რაგბი

ეროვნული ნაკრები

ლევან მაისაშვილი: ესპანეთის 30 ქულით დამარცხება შეგვეძლო

AutoSharing Option
ფოტო: rugby.ge

"ბორჯღალოსანთა" მთავარი მწვრთნელი ლევან მაისაშვილი თვლის, რომ ჩვენს გუნდს მადრიდში ესპანეთის ნაკრების 30-ქულიანი სხვაობით დამარცხება შეეძლო, თუმცა სიჩქარის გამო დაშვებულმა შეცდომამ მათ ქულების აღების საშუალება არ მისცა.

საქართველოს ნაკრები 23:10 მოგებული შეხვედრის პირველ ტაიმში დომინანტი იყო, სამი ლელო გაიტანა და 23:5 დაწინაურდა. ამ ტაიმით კმაყოფილია მაისაშვილი:

"თამაში კარგად დავიწყეთ და მთელი პირველი ტაიმი ბურთს ვაკონტროლებდით. გვქონდა შეცდომებიც, რომელთა შედეგად მეტოქისგან აგრესიული კონტრშეტევები მივიღეთ, თუმცა დაცვამ კარგად იმუშავა. მოლში, რომლიდანაც ლელო მივიღეთ, ყურადღება მოვადუნეთ, მერე კი ამ კომპონენტშიც კარგად
ვიმუშავეთ და მომდევნო მოლებში ესპანეთს წინააღმდეგობა გავუწიეთ. მთლიანობაში, პირველ ტაიმში მრავლად გვქონდა მომენტები, როდესაც ქულა უნდა აგვეღო და ის ჩვენთვის სასურველი სცენარით წარიმართა".

მეორე ტაიმში "ბორჯღალოსნებმა" მონაგარს ვეღარაფერი შემატა და დაცვაში დიდი დრო გაატარა. ესპანეთმა მხოლოდ გაწითლებულ დროში შეძლო ლელოს გატანა და საბოლოო შედეგი დაფიქსირდა:
"მეორე ტაიმის დასაწყისში მეტოქის ნახევარზე ადვილად გადავედით და დასარტყმელი ჯარიმა მოვიპოვეთ. აქ მეტოქის დაუფასებლობა დაგვემართა, ვიჩქარეთ, ასაღები ქულა ვერ ავიღეთ და დაიწყო ჩვენი პრობლემები - დისციპლინა, ყვითელი ბარათი და აღმოვჩნდით წნეხში. მთავარი პრობლემა იყო ის, რომ თამაში ვერ ვმართეთ და ესპანეთმა ის მიიღო, რაც თავად სურდა. მიუხედავად იმისა, რომ ხაზი რამდენჯერმე გაიჭრა, მთლიანობაში სიტუაციას ვაკონტროლებდით, მაგრამ ეს არ იყო ჩვენი მოცემულობა, - ამბობს მაისაშვილი და განაგრძობს:
- პირველი ტაიმის შემდეგ, მეორეში მინიმუმ 20 ქულა უნდა აგვეღო, მაგრამ თავი იჩინა კლასის ნაკლებობამ, რაზეც აუცილებლად უნდა ვიმუშაოთ. ეს იყო ჭკუის სასწავლებელი მატჩი, რადგან ასეთ რამეს მაღალ დონეზე არ პატიობენ. ერთი წუთით არ იყო იმის საფრთხე, რომ სადავეები ხელიდან გაგვქცეოდა, მაგრამ მივიღეთ ის, რომ მეტოქეს მეტად ჰქონდა ბურთი და მთელი ძალით ცდილობდა ჩამორჩენის შემცირებას. აი, ეს მოსდევს სიჩქარეს და სისტემიდან ამოვარდნას. შეგვეძლო მინიმუმ 30 ქულით მოგვეგო და რატომ ვერ შევძელით ეს, დეტალურ ანალიზს აუცილებლად გავაკეთებთ".

ესპანეთთან მატჩში საქართველოს ნაკრების კვართით პირველად ითამაშა და დებიუტი ლელოთი აღნიშნა აკაკი ტაბუცაძემ. მისი გარჯით კმაყოფილი დარჩა მთავარი მწვრთნელი:
"ეჭვიც არ მეპარებოდა, რომ ტაბუცაძე ამოცანას თავს კარგად გაართმევდა. რომ არა ტრავმა, მას რუმინეთთანაც ვათამაშებდი. დიდ 10-ში მან არაერთხელ დაამტკიცა, რომ ერთ-ერთი საუკეთესოა. ის ფეთქებადი და სწრაფია შეტევაში, ხოლო დაცვაში - სტაბილური. ლელოს გატანა ნაწილობრივ გამართლებაა, თუმცა მას მინიმუმ 3-ჯერ ჰქონდა ამის შანსი და რამდენიმე ეპიზოდში პასი დაუგვიანეს. მას აქვს ლელოს გატანის ალღო და ჩვენ არ ვართ განებივრებულნი ასეთი სწრაფი მოთამაშეებით".

"ბორჯღალოსნები" რაგბი ევროპის ჩემპიონატის მომდევნო მატჩს 22 თებერვალს ქუთაისში, "აია არენაზე" გამართავს. ბელგიელებთან შეხვედრა 15 საათზე დაიწყება და მას ჩვენი გუნდი გადახალისებული შემადგენლობით შეხვდება:

"ბიჭები კლუბებს დაუბრუნდებიან და მიუხედავად იმისა, რომ ბელგიასთან მატჩი საერთაშორისო ფანჯარაში ჯდება, ტოპ 14-იდან რამდენიმე მორაგბეს არ გამოვიძახებთ. ამ დღეს საფრანგეთში ტურის თამაშები იმართება და მორაგბეებს კლუბში დამკვიდრების საშუალებას მივცემთ. ამავდროულად, გამოვცდით რამდენიმე ახალ მოთამაშეს. ბელგიამ რუსეთის ნაკრები დიდი სხვაობით დაამარცხა, რაც ჩემი აზრით, უფრო რუსების უხეირობის ბრალი იყო და არა იმის, რომ ბელგიამ განსაკუთრებულად მოუმატა. მიუხედავად ამისა, მეტოქის დაუფასებლობა არ იქნება და მისთვის სრული სერიოზულობით მოვემზადებით".

მომზადებულია rugby.ge-ს მიხედვით