კარგი სიახლე დასავლეთიდან! შესაძლოა გოგას თავის გამოსაჩენად კიდევ ერთი შანსი მიეცეს

დღეს გავრცელებული ინფორმაციის თანახმად, სავარაუდოდ, "ინდიანა პეისერსი" გუნდის მთავარ მწვრთნელს, ნეიტ ბიორკგრენს სეზონის დასრულებისთანავე დაკავებული თანამდებობიდან გაათავისუფლებს, რაც ქართველი ცენტრისთვის, გოგა ბითაძისთვის შანსია, რადგან ახალგაზრდა ცენტრს სათამაშოდ იმაზე ნაკლები დრო ეძლეოდა, ვიდრე ამას რეალურად იმსახურებდა. 

bleacherreport-ი ამ ფაქტზე შემდეგ სტატიას წერს:

"პეისერსს" 30 მოგება და 34 მარცხი აქვს, რითაც NBA-ს პლეი-ოფში გასასვლელად დამატებულ ე.წ. play-in-ში მიიღებს მონაწილეობას. გუნდი "ვაშინგტონ ვიზარდსს" უსწრებს, რომელიც თავის მხრივ, მე-10 ადგილს იკავებს; მეექვსეადგილოსან "მაიამი ჰიტთან" კი ჩამორჩენა 5 მოგებაა ("ინდიანას" 2-ით ნაკლები შეხვედრა აქვს ჩატარებული). შეგახსენებთ, მე-6 ადგილი პლეი-ოფში ავტომატურად გადის. გასულ წელს "პეისერსმა" მთავარი მწვრთნელი ნეიტ მაკმილანი გუნდიდან "გააგდო", მიზეზი კი "ჰიტთან" წაგებული 4:0 სერია გახლდათ. კლუბში კი ლიგის ყოფილი ჩემპიონის, "ტორონტო რეპტორსის" მთავარი მწვრთნელის, ნიკ ნურსის ასისტენტი ნეიტ ბიორკგრენი მოიყვანეს, თუმცა მისი "საჩემპიონო გამოცდილება" ნამდვილად არ გამართლდა. 

ნეიტს გუნდში 3 ვარსკვლავი ჰყავს, (მაილის ტერნერი, დომანტას საბონისი და კარის  ლევერტი), რომლებსაც კონტრაქტი 2023 წლამდე აქვთ, თუმცა შესაძლოა, თვითონ "ინდიანას" მთავარი მწვრთნელის პოსტზე ამ წლამდე ვერც მიაღწიოს. ამ ყველაფერს კი დრო აჩვენებს". 

ფაქტი ერთია, თუ ბიორკგრენი გუნდს დატოვებს, კიდევ ერთი იმედი გაჩნდება, რომ ახალი მწვრთნელი გოგას სათამაშოდ ბევრად დიდ დროს მისცემს და მეტ ნდობასაც გამოუცხადებს. 

წყარო: bleacherreport

"ბითაძესთან მიმართებით დიდი მოლოდინები გვქონდა..." - "ინდიანას" პრეზიდენტი