ევროპის 2013 წლის ჩემპიონატის შესარჩევ ტურნირზე საქართველოს კალათბურთელთა ნაკრები გადახალისებული შემადგენლობით ითამაშებს.ნაკრების შემადგენლობა სპორტისა და ახალგაზრდობის საქმეთა სამინისტროში გამართულ პრესკონფერენციაზე კალათბურთის ფედერაციის პრეზიდენტმა, ბესიკ ლიპარტელიანმა და ნაკრების მთავარი მწვრთნელის თანაშემწეებმა, კოტე ტუღუშმა და დავით უსტიაშვილმა დაასახელეს.
განაცხადში 18 კალათბურთელია: გამთამაშებლები - გიორგი ცინცაძე, ოთარ ფხაკაძე, რეზო როგავა და ამერიკელი კორი ფიშერი, რომლის ნატურალიზების საკითხი უკვე გადაწყვეტილია და ქართულ პასპორტს უახლოეს მომავალში მიიღებს. კორი ფიშერი ნაკრების შემადგენლობაში ერთადერთი ნატურალიზებული მოთამაშე იქნება.
მსროლელები - მანუჩარ მარკოიშვილი, ბესო ლეჟავა, მერაბ ბოქოლიშვილი და
მსუბუქი ფორვარდები - ვიქტორ სანიკიძე, ანატოლი ბოისა და ლევან ფაცაცია.
მძიმე ფორვარდები - თორნიკე შენგელია, აკაკი დვალიშვილი, ნიკა მეტრეველი და ბექა ბექაური.
რაც შეეხებათ ცენტრებს, ამ პოზიციაზე ნაკრებში ზაზა ფაჩულიასა და გიორგი შერმადინთან ერთად რიჩარდ მათიაშვილი მოხვდა.
ეროვნულ გუნდში გამოძახებულ კალათბურთელებს შორის ვერ მოხვდნენ ნიკოლოზ ცქიტიშვილი, ვლადიმერ ბოისა და ლაშა გამყრელიძე.
ფედერაციის ხელმძღვანელებისა და ნაკრების მწვრთნელების განმარტებით, მათი არგამოძახება გუნდის გაახალგაზრდავების პროცესს და ახალგაზრდა მოთამაშეებისთვის შანსის მიცემას უკავშირდება.
კალათბურთელთა ნაკრები ევროპის 2013 წლის ჩემპიონატისთვის მზადებას 1 ივლისიდან დაიწყებს.
17 ივლისს გუნდი სრულად შეიკრიბება ავსტრიაში, სადაც კალათბურთელებს მთავარი მწვრთნელი იგორ კოკოშკოვი შეუერთდება.
შესარჩევ ციკლში საქართველოს მეტოქეები რუმინეთი, ბოსნია, ლატვია და ჰოლანდია იქნებიან. შესარჩევი ტურნირი 18 აგვისტოდან 11 სექტემბრამდე გაგრძელდება.
ფინალურ ეტაპზე ასპარეზობის უფლებას 2 საუკეთესო მოიპოვებს. მესამე ადგილზე გასული ნაკრები ინარჩუნებს შანსს, 6 ჯგუფის მესამეადგილოსნებს შორის 4 საუკეთესოში მოხვდეს და ფინალურ ეტაპზე გადავიდეს.
ევროპის ჩემპიონატის შესარჩევ ტურნირზე საქართველოს კალათბურთელთა ნაკრები გადახალისებული შემადგენლობით ითამაშებს (იბეჭდება მცირე ცვლილებით)
interpressnews.ge
