შენგელია VS შერმადინი, ბურჯანაძე - ქართული დერბი ესპანურ ლიგაში [VIDEO+PHOTO]

ესპანეთის უმაღლეს ლიგაში ჭეშმარიტად ქართული დერბი ჩატარდა. თორნიკე შენგელიას "ბასკონიამ" გიორგი შერმადინისა და ბექა ბურჯანაძის "ანდორას" უმასპინძლა და ამ შეხვედრაში ამინდს უპირველესად ქართველები ქმნიდნენ. ბასკონიელთა საუკეთესო მოთამაშე შენგელია გახდა, ანდორელთა კი - შერმადინი და ბურჯანაძე. ესპანეთის ჩემპიონატის "ქართულ შეხვედრაში" "ბასკონიამ" 95:77 იმარჯვა.

მასპინძელთა პირველი 6 ქულა შენგელიამ მიითვალა. ქართველი ფორვარდი ფაქტობივად შეუჩერებელი იყო, რომელმაც ბოლო პერიოდამდე 7-დან 7 ორქულიანი ჩააგდო, საბოლოოდ კი მატჩის საუკეთესო შედეგი დააფიქსირა. ვიტორიული გუნდის ქართველმა ლიდერმა არასრული 27 წუთი ითამაშა და 19 ქულა, 8 მოხსნა, 5 პასი, 3 ჩაჭრა და 1 დაფარება მიითვალა. თორნიკემ 9-დან 7 ორქულიანი, 3-დან 1 სამიანი და 2-დან 2 საჯარიმო ჩააგდო. ამ მაჩვენებლებით მან საერთო სარგებლიანობის კოეფიციენტი 27-ამდე გაზარდა და მატჩის საუკეთესო მოთამაშე გახდა. ამ შედეგით შენგელიას ტურის საუკეთესოს ტიტულის მოპოვების შანსიც აქვს, თუ არადა, სიმბოლურ ხუთეულში აუცილებლად შევა.

"ანდორაშიც" საუკეთესოები ქართველები იყვნენ. საუკეთესო შედეგი გიორგი შერმადინმა დააფიქსირა, რომელმაც 22:27 წუთში 15 ქულა, 4 მოხსნა, 1 პასი და 2 დაფარება მიითვალა. გიორგიმ 9-დან 6 ორქულიანი და 5-დან 3 საჯარიო ჩააგდო. მისმა სარგებლიანობის კოეფიციენტმა 19-ს უწია, რის შემდეგაც 17 ერთეულით ბურჯანაძე მოდის.

ბურჯანაძემ დებიუტში ისეთი შედეგიანობა გამოავლინა, რომ ნებისმიერ სნაიპერსა თუ ბომბარდირს შეშურდებოდა. ბექა სათადარიგო იყო და მოედანზე გასვლიდან 3:13 წუთში 8 ქულა ჩააგდო. მან 6-დან 6 საჯარიმო და 1-დან 1 ორქულიანი მიითვალა და სარგებლიანობის კოეფიციენტის 13 ერთეულით პირველი მეოთხედის საუკეთესო მოთამაშე გახდა. მთლიანობაში ბურჯანაძემ 21:18 წუთში 14 ქულა, 4 მოხსნა, 2 ჩაჭრა და 1 პასი მოაგროვა. მან 7-დან 3 ორქულიანი და 9-დან 8 საჯარიმო მიითვალა, 1 სამიანი კი ააცილა.

3 მოგებითა და 1 მარცხით შენგელიას გუნდი მე-4 ადგილზეა, ხოლო შერმადინი-ბურჯანაძის "ანდორას" 3-დან 2 მოგებით მომდევნო, მე-5 ადგილი უკავია. მომდევნო, მე-5 ტურში, 22 ოქტომბერს ანდორელები დაუმარცხებელ "ბილბაოს" უმასპინძლებენ, ხოლო მეორე დღეს "ბასკონია" სტუმრად "ფუენლაბრადას" შეხვდება.









მომზადებულია gbf.ge-ს მიხედვით