პრო დე2: სათამაშო პრაქტიკა "შემოდგომის ერთა თასამდე

საფრანგეთის მეორე ელიტარულ დივიზიონ პრო დე2-ში, კოვიდ-პანდემიის გამო მხოლოდ ხუთი თამაში გაიმართა და ოთხ მათგანში ჯამში 12-მა ქართველმა ლეგიონერმა ითამაშა.

მათგან ოთხი ბორჯღალოსანი იყო, რომლებმაც „შემოდგომის ერთა თასის“ წინ სათამაშო პრაქტიკა მიიღეს, თუმცა გიორგი ჯავახია დებიუტშივე დაშავდა და შესაცვლელი შეიქმნა. მან მხარი დაიზიანა, თუმცა, საბედნიეროდ, ტრავმა სერიოზული არ აღმოჩნდა.

მიმდინარე სეზონში მეორე მატჩი ჩაატარა და ფრთაზე შეუცვლელად ითამაშა ბორჯღალოსანთა უკანახაზელმა თამაზ მჭედლიძემ. მისი ‘რუანი’ ერთ-ერთ ლიდერ ‘ოიონას’ ეწვია და პირველი ტაიმის მიწურულს და მეორეს საწყის 5 წუთში სამი ლელო გაუშვა (3:22). სტუმრებმა შეძლეს ორი საპასუხო ლელოს გატანა და მეორეც რომ გარდაესახათ ბონუსს აიღებდნენ, ასე კი 15:22 დამარცხდნენ. გამარჯვებულთა რიგებში ორმა ქართველმა ბურჯმა ითამაშა. ირაკლი მირცხულავა შეცვლაზე 58-ე წუთზე შევიდა, სამ წუთში კი თამაშში ბექა კაკაბაძე ჩაერთო.

‘მონტობანმა’ ‘ნევერს’ უმასპინძლა და მაშინ, როდესაც ანგარიში 9:9 გახდა, მასპინძლები მოედანზე კაცნაკლული დარჩნენ. მიუხედავად ამისა, 73-ე წუთისთვის ისინი უკვე 13 ქულას იგებდნენ. ‘ნევერმა’ დარჩენილ დროში ორი ლელოს გატანა მოახერხა და მცირედით მარცხისთვის ბონუსი მოიპოვა – 21:25. სტუმართა შორის 65-ე წუთიდან ითამაშა გურამ პაპიძემ.