კარსმომდგარი სეზონის წინ საქართველოს ოთხგზის ჩემპიონი "რუსთავი" სერიოზულად გაძლიერდა. ქართულ კლუბებში მიმოფანტული რუსთაველი კალათბურთელების დაბრუნებას რომ თავი დავანებოთ, გუნდში ორი ამერიკელი ითამაშებს. ერთია გამთამაშებელი ნეით ბოუი, მეორე - ფორვარდი დარელ ნიუელსი.
ისინი გვარებით განსხვავდებიან, თორემ საქმით ნამდვილი ძმები არიან. ორივემ კარიერა არკანზასის კოლეჯში დაიწყო და მას მერე კიდევ სამ კლუბში თამაშობდნენ ერთმანეთის გვერდით: პორტუგალიის "ტერჩეირაში", ამერიკულ "იამჰილში" და სლოვენიის "რუდარში".
როგორც უკვე მოგახსენეთ, ნეითი და დარელი "რუსთავშიც" ერთად ითამაშებენ.
* * *
საიტ "ევრობასკეტზე" გამოქვეყნდა ინტერვიუ ნეით ბოუისთან, რომელშიც იგი
- წარმატებული სეზონის შემდეგ მსურდა, კარიერა კარგ გუნდში გამეგრძელებინა, ისეთში, რომელსაც წინა წელთან შედარებით დიდი ამბიციები ექნებოდა.
სწორედ ასეთია "რუსთავი". ამასთან, ამ კლუბს საქართველოს ჩემპიონატიც არაერთხელ მოუგია და ევროჩელენჯზეც უთამაშია.
- "რუსთავში" გადასვლის შემდეგ საქართველოს შესახებ რა შეიტყვე?
- ამა თუ იმ კლუბთან კონტრაქტის გაფორმებამდე ქვეყანას ვიკვლევ. საქართველოც ძალიან საინტერესო აღმოჩნდა, კავკასიონის თოვლიანი მთებითა და შავიზღვისპირეთით. გამოგიტყდებით, შავ ზღვაში ფეხის დასველება აქამდეც მინდოდა და "რუსთავში" გადასვლით სურვილიც ამისრულდა.
ასევე, ვიცი საქართველოსა და რუსეთის ურთიერთობისა და ქართული სტუმართმოყვარეობის შესახებ.
- გასული სეზონი პორტუგალიაში დაიწყე და ყატარში განაგრძე. რა იყო ამის მიზეზი?
- პორტუგალიურ "ტერჩეირაში" გაჩნდა გარკვეული ფინანსური პრობლემები და ამიტომაც გადავწყვიტე ყატარში გადასვლა. აზიურ კუნძულზე თამაში საინტერესო იყო, თუმცა ამ ეტაპზე კარიერის ევროპაში გაგრძელება მიმაჩნია მიზანშეწონილად. რამდენიმე წლის შემდეგ ყატარში დაბრუნებაზე შეიძლება კიდევ დავფიქრდე.
- ალბათ, ევროპაში უმაღლეს დონეზე თამაშზეც ფიქრობ...
- ევროლიგის გუნდში მოხვედრა ძალიან რთულია, მაგრამ ზოგჯერ ეს დამოკიდებულია არა შენს მონაცემებზე, არამედ იმაზე, რამდენად გიცნობს საკალათბურთო სამყარო.
ყოველწლიურად ვუმატებ და იმედი მაქვს, რომ საქართველოში თამაშიც დამეხმარება კარიერულ წინსვლაში. ქართველებს ხომ პორტუგალიელებზე უკეთესი ლიგა აქვთ. მაგალითად, შარშან იქ ნიუჯერსელი სანდიატა გეინსი თამაშობდა.
- რას უნდა ელოდნენ "რუსთავის" ქომაგები ნეით ბოუისგან?
- სანახაობრიობასა და საინტერესო თამაშებით სავსე სეზონს...
დოსიე
დარელ ნიუელსი
დაიბადა: 08.06.1986
სიმაღლე: 198 სმ
პოზიცია: ფორვარდი
კარიერა
არკანზასის კოლეჯი (აშშ), რუდარი (სლოვენია), ნავასი (ესპანეთი), იამჰილი (აშშ), ტერჩეირა (პორტუგალია).
დოსიე
ნეით ბოუი
დაიბადა: 11.06.1986
სიმაღლე: 183 სმ
ამპლუა: გამთამაშებელი
კარიერა
არკანზასის კოლეჯი (აშშ), რუდარი (სლოვენია), ოტერო (ესპანეთი), იამჰილი (აშშ), ტერჩეირა (პორტუგალია), ალ აჰლი (ყატარი).
ფოტოზე: მარცხნივ დარელ ნიუელსი
ყოველდღიური სპორტული გაზეთი "ლელო"
