიმები მოტეხილობას ვარაუდობდნენ. ფეხიც ისე ჰქონდა დაფიქსირებული, მეგონა ზედ თაბაშირი ედო. საბედნიეროდ, ყველაფერი წესრიგშია და ტორინ გრინმა ვარჯიში უკვე დაიწყო. მას ჩვენთან ხშირი კონტაქტი აქვს.
- იყო ლაპარაკი თოთხმეტკაციან განაცხადში ტაირონ ელისის შეყვანის თაობაზე...
- შემადგენლობის საკითხებს მწვრთნელი, იგორ კოკოშკოვი აგვარებს. დასჭირდება ელისი, თუ არა, მას შემდეგ გავიგებთ, რაც შემადგენლობას დაასახელებს.
- ბოლოს ქართულ კლუბებზე გკითხავთ. "არმიამ" და "სოხუმმა" ევროპის საკლუბო ტურნირებში მონაწილეობის განაცხადი ფედერაციაში შეიტანეს, საიდანაც ფიბაევროპაში უნდა გადაგზავნილიყო...
- ყველა პროცედურა დასრულებულია. 9 ივნისს ფიბაევროპაში განაცხადების მიღების ბოლო ვადა იყო. ჩვენ მანამდე გავაგზავნეთ და უკვე გადაჭრით შეიძლება ითქვას - 2010-11 წლების სეზონში ევროჩელენჯზე ორი ქართული კლუბი იასპარეზებს.
- ფედერაციას გუნდებისთვის უარის თქმის უფლებაც ჰქონდა.
- ყველაფერი კარგად გამოვიკითხეთ და გარანტიებიც მივიღეთ, რომ "არმია" და "სოხუმი" კიდევ უფრო გაძლიერდებიან. ასეთ შემთხვევაში უარს ვერავის ვეტყოდით... მისასალმებელია, რომ ორივე გუნდმა აქედანვე დაიწყო მზადება საერთაშორისო სარბიელზე ღირსეულად გასასვლელად. ეს შედეგს აუცილებლად მოიტანს. სასიხარულოა, რომ 2011 წელი ქართული კალათბურთისთვის ერთ-ერთი ყველაზე წარმატებული იქნება - ევროჩელენჯზე ორი გუნდი გვეყოლება, ხოლო საქართველოს ნაკრები ევროპის ჩემპიონატზე ითამაშებს.
