მამუკელაშვილისა და ბეჟანიშვილის გუნდების იოლი გამარჯვებები სტუდენტურ ლიგაში

ამერიკის სტუდენტურ ლიგაში მორიგი გამარჯვებები მოიპოვეს სანდრო მამუკელაშვილის “სეტონ ჰოლმა” და გიორგი ბეჟანიშვილის “ილინოისმა”. ორივე გუნდი მოწინავე დონის კონფერენციებში ასპარეზობს – "სეტონ ჰოლი" Big East-ში, ხოლო "ილინოისი" Big Ten-ში.

მამუკელაშვილის გუნდმა ფლორიდის "A&M რათლერსი" 87:51 გაანადგურა. ქართველმა ფორვარდმა სასტარტო ხუთეულში მხოლოდ 13 წუთი ითამაშა და ეს გახლდათ მისი ყველაზე უხეირო მატჩი მიმდინარე სეზონში. სანდრომ 2 ქულა და 1 მოხსნა მიითვალა, 6 ცდიდან მხოლოდ 1 სროლა ჩააგდო.

"სეტონ ჰოლი" 4 მოგებითა და 1 მარცხით Big East-ის კონფერენციაში V-VI ადგილებს “ვილანოვასთან” იყოფს.

გიორგი ბეჟანიშვილის “ილინოისმა” კი კიდევ უფრო იოლი გამარჯვება მოიპოვა, რომელმაც “ჰემპტონი” 120:71 გაანადგურა. ბეჟანიშვილმა სასტარტო ხუთეულში ითამაშა და მოედანზე გატარებულ 24 წუთში 14 ქულა, 5 მოხსნა, 4 პასი და 1 დაფარება მიითვალა. გიორგიმ 3-დან 2 ორქულიანი, 1-დან 1 სამიანი და 8-დან 7 საჯარიმო ჩააგდო.