ერიჰა! - დავით ხოჭოლავა შეიძლება "მარიუპოლში" გააიჯარონო

ყურადღებით ვადევნებთ 24 წლის ქართველი ცენტრალური მცველის დავით ხოჭოლავას თამაშებს თვალს და ვგულშემატკივრობთ, ეგებ "შახტარის" ძირითად შემადგენლობაში მოხვდეს და ნაკრებსაც უფრო გამოადგეს, იმედი გვაქვს, ეგებ ჩემპიონთა ლიგის 1/8 ფინალში "რომასთან" მოუწიოს ასპარეზობა და ამ დროს უკრაინულ პრესაში გავრცელდა ინფორმაცია, რადგან ძირითად შემადგენლობაში ვერ ხვდება, არაა გამორიცხული, სათამაშო პრაქტიკის მისაღებად "მარიუპოლში" გაუშვან იჯარითო.

მოკლედ, "სტადიო ოლიმპიკოს" ნაცვლად შეიძლება უკრაინის ჩემპიონატზე მე-7 ადგილზე მყოფი გუნდის ვლადიმერ ილიას ძე ლენინის სახელობის სტადიონზე მოუწიოს სეზონის ბოლომდე თამაში. "შახტარი" 15 იანვარს ანთალიაში მიემგზავრება შეკრებაზე (2009 წლიდან მოყოლებული ნაახალწლევს ყოველთვის იქ ემზადებიან) და ვნახოთ, იახლებს თუ არა მწვრთნელი პაულო ფონსეკა თან ქართველ ლეგიონერს.