გოგა ბითაძეს NBA-ს ახალ კლუბს უკავშირებენ

მომავალი სეზონის წინ ერთი გარიგება მკაფიოდ მოჩანს, რომელიც წესით, მის მონაწილე NBA-ს ორივე კლუბს დააკმაყოფილებს... 8points9seconds-ი ქართველ კალათბურთელზე წერს:

"ინდიანა პეისერსს" პირველ რაუნდში არჩეული კალათბურთელი ჰყავს, რომელსაც ჯანმრთელობასთან დაკავშირებული პრობლემები ხშირად აწუხებს და პროდუქტიულობაც აკლია. საუბარია გოგა ბითაძეზე, რომლის შესახებაც ერთმნიშვნელოვანი დასკვნის გაკეთება რთულია. არ ჩანს ის გზა, რომელიც გოგას "პეისერსში" სტაბილურობას მოუტანს. ბითაძეს ახალბედისთვის განკუთვნილი კონტრაქტის კიდევ ერთი წელი აქვს, მისი გაგრძელება კი ინდიანელთა სურვილზეა დამოკიდებული. ამ ეტაპისთვის რთული წარმოსადგენია, რომ ისინი ამ ნაბიჯზე წავიდნენ...

ბოლო სეზონში გოგა საშუალოდ 14.2 წუთში 7.0 ქულასა და 3.8 მოხსნას აგროვებდა. სწორედ ეს გვაფიქრებინებს, რომ თუკი დრაფტის ოცეულისკენ არჩევანის უფლებას მიიღებს, "პეისერსი" გარიგებაზე სერიოზულად იფიქრებს...

ჩვენი გათვლებით, სწორი იქნება, თუკი დრაფტის მე-20 ნომრის სანაცვლოდ, "ინდიანა" ბითაძეს "სან ანტონიოს" შესთავაზებს. "სპურსი" არ უნდა იყოს წინააღმდეგი, აქცენტი მაღალ ახალგაზრდა კალათბურთელზე გააკეთოს, რომელსაც ლიგაში გამოჩენის დღიდან სრულფასოვანი სათამაშო დრო არასდროს ჰქონია. "სან ანტონიოში' ცენტრის პოზიციაზე როტაცია საშუალო დონეზეა და მის რეორგანიზებაზე სერიოზულად ფიქრობენ”.