NBA-ის კალენდარი გამოქვეყნებულია

ეროვნულმა საკალათბურთო ასოციაციამ გამოაქვეყნა 2013-14 წლების რეგულარული ჩემპიონატის კალენდარი.

ოკეანის გაღმა საკალათბურთო სეზონი 29 ოქტომბერს, მაიამიში გაიხსნება, სადაც NBA-ის მოქმედი ჩემპიონი "მაიამი ჰიტი" "ჩიკაგოს" უმასპინძლებს. სავარაუდოდ, ეს იქნება "ჩიკაგო ბულზის" ლიდერის დერიკ როუზის პირველი ოფიციალური მატჩი მუხლის ტრავმის შემდეგ, რის გამოც მან მთლიანად გამოტოვა გასული სეზონი. ამავე დღეს კიდევ ორი მატჩი გაიმართება: ლოს ანჯელესში შედგება დერბი "კლიპერსსა" და "ლეიკერსს" შორის, "ორლანდო" კი სტუმრად ჩავა სათამაშოდ "ინდიანასთან".

დუაიტ ჰოვარდის დებიუტი "ჰიუსტონში" 30 ოქტომბერს, "შარლოტთან" მატჩში შედგება. იმავე დღეს ექნებათ დებიუტი "ბრუკლინის" რიგებში კევინ გარნეტს, პოლ პირსსა და ჯეისონ ტერის - "ნეტსი" სტუმრად ითამაშებს "კლივლენდის" წინააღმდეგ, რომლის რიგებში პირველად გამოვლენ ენდრიუ ბაინუმი და 2013 წლის დრაფტის პირველი ნომერი ენტონი ბენეტი.

როგორც ყოველთვის, კათოლიკურ შობაზე რამდენიმე საინტერესო მატჩი დაიგეგმა. მაგალითად, ამ დღეს "ლეიკერსი" "მაიამის" წინააღმდეგ ითამაშებს, "ოკლაჰომა" კი ნიუ იორკში შეებრძოლება "ნიქსს".

საინტერესოა, რომ 4 დეკემბერს, რეგულარული ჩემპიონატის მატჩი "სან ანტონიოსა" და "მინესოტას" შორის მექსიკის დედაქალაქ მეხიკოში გაიმართება, - იტყობინება NBA-ის ოფიციალური ვებგვერდი.

NBA და ნარკოტიკები
ბოლო ორი დღის განმავლობაში, ეროვნული საკალათბურთო ასოციაციის ერთბაშად ორი კალათბურთელი გაეხვა ნარკოტიკებთან დაკავშირებულ სკანდალში.

ერთ დროს დრაფტის მეორე ნომერი, "ფინიქს სანზის" ფორვარდი მაიკლ ბიზლი მარიხუანას შენახვისთვის დააკავეს. პოლიციამ კალათბურთელის მანქანა ავტოსაგზაო წესების დარღვევის შემდეგ დააკავა და ავტომობილის ჩხრეკისას, სამართალდამცავებმა მარიხუანა იპოვნეს. ბიზლი დააპატიმრეს, თუმცა მოგვიანებით თავდებით გაანთავისუფლეს. კალათბურთელისთვის ოფიციალურად ბრალი ჯერ არ წაუყენებიათ.

შეგახსენებთ, რომ ამა წლის თებერვალში ბიზლი ასევე დააკავა პოლიციამ სიჩქარის გადაჭარბებისთვისა და მანქანის სანომრე ნიშნის გარეშე მართვისთვის.

* * *
ამასობაში გაირკვა, რომ "პორტლენდ თრეილ ბლეიზერსის" მცველი ტერელ ჰარისი ხუთმატჩიანი დისკვალიფიკაციით დასაჯეს NBA-ის ანტინარკოტიკული წესების დარღვევის გამო, - წერს ლიგის ოფიციალური ვებგვერდი. კონკრეტულად არაფერს იტყობინებიან იმის შესახებ, რა სახის დარღვევაშია მხილებული კალათბურთელი.

ამ ზაფხულს, 25 წლის მცველი "ნიუ ორლეანიდან" "პორტლენდში" გადავიდა. გასულ სეზონში მან მხოლოდ 13 მატჩი ჩაატარა რეგულარულ ჩემპიონატში.

ყოველდღიური სპორტული გაზეთი "ლელო"

ასევე იხილეთ:
კობი ბრაიანტი მალე დაბრუნდება