დიდი აჟიოტაჟი: NBA-ში 213 სანტიმეტრი სიმაღლის გეი გამოჩნდა

ეროვნულ საკალათბურთო ასოციაციასა და ამერიკულ საკალათბურთო პრესაში დიდი აჟიოტაჟი იყო. "დღეს ისტორიული მოვლენის მოწმენი გავხდებით", - იწერებოდა სოციალურ ქსელებში.

საქმე ისაა, რომ საკალათბურთო მოედანს უბრუნდებოდა ვეტერანი ცენტრი ჯეისონ კოლინზი. ეს კალათბურთელი 12-წლიანი კარიერის განმავლობაში საშუალოდ 3.6 ქულასა და 3.8 მოხსნას აგროვებდა და მის მიმართ შექმნილი აჟიოტაჟი, ცხადია, ამ სტატისტიკას არ უკავშირდებოდა. აჟიოტაჟი გამოიწვია იმან, რომ 213 სანტიმეტრი სიმაღლის ცენტრი ჩრდილოამერიკული პროფესიული ლიგების პირველი წევრი იყო, ვინც ღიად გამოაცხადა თავისი არატრადიციული სექსუალური ორიენტაციის შესახებ.

"ბრუკლინმა" ამ კალათბურთელთან 10-დღიანი კონტრაქტი გააფორმა და ეს მხოლოდ პიარის მიზნით არ გაუკეთებია. "ნეტსში" მაღალი კალათბურთელების დეფიციტია და კლუბმა შანსი მისცა 35 წლის მოთამაშეს.

"ეს მხოლოდ "საკალათბურთო გადაწყვეტილებაა", - განაცხადა "ბრუკლინის" გენერალურმა მენეჯერმა ბილი კინგმა. - ჩვენ წინა ხაზის გაძლიერება გვჭირდება, ამიტომაც, ჯეისონთან ათდღიანი კონტრაქტი სწორი გადაწყვეტილებაა".

კოლინზმა ჰომოსექსუალიზმი 2013 წლის აპრილში აღიარა, როცა უკვე დასრულებული ჰქონდა გამოსვლა "ვაშინგტონ უიზარდში". მას შემდეგ ის არც ერთ კლუბს არ მიუწვევია საკუთარ რიგებში.

და 24 თებერვალს, "ლოს ანჯელეს ლეიკერსთან" გასვლით მატჩში "ისტორიული მოვლენა" მართლაც მოხდა. კოლინზმა 11 წუთი ითამაშა, რომლის დროსაც ორი მოხსნა და ერთი ჩაჭრა დააგროვა და ხუთი პერსონალურის მიღება მოასწრო (ხანდახან ზედმეტად ეუხეშებოდა მეტოქეებს).

რაც შეეხება "სტეიპლს ცენტრში" გამართულ მატჩს, "ნეტსმა" შეძლო "ლეიკერსთან" 11-მატჩიანი წაგებათა სერიის შეწყვეტა.

ბოლოს ამ გუნდმა კალიფორნიული გრანდი შვიდი წლის უკან, 2007 წელს დაამარცხა. თუმცა დღეს "ლეიკერსის" დამარცხებას არ შეიძლება სერიოზული მიღწევა ეწოდოს. მორიგი წაგების შემდეგ ლოსანჯელესელები დასავლეთ კონფერენციის ბოლო ადგილზე აღმოჩნდნენ. "ნეტსის" რიგებში კი დერონ უილიამსმა და პოლ პირსმა ერთად 55 ქულა მოაგროვეს. მათ გუნდს, მართალია, უარყოფითი ბალანსი აქვს, მაგრამ პლეი ოფის ზონაში მყარად იკავებს მეექვსე ადგილს.

"ყველა ვარსკვლავის" მატჩს მოგაგონებდათ "ლოს ანჯელეს კლიპერსის" და "ოკლაჰომა-სიტის" შეხვედრა. ტაბლოზე ანგარიში ძალიან სწრაფად იზრდებოდა და უამრავი ლამაზი ეპიზოდი ვიხილეთ ორივე გუნდის მოთამაშეთა შესრულებით.

ამ ფონზე უფრო უკეთ კალიფორნიელი სტუმრები გამოიყურებოდნენ. "კლიპერსის" რიგებში სასტარტო ხუთეულის ხუთივე წევრმა შეძლო მინიმუმ 10 ქულის დაგროვება, ჯამალ კროუფორდის ანგარიშზე კი 36 ქულა მოდიოდა. მასპინძლების რიგებში ყველას ნაცვლად თამაში მოუწიათ კევინ დურანტსა და სერჟ იბაკას, მაგრამ მათი მონდომება საკმარისი არ აღმოჩნდა გამარჯვების მოსაპოვებლად.

ბევრს ცდილობდა "თანდერის" გამთამაშებელი რასელ უესტბრუკი, რომელიც მეორე მატჩს ატარებდა ლაზარეთიდან დაბრუნების შემდეგ, მაგრამ ის მხოლოდ ხელს უშლიდა გუნდს: 25 წუთის განმავლობაში უესტბრუკმა 13-დან სამი ბურთი ჩააგდო, 5 პერსონალური მიიღო და სამჯერ დაკარგა ბურთი.

