NBA: "ჰიუსტონის" პატარა სასწაული

სამწუხაროდ, სერიის მეშვიდე მატჩმა არ გაამართლა კალათბურთის მოყვარულთა იმედები. მიუხედავად იმისა, რომ ორივე გუნდმა ნერვულად დაიწყო თამაში (პირველ შვიდ წუთში ჯამში 13 შეცდომა), საკმაოდ მალე ცხადი გახდა, რომ "ჰიუსტონი" უფრო განწყობილი იყო საბრძოლველად.

მაკჰეილის შეგირდები მუდმივად მოძრაობაში იყვნენ, ყოველი ბურთისთვის იბრძოდნენ და აქტიურ პრესინგს მიმართავდნენ. "კლიპერსი" კი, პირიქით, დაცვაში ხშირად აგვიანებდა მოქმედებას, არ იყო სათანადო დონეზე ურთიერთდაზღვევა და პრესინგიც მოიკოჭლებდა. 38 წლის პრიჯიონიც კი უფრო მხნედ გამოიყურებოდა კალიფორნიელებზე, რომლებისთვისაც ეს იყო ზედიზედ მეორე შვიდმატჩიანი სერია.

მთელი მატჩის განმავლობაში "კლიპერსი" ერთხელაც არ გასულა წინ და მხოლოდ ორჯერ გაათანაბრა ანგარიში პირველ მეოთხედში. ამის შემდეგ დოკ რივერსის შეგირდებს პერიოდულად ჰქონდათ "აფეთქებები", მაგალითად, მეორე მეოთხედის ბოლოს, როცა 15-ქულიანი ჩამორჩენა ექვს ქულამდე დაიყვანეს. თუმცა დიდ შესვენებამდე მასპინძლებმა შეძლეს ორნიშნა უპირატესობის დაბრუნება.

მესამე მეოთხედის დასაწყისი ისევ სტუმრებს დარჩათ და მათ მოახერხეს მეტოქესთან სამ ქულამდე მიახლოება. თუმცა წარმატების განვრცობა ვერ შეძლეს. ტაიმ-აუტის შემდეგ ჰარდენმა და სმიტმა ზედიზედ 6 ქულა აიღეს და სხვაობა ისევ კომფორტული გახდა.

მეოთხედის ბოლოს კი "რაკეტების" უპირატესობამ მატჩში სარეკორდო 17 ქულას მიაღწია. "კლიპერსს", სერიის წინა მატჩების მსგავსად, შორიდან ტყორცნა არ მისდიოდა, არადა, რედიკსა და თანაგუნდელებს ბევრი კარგი მომენტი შეექმნათ. სტუმრებმა მხოლოდ შვიდი შორეული ტყორცნა მოათავსეს კალათში, სიზუსტე კი 25 პროცენტს უდრიდა. მეტოქის ანალოგიური მაჩვენებელი 40 პროცენტს შეადგენდა.

მეოთხე მეოთხედში რივერსმა ჯარიმების ტაქტიკა აირჩია ჰოვარდის წინააღმდეგ, მაგრამ "როკეტსის" მწვრთნელმა მაშინვე დასვა სათადარიგოთა სკამზე ძირითადი ცენტრი და ამით უპირატესობის შენარჩუნებაზე იზრუნა. საფინალო სირენამდე ხუთი წუთით ადრე გუნდებს შორის სხვაობა 16 ქულა იყო, მაგრამ "კლიპერსმა" ბოლო სპურტის შესრულება შეძლო და შეახსენა მაყურებელს, რომ ამ სერიაში ორჯერ გაანადგურა "ჰიუსტონი".

სულ რაღაც 180 წამში პოლმა და კომპანიამ შვიდიდან ხუთი ტყორცნა გამოიყენეს და 11:1 გაქცევა მოაწყვეს, რომელმაც სულ მცირედით აღადგინა ინტრიგა. ამ სპურტამდე "კლიპერსის" შეცდომებმა და აცილებებმა კალიფორნიელებს სრულფასოვანი ქამბექის საშუალება არ მისცა. საფინალო სირენამდე 56 წამით ადრე არიზამ თავისი მეექვსე სამქულიანი ჩააგდო და ისევ გაზარდა უპირატესობა 11 ქულამდე, რაც მატჩისა და სერიის დასასრულს ნიშნავდა.

"ჰიუსტონმა" პატარა სასწაული მოახდინა და 1:3-დან მოიგო სერია. ახლა გუნდს წინ აქვს რეგულარულის ჩემპიონთან, "გოლდენ სტეიტთან" დაპირისპირება.

ჰიუსტონი-კლიპერსი 113:100
28:21, 28:25, 29:22, 28:32
ჰ: ჰარდენი (31+8 პასი+7 მოხსნა+3 ჩაჭრა), არიზა (22+7 მოხსნა), ჰოვარდი (16+15 მოხსნა), სმიტი (15), ბრიუერი (11).
კ: გრიფინი (27+11 მოხსნა+6 პასი), პოლი (26+10 პასი+5 მოხსნა+4 ჩაჭრა), კროუფორდი (17), ჯორდანი (16+17 მოხსნა+4 ჩაჭრა+3 დაფარება), რედიკი (10+6 მოხსნა+4 დაფარება).
სერია: 4-3

1/2-ფინალი. კალენდარი
აღმოსავლეთი
ატლანტა-კლივლენდი
21 მაისი. ატლანტა-კლივლენდი (04:30)
23 მაისი. ატლანტა-კლივლენდი (04:30)
25 მაისი. კლივლენდი-ატლანტა (04:30)
27 მაისი. კლივლენდი-ატლანტა (04:30)
29 მაისი. ატლანტა-კლივლენდი (04:30)
31 მაისი. კლივლენდი-ატლანტა (04:30)
2 ივნისი. ატლანტა-კლივლენდი (04:30)

დასავლეთი
გ. სტეიტი-ჰიუსტონი
20 მაისი. გ. სტეიტი-ჰიუსტონი (05:00)
22 მაისი. გ. სტეიტი-ჰიუსტონი (05:00)
24 მაისი. ჰიუსტონი-გ. სტეიტი (05:00)
26 მაისი. ჰიუსტონი-გ. სტეიტი (05:00)
28 მაისი. გ. სტეიტი-ჰიუსტონი (05:00)
30 მაისი. ჰიუსტონი-გ. სტეიტი (05:00)
1-ლი ივნისი. გ. სტეიტი-ჰიუსტონი (05:00)

ყოველდღიური სპორტული გაზეთი "ლელო"