ლატვიის ნაკრები ევრობასკეტი-2012-ის შესარჩევ ეტაპზე საქართველოს ეროვნული გუნდის მეტოქეა. ბალტიისპირელები სერიოზულად ემზადებიან D ჯგუფის მატჩებისათვის, რომლებიც აგვისტო-სექტემბერში გაიმართება, რაშიც დავრწმუნდით, როცა ლატვიის ქალაქ ვალმიერაში (100 კმ რიგიდან) ჩავედით, სადაც ნაკრები მზადების ერთ-ერთ ეტაპს გადის.
ვალმიერას სპორტულ დარბაზთან დაგვხვდნენ ძველი ნაცნობები - ლატვიის ნაკრების მთავარი მწვრთნელი აინარს ბაგატსკისი, მისი პირველი ასისტენტი არნის ვეცვაგარსი და მწვრთნელი ფიზმომზადებაში ოსკარას ერნშტეინი.
ბაგატსკისი 2011 წელს ქართული კლუბის, "სოხუმის" მთავარი მწვრთნელი იყო, ვეცვაგარსი მისი ასისტენტი, ერნშტეინი კი გასული წლის აგვისტოს ბოლოს ორი კვირით იყო ჩამოსული თბილისში,
საქართველოსა და ლატვიაში საერთო ნაცნობების მოკითხვის შემდეგ ბაგატსკისმა გვითხრა, ლატვიის დღევანდელი ნაკრები ევროპაში ერთ-ერთი ყველაზე ახალგაზრდული და პერსპექტიულიაო.
- ჩვენი ნაკრები ინტენსიურად ემზადება ევრობასკეტის შესარჩევი ჯგუფის მატჩებისათვის. კარგად ვიცი საქართველოს ნაკრების თამაში; საქმის კურსში ვარ, რომ ნაკრებში არის გარკვეული ცვლილებები; გარკვეული წარმოდგენა მაქვს სხვა მეტოქეებზეც და შეიძლება ითქვას, არცერთი მოწინააღმდეგე არ არის სუსტი - არც ჰოლანდია, არც ბოსნია და არც რუმინეთი. ამიტომ ინტენსიურად ვემზადებით ყველა მატჩისათვის.
ბაგატსკისმა აღნიშნა, რომ ლატვიის ნაკრების ამოცანაა ჯგუფიდან გასვლა და ევროპის ჩემპიონატის ფინალურ ეტაპზე მოხვედრა, თუმცა აღიარა, რომ ეს იოლი არ იქნება.
ჩვენს კითხვაზე, ლატვიაში დიდი აჟიოტაჟი გამოიწვია, ნაკრებში კასპარს ვეცვაგარსის (ბაგატსკისის პირველი ასისტენტის, არნის ვეცვაგარსის შვილი) მიწვევამ, აინარსმა გვითხრა:
- კასპარსი საკმაოდ კარგი და საინტერესო მოთამაშეა. ნაკრებში ამიტომ მოვიწვიე და არა იმიტომ, რომ ის არნისის შვილია. კასპარსი თავის სიტყვას ნაკრებში აუცილებლად იტყვის.
მწვრთნელი მართალი აღმოჩნდა. 14 ივლისის საღამოს, ვალმიერაში ჩატარებულ ლატვია-კვიპროსის სპარინგ-მატჩში, 19 წლის კასპარს ვეცვაგარსი მოედანზე ერთ-ერთი გამორჩეული იყო - მან 9 ქულა დააგროვა, საიმედოდ ითამაშა დაცვაში და კარგ პასებსაც არიგებდა. მასთან ერთად გამოვყოფდი კასპარს ბერზინსს (10 ქულა) და მარექს მეიერსს (9 ქულა).
ლატვიამ კვიპროსს თავიდანვე შესთავაზა ათლეტური და სპორტულად აგრესიული თამაში და მასპინძლები მთელი მატჩის განმავლობაში 15-27 ქულის უპირატესობით წინ იყვნენ.
მესამე პერიოდში და ბოლო მეოთხედის დასაწყისში კვიპროსელებმა პანაგიოტის ტრიზოკასის (13 ქულა) და ენტონი კინგის (11 ქულა) ძალისხმევით მატჩის შემობრუნება სცადეს. ერთ მომენტში მათ შეძლეს ანგარიშის 14 ქულამდე შემცირება, თუმცა თამაშის ბოლოს ლატვიელებმა მოუმატეს და გაახარეს დარბაზში მყოფი ათასამდე გულშემატკივარი (ვალმიერას დარბაზი 1800 მაყურებელს იტევს) და მატჩი 25-ქულიანი სხვაობით დაასრულეს.
ლატვიელი ქომაგები ამბობდნენ, რომ იქნებოდა ანშლაგი, თუ ბილეთის ფასი იქნებოდა არა 2 ლატი (დაახლოებით 7 ლარი), არამედ უფრო ნაკლები, რადგან ეს ამხანაგური მატჩი იყო.
მაყურებლებს შორის იყვნენ რიგიდან სპეციალურად ჩამოსული ქომაგებიც, თუმცაღა, ტრანსლაციას ლატვიის ცენტრალური ტელეარხი აწარმოებდა.
ბაგატსკისი მაინცდამაინც კმაყოფილი არ იყო ლატვიის ნაკრების თამაშით:
- მიუხედავად დამაჯერებელი მოგებისა, კიდევ ბევრია სამუშაო. უნდა გავაანალიზოთ პლუსები და მინუსები.
მატჩის შემდეგ გავესაუბრეთ ლატვიის ტელევიზიის საკალათბურთო მიმომხილველს და კომენტატორს უგის ფოგსტს.
მან მკითხა, როგორ მოგეწონათ ლატვიის მამაკაცთა ნაკრებიო (11 ივლისს რიგაში დავესწარით ლატვიისა და ფინეთის ქალთა ნაკრებების მატჩს - ლატვიამ გაიმარჯვა და ევრო-2013-ის საგზური მოიპოვა).
ვუპასუხე - ქალთა ნაკრები უფრო მომეწონა-მეთქი.
გაეცინა და მითხრა: "ჯერჯერობით მამაკაცების ნაკრები ჩვეულ ფორმაში არ არის. ვფიქრობ, ლატვია კიდევ უფრო მოუმატებს".
მინდა აღვნიშნო, რომ ადგილობრივი ქომაგები მატჩის დაწყებამდე და შემდეგაც ძალიან თბილად გვეპყრობოდნენ და გამოხატავდნენ დიდ სითბოს საქართველოსა და ვალმიერაში ჩამოტანილი ჩვენი ატრიბუტიკისადმი.
ლატვია-კვიპროსი 72:47
18:8, 20:15, 17:17, 16:7
ლატვია: ვეცვაგარსი (9ქ), მარეკს მეიერსი (9ქ, 9მ), ფრეიმანისი (7ქ), დავის ბერტანსი (9ქ), ჯერომანოვსი (7ქ), შტრელნიეკსი (3ქ, 3პ), ბერზინსი (10ქ, 6მ), შელაკოვსი (1ქ), მარტინს მეიერსი (6ქ), ოსენიეკსი (2ქ), კუკსიკსი (2ქ), დაირის ბერტანსი (7ქ).
თენგიზ პაჭკორია
ვალმიერადან
ხათუნა გაბიტაშვილის ფოტო
ყოველდღიური სპორტული გაზეთი "ლელო"