"ოკლაჰომამ" ბოლო სამ სეზონში მესამედ წააგო ზედიზედ ორი მატჩი, თუმცა ინარჩუნებს ლიდერობას დასავლეთ კონფერენციაში.

ოკლაჰომა-კლიპერსი 117:125
32:28, 34:44, 27:27, 24:26
ო: დურანტი (42+10 პასი), იბაკა (20), ფიშერი (15), უესტბრუკი (13), საფოლოშა (10).
კ: კროუფორდი (36), ბარნსი (24), გრიფინი (20), ჯორდანი (18+12 მოხსნა), პოლი (18+12 პასი+8 მოხსნა).

მაიამი-ჩიკაგო 93:79
20:24, 20:16, 25:12, 28:27
მ: ბოში (28+10 მოხსნა), უეიდი (23+10 მოხსნა+7 პასი), ჩელმერსი (12+9 პასი), ალენი (10).
ჩ: ნოა (20+15 მოხსნა+4 დაფარება), გიბსონი (20+10 მოხსნა), დანლივი (13), ჰაინრხი (10).

კლივლენდი-ვაშინგტონი 83:96
27:30, 25:28, 20:20, 11:18
კ: დენგი (17), ჰოიესი (16+12 მოხსნა), ირვინგი (15), ტომპსონი (11+12 მოხსნა).
ვ: უოლი (21+9 პასი), ბილი (17), არიზა (15+10 მოხსნა), გორტატი (13+13 მოხსნა).

ტორონტო-ორლანდო 105:90
19:14, 25:27, 36:24, 25:25
ტ: ლოური (28), დეროზანი (24), როსი (16), ჯონსონი (12+8 მოხსნა), ვასკესი (10).
ო: ჰარისი (28), მური (16), ოლადიპო (11+5 ჩაჭრა), ვუჩევიჩი (11), ო'ქუინი (10).

დენვერი-საკრამენტო 95:109
27:27, 25:21, 18:39, 25:22
დ: ფოიე (27), ფურნიე (27), ფარიდი (10).
ს: ტომასი (33), გეი (32+11 მოხსნა), კაზინსი (27+9 მოხსნა+5 დაფარება).

ლეიკერსი-ბრუკლინი 102:108
21:33, 26:30, 27:23, 28:22
ლ: გასოლი (22+11 მოხსნა), მიქსი (19), ბეიზმორი (17), ჰილი (11+8 მოხსნა), ნ. იანგი (10).
ბ: უილიამსი (30+7 პასი+6 ჩაჭრა), პირსი (25), კირილენკო (10+10 მოხსნა+4 ჩაჭრა), ჯონსონი (10+8 პასი), ბლეტჩი (10).

ფინიქსი-ჰიუსტონი 112:115
16:30, 40:30, 37:23, 19:32
ფ: დრაგიჩი (35), გრინი (23), მარკიფ მორისი (21).
ჰ: ჰოვარდი (25+9 მოხსნა), ჰარდენი (23+7 პასი), ბევერლი (20), ჯონსი (15), პარსონსი (13+7 პასი).

პორტლენდი-მინესოტა 108:97
26:34, 26:26, 32:20, 24:17
პ: ლილარდი (32), ბატუმი (22+10 მოხსნა+3 დაფარება), მეტიუზი (17), რობინსონი (14+18 მოხსნა).
მ: ლავი (31+10 მოხსნა), ბარეა (21), კანინგემი (12), რუბიო (5+11 პასი).

კინო და NBA
"მაიამი ჰიტის" ლიდერმა ლებრონ ჯეიმსმა მთავარი როლი უნდა ითამაშოს ფილმ "კოსმოსური ჯემის" გაგრძელებაში. ამ სურათის პირველ ნაწილში პირველ პლანზე იყო ლეგენდარული მაიკლ ჯორდანი.

კინოსტუდია "უორნერ ბრაზერსმა", რომელმაც პირველი ფილმი გამოუშვა, 18 წლის შემდეგ დაიწყო მუშაობა მის გაგრძელებაზე. ამასთან, სცენარი სპეციალურად ლებრონ ჯეიმსისთვის იწერება, - იტყობინება გამოცემა USA Today.

"კოსმოსურ ჯემში", რომელიც ეკრანებზე 1996 წელს გამოვიდა, იმ დროის NBA-ს ბევრმა ცნობილმა კალათბურთელმა და მწვრთნელმა ითამაშა. კერძოდ, ჯორდანის გარდა, ფილმში მონაწილეობენ პატრიკ იუინგი, მაგსი ბოგსი, ჩარლზ ბარკლი, ლარი ბერდი, ვლადო დივაცი და სხვები.

* * *
კომპანია 20th Century Fox-მა შეიძინა ექსკლუზიური უფლება კომედიის გადაღებაზე, რომელშიც ასახული იქნება NBA-ს ყოფილი ვარსკვლავის, დენის როდმანის ვიზიტები ჩრდილოეთ კორეაში და მისი მცდელობა, დაალაგოს ურთიერთობა იქაურ ლიდერთან, კიმ ჩენ ინთან. ფილმის სამუშაო სახელწოდებაა - "დიპლომატები". რეჟისორად მიწვეულია ტიმ სტორი - ავტორი ფილმისა "ფანტასტიკური ოთხეული".

ყოველდღიური სპორტული გაზეთი "ლელო"