ამ სტატიის წერა ესპანეთი-გერმანიის მატჩისას დავიწყე და საფრანგეთი-თურქეთის შეხვედრის მსვლელობისას დავასრულე. ეს, პირველ რიგში საქართველოს ნაკრების დამსახურებაა, რომელმაც ევროპის საუკეთესო 12 გუნდს შორის ასპარეზობის უფლება მოიპოვა და ახალი მიზანი დაისახა - მეოთხედფინალი. საქართველოს ნაკრები ევრობასკეტის მეოთხედფინალში! როგორ ჟღერს? საოცარია, მაგრამ ჩვენს გუნდს მართლაც აქვს შანსი ტოპ-რვაეულში ითამაშოს. შანსს კი გამოყენება უნდა. ბევრი რამ დღეს გადაწყდება - თუ ქართველები მაკედონიას მოუგებენ, მომდევნო ეტაპისკენ დიდ ნაბიჯს გადადგამენ, რადგან შემდეგ ფინეთი ელით და შესაძლებელია, ორი მოგებით მეოთხედფინალში ამოყონ თავი (თითო ჯგუფიდან 4 გუნდი
- ქართველებთან მატჩი ჩვენთვის ძალიან მნიშვნელოვანია. მოგების შემთხვევაში მეოთხედფინალის საგზურს მოვიპოვებთ. ქართველებს თუ ვერ ვაჯობეთ, შემდეგ რუსეთსა და სლოვენიასთან ურთულესი მატჩები გველის. როგორც ვიცი, ჩვენს წინააღმდეგ ზაზა ფაჩულია არ ითამაშებს, რაც თქვენს შანსებს ამცირებს.
თუმცა კარგად ვიცნობ ქართველთა გუნდს და ვიცი, გამარჯვებას იოლად ვერ მივაღწევთ, - გვითხრა გუშინ, 7 სექტემბერს მაკედონიის ნაკრებისა და სლოვენიის "ოლიმპიას" ლიდერმა ვლადო ილიევსკიმ და იქვე დაამატა, ქართველ კალათბურთელებთან კარგი ურთიერთობები მაქვს, გიორგი შერმადინთან, მანუჩარ მარკოიშვილთან, ვლადიმერ ბოისასთან... ვლადიმერი და მე ლიუბლიანაში კარის მეზობლები ვართო.
მაკედონელები დარბაზში ქართველების შემდეგ შევიდნენ. დერეფანში ბოისა და ილიევსკი ერთმანეთს შეხვდნენ, მოიკითხეს და მუქარის სიტყვებიც გაცვალეს.
- მაკედონია მოგებას აპირებს, არა? ვნახავთ, როგორ გაიმარჯვებს, - გვითხრა ბოისამ ილიევსკისთან საუბრის დასრულების შემდეგ, - მართალია, ისინი ოთხი მოგებით გადმოვიდნენ და კარგი გუნდიც ჰყავთ, მაგრამ მათი ძლევა შესაძლებელია. არ გვეყოლება ზაზა ფაჩულია, რაც ჩვენთვის დიდი დანაკლისია. თუმცა მაკედონიის ნაკრები თამაშს ცენტრზე არ აგებს, უფრო სწრაფ კალათბურთს უჩვენებს. ასე რომ, მატჩს იმედიანად და კარგად მომზადებულები ვხვდებით.
მოვუსმინოთ მანუჩარ მარკოიშვილს:
- საქართველოს ნაკრებმა პირველი ჯგუფური ეტაპი გადალახა, რითაც ბევრი გააკვირვა. ნამდვილად არ ვაპირებთ მიღწეულზე შეჩერებას, ვეცდებით საკალათბურთო ევროპას ახალი სიურპრიზი შევთავაზოთ. რაც შეეხება მაკედონიასთან მატჩს, შეცდომა იქნება იმაზე ფიქრი, რა შედეგი მოჰყვება ზაზა ფაჩულიას გარეშე თამაშს, მოედანზე მოსაგებად გავალთ და ყველა ღონეს ვიხმართ წარმატების მისაღწევად.
ნიკა ცქიტიშვილიც ოპტიმისტურადაა განწყობილი:
- პირველი ჯგუფური ეტაპის შემდეგ ცოტა დავისვენეთ და შემიძლია ვთქვა, რომ ნაკრები მზადაა საბრძოლველად. თითოეულმა კალათბურთელმა მაქსიმუმი უნდა გავიღოთ და შედეგიც მოვა. მაკედონია უძლეველი მეტოქე ნამდვილად არ არის.
გუშინვე, ვარჯიშის წინ საშუალება მოგვეცა ზაზა ფაჩულიასთვის ჯანმრთელობის მდგომარეობაზე გვეკითხა.
- კუნთი ორ ადგილასაა მცირედით გაწყვეტილი, ამიტომ გუნდს ვერ დავეხმარები. ასეთი ტრავმის მკურნალობისთვის ერთ თვემდეა საჭირო, - თქვა ზაზამ.
ვიქტორ სანიკიძე გამოცდილებას შეეხო:
- პირველი ეტაპის შემდეგ დიდი გამოცდილება მივიღეთ, საკუთარი ძალისა კიდევ უფრო ვირწმუნეთ და ახლა უნდა დავამტკიცოთ, რომ მეორე ტურში შემთხვევით არ გავსულვართ. ამის დასამტკიცებლადაც მზად ვართ.
ბოლოს საინტერესო ინფორმაციას გაგაცნობთ: გუშინ, 7 სექტემბერს ლიტვის დედაქალაქ ვილნიუსში სხვადასხვა რეისით 300-მდე ქართველი ჩამოვიდა, ერთი ჩარტერი თბილისიდან დღეს დილას გამოფრინდება. ასე რომ, საქართველოს ნაკრებს ქომაგობა არც ვილნიუსში მოაკლდება. ისიც შევიტყვეთ, რომ კლაიპედას მსგავსად, ვილნიუსის ცენტრში დიდი სცენა მოეწყობა, სადაც სუხიშვილების ანსამბლი და ქართული ხმები მთელს ევროპას გააცნობენ ქართულ კულტურას.
იხილეთ ვიდეო
ყოველდღიური სპორტული გაზეთი "ლელო"
ვაჟა სიმონიშვილი ლიტვიდან
გამხსენდა ზესტაზე დაწერილი: ზესტამ თუ მოუგო შტურმს იქ და მერე ვისაც შეხვდება იმასაც რომ მოუგოს გავა ჩემპიონთა ლიგაზე და მერე რაიცი რა ხდება.
ბიჭები უკვე ჯიგრები არიან, ლამაზი თამაში, სწრაფი თამაში აჩვენონ აი ეს მოვთხოვოთ, მეტი არაფერი. არ არის საჭირო ილუზიების ქვეშ ვიცხოვროთ.