საქართველოს ნაკრებს 1997 წლის ევროპის ჩემპიონატზე მოხვედრაც შეეძლო. ამისთვის საჭირო იყო ბოსნიელების ბერლინში ძლევა, რის შემდეგაც ევრობასკეტამდე ერთი ნაბიჯიღა დარჩებოდა, მაგრამ... მას მერე ჩვენთანაც და ბოსნიაშიც არაერთი თაობა შეიცვალა და სადღეისოდ ორივეს ევროპაში გამორჩეული 7-8 კალათბურთელი ჰყავს.
მეტსაც გეტყვით, ჩვენი მეტოქის მთავარი სნაიპერი, მირზა ტელეტოვიჩი ესპანურ "კახა ლაბორალში" კარგი თამაშის შემდეგ ამერიკულ "ბრუკლინ ნეთსში" გადავიდა, სადაც ასევე დებიუტანტი თორნიკე შენგელიას გვერდით ითამაშებს. დღეს კი ეს კალათბურთელები ერთმანეთს სარაევოში შეეჭიდებიან.
ტელეტოვიჩმა შესარჩევი ეტაპი დამაჯერებლად დაიწყო - მისი ორი მატჩის ნაზავი 28.5
მირზას თანაგუნდელებს კი ორივე შეხვედრა მოგებული აქვთ და სატურნირო ცხრილს სათავეში უდგანან.
ნაკრების ლიდერის თამაშით მოხიბლულია ბოსნიელი საფეხბურთო ვარსკვლავი და "მანჩესტერ სიტის" თავდამსხმელი ედინ ჯეკო:
- ტელეტოვიჩი ბოსნიური სასწაულია. ყოჩაღ, ბიჭებო, კარგად დაიწყეთ და ასევე განაგრძეთ!
ჩვენთვის უფრო საინტერესოა, ბოსნიელები რას ფიქრობენ საქართველოს შესახებ. ბევრი ძიების შემდეგ მირზა ტელეტოვიჩის კომენტარს მივაგენით:
- მართალია, კალათბურთის თამაში ყველამ ისწავლა და ჯგუფის ნებისმიერ მეტოქესთან ბრძოლა გველის, მაგრამ ყველაზე რთული მაინც ქართველებთან თამაში იქნება. მათ კარგი კალათბურთელები, შესაბამისად, კარგი გუნდი ჰყავთ.
თუმცა ყველაფერი მაინც ჩვენს თამაშზეა დამოკიდებული. თუ მატჩს მეტოქეზე უკეთესად მომზადებულები შევხვდებით, გავიმარჯვებთ კიდეც.
დააკვირდით, ბოსნიის ნაკრებში 11 მოთამაშეა ჩამოწერილი. არადა, ნებისმიერი მატჩის განაცხადში მწვრთნელს 12 კალათბურთელი შეჰყავს. როგორც ჩანს, ჩვენი მოწინააღმდეგის მწვრთნელ ალექსანდრ პეტროვიჩს რესურსის სიმწირის გამო განაცხადის შევსებაც უჭირს.
მან ჰოლანდიასთან შეხვედრის ოქმში სულაც 10 კალათბურთელი ჩამოწერა. ვნახოთ, რას მოიმოქმედებს საქართველოსთან თამაშის წინ.
ბოსნია 2012
# მოთამაშე სმ ამპლუა დაბ.წ. კლუბი
4 არმინ ავდიბეგოვიჩი 188 უკანახაზელი 84 ჟრინსკი
5 ანტე მასიჩი 200 ფორვარდი 85 ციბონა (ხორვატია)
7 იოსიფ ნალეტილიჩი 195 უკანახაზელი 89 შიროკი
8 ზეკ რაითი 188 უკანახაზელი 85 პეტერბურგი (რუსეთი)
9 ედინ ბავჩიჩი 209 ფორვარდ/ცენტრი 84 კანტუ (იტალია)
10 ნემანია მიტროვიჩი 195 უკანახაზელი 90 კავალა (საბერძნეთი)
11 ელმედინ კიკანოვიჩი 210 ცენტრი 88 ენისეი (რუსეთი)
12 მირზა ტელეტოვიჩი 205 ფორვარდი 85 ბრუკლინ ნეთსი (აშშ)
13 დალიბორ პერსიჩი 193 უკანახაზელი 85 შიროკი
14 ნიჰად დიედოვიჩი 198 ფორვადი 90 ალბა (გერმანია)
15 ნეჯად სინანოვიჩი 221 ცენტრი 83 უნიკახა (ესპანეთი)
მწვრთნელი: ალექსანდრ პეტროვიჩი
ასისტენტი: დენის ბაირამოვიჩი
ფოტოზე: ედინ ჯეკო და მირზა ტელეტოვიჩი
ყოველდღიური სპორტული გაზეთი "ლელო"
ასევე იხილეთ:
ბოსნია-ჰერცოგოვინა VS საქართველო - ფავორიტების ომი იწყება
