კასტელსის ოცეული: ჯერ აფრიკა, მერე ამერიკა

ევროპის ჩემპიონატზე საქართველოს ნაკრების პირველი მეტოქე ბელგია მზადებას 25 ივლისს შეუდგება. მწვრთნელმა ედი კასტელსმა შეკრებაზე 20 კალათბურთელი იხმო, რომელთა ვინაობასაც ქვემოთ გაეცნობით. მწვრთნელმა გუნდში უხმო ტანმაღალ იანიკ დრიესენსა და ჯეფ ვან დერ იონკჰეიდს. თუმცა პირველი პირადული მიზეზების გამო ვერ შეუერთდება ნაკრებს, ხოლო მეორეს ტრავმა აქვს.

კასტელსის ოცეულში ნატურალიზებული მარკუს ფეისონია, რომელმაც შარშან ევროპის ჩემპიონატის საგზურის მოპოვებაში დიდი წვლილი შეიტანა.

"ბელგიელი ლომების" შეკრებაზე გამოცხადდება "ნიუ ორლეან ჰორნეტსის" ცენტრი დიდიე მბენგა, რომელიც 2009 წელს ნატურალიზებულის სტატუსით თამაშობდა, თუმცა წლეულს როგორც ბელგიელი, ისე დაეხმარება კასტელსის გუნდს. საქმე ისაა, რომ იქაურმა კალათბურთის ფედერაციამ ფიბა-ევროპის შესაბამის სტრუქტურებს აუხსნა, რომ მბენგამ 2004 წელს კონგოდან ევროპაში ჩასვლის შემდეგ ბელგიის პასპორტი საკალათბურთო ნაკრებში თამაშის მიზნით არ მიიღო. ფიბა-ევროპამ თხოვნა გაითვალისწინა და ფეისონის გვერდით საქართველოს ნაკრების წინააღმდეგ მბენგაც ითამაშებს.

ბელგიელები პირველ საკონტროლო მატჩს კოტ დივუართან 29 ივლისს ჩაატარებენ, მეორე დღეს ცენტრალური აფრიკის რესპუბლიკას დაუპირისპირდებიან, ხოლო 31-ში - სენეგალს.

1 აგვისტოს ჩვენი მეტოქე ამერიკის ქალაქ დალასში გაფრინდება, სადაც 8 დღე დარჩება. აშშ-დან "ლომები" ჩრდილოეთში, კანადაში გადავლენ, სადაც მასპინძლებს ორჯერ შეხვდებიან, ხოლო ერთ მატჩს ამერიკის კოლეჯების ლიგის გუნდთან ჩაატარებენ.

კასტელსის კრებული ბებერ კონტინენტს 16 აგვისტოს დაუბრუნდება და 19-დან 21-მდე ბამბერგის ტურნირში ჩაერთვება, სადაც ასევე ითამაშებენ გერმანია, თურქეთი და საბერძნეთი.

ევროპის ჩემპიონატამდე ბოლოსწინა მატჩს ბელგიელები შინ ჩაატარებენ 25 აგვისტოს ბოსნიას დაუხვდებიან, ხოლო 27-ში საფრანგეთში "მამლებს" "დაეჭიდებიან".

მოთამაშე დ.თ. სმ გუნდი
აქსელ ერველე 1983 204 ბილბაო (ესპანეთი)
კრისტოფ ბეგინი 1980 205 შარლერუა
დიმიტრი ლაუერსი 1979 187 აველინო (იტალია)
როელ მოორსი 1978 190 ანტვერპენი
დიდიე მბენგა 1980 213 ნიუ ორლეანი (NBA)
სემ ვან როსომი 1986 188 სარაგოსა (ესპანეთი)
ჯონათან ტაბუ 1985 190 კანტუ (იტალია)
ტომას ვან დენ შპიგელი 1978 214 ოოსტენდე
მარკუს ფეისონი 1978 196 ოოსტენდე
გაი მუია 1983 194 ლიეჟი
რენდი ოვენეკე 1986 201 ანტვერპენი
ლიონელ ბოსკო 1981 176 გენტი
პიერ-ანტუან ჟილე 1991 202 ლიეჟი
მაქსიმ დე ზეეუვი 1987 204 პეპინსტერი
იოანის ლაროჩევიჩი 1989 207 შარლერუა
დომიენ ლოუბრი 1985 186 გენტი
ნილს ნარნეგრავე 1987 191 ლეუვენი
ჟან-მარკ მვემა 1989 195 ანტვერპენი
ქუენტინ სერონი 1990 190 ოოსტენდე
იორნ შტეინბახი 1989 181 აალსტარი
მწვრთნელი: ედი კასტელსი

ყოველდღიური სპორტული გაზეთი "ლელო"