კლაიპედას სასტუმრო "ამბერტონის" კარიდან საქართველოს ნაკრების კაპიტანი ზაზა ფაჩულია წითელ ფორმაში გამოწყობილ კალათბურთელთან ერთად გამოვიდა, მალევე დაემშვიდობა და ავტობუსში ავიდა. წითელმაისურიანი კი წიგნებით ხელში სასტუმროს კიბეზე ჩამოჯდა. ზაზას სიტყვები გამახსენდა: ადამიანს ცხოვრებაში ერთხელ ეძლევა შანსი, რომელიც უნდა გამოიყენოსო... ჰოდა, კიბესთან მივედი და "იუტა ჯაზის" რუს ფორვარდ ანდრეი კირილენკოს გასაუბრება ვთხოვე. სალაპარაკო თემა უხვად იყო - იგი არაერთ ქართველ კალათბურთელს იცნობს, 1 სექტემბერს ჩვენს გუნდთან კინაღამ წააგო.
- არაერთ ქართველ მოთამაშესთან მაქვს კარგი ურთიერთობა. მე და ზაზა ფაჩულია ძალიან ახლოს ვართ.
ნიკა ცქიტიშვილი ამერიკაში რომ ჩამოვიდა, ბევრს მუშაობდა ჩემს ნაცნობ რუს მწვრთნელთან. მას მერე სკიტასთან კავშირი მაქვს. სამწუხაროდ, იგი ევროპაში დაბრუნდა და აქ აგრძელებს კარიერას. კარგად მახსოვს მანუჩარ მარკოიშვილის თამაში 2003 წელს, როცა იგი ტრევიზოს კემპზე იყო. იტალიაში NBA-დან მე, დირკ ნოვიცკი, ზაზა ფაჩულია და ტონი პარკერი ვიყავით.
მაშინ მანუჩარი ძალიან ახალგაზრდა იყო, თუმცა მისი თამაში ძალიან მომწონდა. 1 სექტემბერს მანუჩარმა რუსეთის ნაკრებთანაც კარგად ითამაშა. სასიამოვნოა, როცა ხედავ, რომ ესა თუ ის ახალგაზრდა სწრაფ პროგრესს განიცდის და მთავარ როლს თამაშობს როგორც ნაკრებში, ასევე კლუბებში. სსრ კავშირის პერიოდიდან მოყოლებული ქართველები და რუსები ერთმანეთთან მეგობრობდნენ. მეც დიდ პატივს ვცემ ქართველებს.
- მაინტერესებს თქვენი მოსაზრება ვიქტორ სანიკიძეზე, რომლის თამაში ანდრეი კირილენკოსას მაგონებს.
- სანიკიძეს ნაკლებად ვიცნობ. იგი შედარებით ახალგაზრდაა და ჩვენი გზები პირველად აქ, ლიტვაში გადაიკვეთა. თუმცა რამდენიმე მატჩის მიხედვით შემიძლია ვთქვა, რომ შესანიშნავი კალათბურთელია, კარგი მონაცემები აქვს და ევროპაშიც მაღალ დონეზე ასპარეზობს. ცოტასაც მოუმატებს და თავისუფლად შეძლებს NBA-ში თამაშს.
- საქართველოს ნაკრებთან მატჩს როგორ გაიხსენებთ?
- ველოდი, რომ ქართველებთან რთული მატჩი გველოდა, რადგან საკალათბურთო მასშტაბები გაიზარდა. ამიტომ შემთხვევითი არ არის, რომ ფიბა საზღვრებს აფართოვებს და ევროპის ჩემპიონატის მონაწილეთა რაოდენობას ზრდის. გადავხედოთ ევრობასკეტს, იოლად თამაშს ვერც ერთი გუნდი იგებს, ყველა იბრძვის. თუნდაც დიდი ბრიტანეთი, პორტუგალია, ფინეთი, რომლებიც მანამდე ელიტაში არ შედიოდნენ, კარგ თამაშს უჩვენებენ. ეს მისასალმებელია, რადგან მეტ კარგ კალათბურთელსა და საინტერესო თამაშს ვნახულობთ.
- ჩემი აზრით, რუსეთის ნაკრებმა საქართველო გამოცდილების ხარჯზე დაამარცხა...
- დაგეთანხმებით. გამოცდილებამ მართლაც დიდი როლი ითამაშა. რუსეთის ნაკრებმა ბოლო წუთებზე კონცენტრირება მოახერხა და ითამაშა ის კალათბურთი, რასაც შედეგი უნდა მოეტანა. ქართველებს კი მოგება იმდენად უნდოდათ, იმდენად ემოციურად თამაშობდნენ, რომ როცა დაგვეწივნენ, ცოტა დაიბნენ და შეცდომები დაუშვეს.
ალბათ ეგონათ, რომ ყველაფერი უკვე გააკეთეს... ასეთ სიტუაციებში კი უფროდაუფრო მეტი კონცენტრაციაა საჭირო. მაქსიმალურად დიდი ყურადღება უნდა დაუთმო დაცვას, რადგან ეს თამაშის მოგების მთავარი გზაა. ქართველებს ბოლო წუთებზე ეს ყველაფერი არ გამოუვიდათ, რაც ჩემთვის სავსებით მისაღებია. ურთიერთშეხვედრის შემდეგ ევროპის ჩემპიონატზე ქართველებს ვუქომაგებ. ნიჭიერი კალათბურთელებით დაკომპლექტებული გუნდი გყავთ და წარმატებას გისურვებთ.
- ევროპის ჩემპიონატის წილისყრისას თქვით, რომ რუსეთის ნაკრების მთავარი მიზანი ოლიმპიადის ლიცენზიის მოპოვებაა. როგორ ფიქრობთ, სადღეისოდ, არის რუსეთი ევრობასკეტის ერთ-ერთი საუკეთესო გუნდი?
- ამ პირველობას ერთი გამოკვეთილი ფავორიტი არ ჰყავს. არც რუსეთის ნაკრები შეიძლება ჩაითვალოს ჩემპიონობის ერთ-ერთ მთავარ ფავორიტად.
ევროპაში 8-9 თანაბრად ძლიერი ნაკრებია, მათ ნებისმიერ დროს შეუძლიათ ერთურთის დამარცხება. ამიტომ, ყველაფერი დამოკიდებული იქნება ერთ თამაშზე, ერთ ტყორცნაზე. ვფიქრობ, ეს საუკეთესო რვა გუნდი მეოთხედფინალში ითამაშებს, თუმცა არც სენსაციას გამოვრიცხავ. ოღონდ, მოულოდნელობა მხოლოდ ერთი შეიძლება მოხდეს.
წინასწარ პროგნოზების გაკეთება რთულია, ყველაფერს თამაშები გვიჩნენებს. ჩემპიონიც ღირსეული გუნდი გახდება და ოლიმპიადის ლიცენზიასაც ის მიიღებს, ვინც ყველაზე მეტად დაიმსახურებს.
ყოველდღიური სპორტული გაზეთი "ლელო"
ვაჟა სიმონიშვილი ლიტვიდან
