პოლონეთთანაც წავაგეთ, რა გვეშველება ევროპის ჩემპიონატზე? - იკითხავს მავანი. შესაძლოა, შეკითხვა ლოგიკურად ჩანდეს - საქართველოს კალათბურთელთა ნაკრებმა ევროპის ჩემპიონატისთვის მზადება ორი წაგებით დაიწყო: იტალიასთან 16-ქულიანი სხვაობით დათმო, პოლონეთთან - 12-ქულიანით...
თუმცა ამ მატჩების მიხედვით შორსმიმავალი დასკვნების გამოტანა არ შეიძლება. თუნდაც იმიტომ, რომ მწვრთნელმა იგორ კოკოშკოვმა არაერთი ნაბიჯი გადადგა, რომლითაც გვაგრძნობინა, რომ ეს მხოლოდ ჟურნალია, მთავარი კი კინოა, რომელიც 4 სექტემბრიდან დაიწყება, სახელწოდებით "ევრობასკეტი 2013".
გაინტერესებთ, რა ნაბიჯებზე ვლაპარაკობთ? - სათითაოდ ჩამოგითვლით:
პირველი. მწვრთნელმა არც ამჯერად ათამაშა ახლად ჩასული რიკი ჰიკმანი.
თუ თამაშის მოგებას დიდ მნიშვნელობას ანიჭებ, ასეთ კაცს განაცხადს მიღმა არ დატოვებ. როგორც სერბმა სპეციალისტმა ნამატჩევს თქვა, ჰიკმანი არც ისრაელთან ითამაშებს.
მეორე. შარშან, მოსამზადებელ ეტაპზე თბილისში გამართულ შეხვედრებში (ესტონეთი, ბელარუსი, უკრაინა), იგორ კოკოშკოვი ბოლომდე ტვირთავდა ძირითად ბირთვს.
თბილისის ტურნირი მოიგო კიდეც. დავწერეთ - შესაძლოა, უკეთესი ყოფილიყო გუნდთან შესაწყობად ახალბედების მეტად გამოყენება-თქო.
როგორც ასისტენტმა დავით უსტიაშვილმა განმარტა, ლიდერებისთვის გამოყოფილი დიდი დრო მათ ფორმაში შესვლას ემსახურებოდა.
ეს იყო შარშან. რა სიტუაციაა სადღეისოდ? ნაკრებს შესარჩევ ეტაპზე კიდევ 9 მატჩი დარჩა და წამყვანი კალათბურთელები კონდიციების გაუმჯობესებას მოასწრებენ (გიორგი ცინცაძე და ვიქტორ სანიკიძე ურიგო ფორმაში არ ჩანან, მათ ერთობლივად 42 ქულა ჩააგდეს და "დეილიბასკეტის" ჟურნალისტისგან საინტერესო მეტსახელი მიიღეს - "ფეთქებადი ქართული დუეტი").
პირველ საკონტროლო მატჩებს კი იგორ კოკოშკოვი შემადგენლობის ოპტიმიზაციისთვის იყენებს. ეს თქვა დავით უსტიაშვილმაც.
მწვრთნელებს ხომ გადასაწყვეტი აქვთ, ვინ დატოვონ 12-კაციან განაცხადში. ამჟამად გუნდში 15 კალათბურთელი ვარჯიშობს. ერთი, ვინც ამოვარდება ლუკ ზელერია, რომელიც 8 აგვისტოს, პოლონეთთან მოედანზე არ გამოჩენილა (განაცხადში იყო).
ალბათ იმიტომ, რომ ქართველებისთვის დრო და ადგილი არ წაერთმია. ევრობასკეტზე ხომ თითოეულ ნაკრებს მხოლოდ ერთი ნატურალიზებულის გამოყენების უფლება აქვს.
ეს ერთი ჰიკმანი უნდა იყოს. რადგან მატჩი თუნდაც ტელევიზიით არ გვინახავს, ძნელი სათქმელია ამა თუ იმ კალათბურთელის გარჯის შეფასება, თუმცა აღნიშვნის ღირსია დუდა სანაძე, რომელიც წინა დღეს იტალიასთან მატჩის განაცხადში ვერ მოხვდა.
იგი თამაშში თამამად ჩაერთო და სადებიუტო შეხვედრაში 14 ქულას მოუყარა თავი. ამაზე უკეთეს სტარტს სანაძე, ალბათ ვერც ისურვებდა.
უნდა ვივარაუდოთ, რომ პოლონეთთან თამაშით მან 12-კაციან განაცხადში მოხვედრა გაინაღდა.
მესამე. არიან მწვრთნელები, რომლებიც მეტოქის ყურადღების მოსადუნებლად ამხანაგურებში განგებ მიმართავენ წაგების ტაქტიკას.
არ ვამბობთ, კოკოშკოვმა განგებ დათმოო, თუმცა პოლონეთთან შეხვედრა მეტად სპეციფიკური იყო. ამ გუნდს ხომ ევრობასკეტის გახსნით მატჩში ვხვდებით და გამარჯვებული დიდ ნაბიჯს გადადგამს მომდევნო ეტაპისკენ...
როცა "სამკვდრო-სასიცოცხლო მეტოქეს" ამხანაგურად ეპაექრები, ძალებიც შეიძლება დაზოგო და ტაქტიკასაც შავი ფარდა გადააფარო. თუმცა, 21-ე საუკუნეში მაინც ძნელია ტაქტიკური მონახაზის დამალვა.
მას სკივრში ვერ ჩადებ და გამოქვაბულში ვერ შეინახავ - საკონტროლო მატჩებში მაინც მოგიწევს გამოყენება.
საქართველოს ნაკრების მწვრთნელის ნაბიჯებსა და პოლონეთთან მატჩისადმი მიდგომაზე ჩვენს მოსაზრებას მეორე მწვრთნელის, დავით უსტიაშვილის ნათქვამიც ადასტურებს:
"ჩვენი მთავარი მიზანი იმ მოთამაშეების გამოცდაა, რომლებიც შედარებით ახლები არიან და გვსურს, ყველა მათგანის შესაძლებლობებში დავრწმუნდეთ.
შესაბამისად, თავის გამოჩენის შანსი ყველას ეძლევა. დღეს პოლონეთთან თამაშს არა უშავდა. ბიჭებმა პერიმეტრიდან წარმატებით ესროლეს, ხოლო შედეგს არ ვანიჭებთ გადამწყვეტ მნიშვნელობას.
მოგეხსენებათ, პოლონეთი ჩვენი მეტოქეა ევროპის ჩემპიონატზე და მთავარი მატჩი ერთ თვეში გველის.
ეს ვარჯიში უფრო იყო, ვიდრე სერიოზული დაპირისპირება. არც ერთი გუნდი არ თამაშობდა ოპტიმალური შემადგენლობით.
პოლონეთში მაცეი ლამპემ იასპარეზა, თუმცა მარცინ გორტატი და ნატურალიზებული კელატი აკლდა.
რაც შეეხებათ ჩვენს ნატურალიზებულ მოთამაშეებს, რიკი ჰიკმანი კვლავ არ ვათამაშეთ, გვინდა, ბოლომდე კარგად შეერწყას გუნდს და შემდეგ გავიდეს მოედანზე".
...მთავარია, ცუდად დაწყებული ჟურნალი კარგი კინოს საწინდარი აღმოჩნდეს.
ყოველდღიური სპორტული გაზეთი "ლელო"
ასევე იხილეთ:
იტალია-საქართველო 85:69 - გზის დასაწყისში აღმართია
