საქართველოს ჩემპიონატის პირველი ლიგის მეორე წრე ავჭალაში, ‘ყოჩებისა’ და ოზურგეთის ‘არწივების’ შეხვედრით დაიწყო. პირველობის დებიუტანტმა ქვეყნის სამგზის ჩემპიონს , ზვანში სენსაციური ფრე გაუხერხა და მეორე შეხვედრის პირველი ტაიმიც თავის სასარგებლოდ 7:14 დაასრულა. გურულებმა მასპინძლებს შერკინებაში აჯობეს, რასაც შუამარბ იოსებ ფირცხალაიშვილისა და მღლეტელ ზურაბ კვაჭაძის ლელოები მოჰყვა. შერკინება, ‘ყოჩებისთვის’ ბოლო ხანს აქილევსის ქუსლად იქცა. აკაკი ცინცაძის მორკინალთა მდგომარეობა პირველივე წუთზე მარჯვენა ბურჯის გიორგი ხოსიტაშვილის ტრავმამ გაართულა. მეორე ტაიმში ბორჯღალოსან თემურ სოხაძის თაოსნობით ფავორიტი ტაქტიკურად დალაგდა. ‘ყოჩებმა’ უკეთესი ფიზიკური მომზადების ხარჯზე ტემპს აქვე ავჭალაში, ‘დინამო’ თბილისი ქუთაისის ‘არესს’ დაუხვდა. ორივე გუნდმა ძირითადი შემადგენლობის რამდენიმე მოთამაშე მოისაკლისა. რიონისპირელთა მდგომარეობა პირველ ტაიმში მარცხენა ფრთის ირაკლი ცხადაძის მიღებულმა ტრავმამ დაამძიმა. თამაში გარდამავალი უპირატესობით წარიმართა. მეტოქეებმა 2-2 ლელოს გატანა მოახერხეს. ‘დინამოს’ მხრიდან თავი, ჰუქერმა იაგო წაქაძემ და მეორე ხაზელმა ნიკა გაფრინდაშვილმა გამოიჩინეს, სტუმართა გუნდში კი ლელო, მარბიელმა ნიკა სირაძემ და შუამარბმა ნიკა ფანჩულიძემ მიითვალეს. ‘არესმა’ ხელით თამაშში ვერ ივარგა. ბურთის ხშირად წინ ვარდნასთან ერთად, სტუმრებს არაერთი თერნოვერი შეემთხვათ. ‘დინამო’, მეტოქეზე განსაკუთრებით მეორე ტაიმში უკეთ გამოიყურებოდა და რომ არა ‘არესის’ მოთამაშე-მწვრთნელის გაგა სინაურიძის გააზრებული თამაში, უცილობელ გამარჯვებასაც გამორჩებოდა. საბოლოოდ, შეხვედრა ფრედ 20:20 დასრულდა, რამაც სერგო ფრუიძის ბიჭები ლიდერს 4 ქულით დააშორა და თანაც ქუთათურები მდევარ ‘ყოჩებს’ 1 ქულითღა უსწრებენ. სერგო რამიშვილის ‘დინამო’ კი მართალია მეექვსე ადგილზე რჩება, თუმცა მეოთხე ადგილოსან არწივებთან’ სულ 2 ქულა აშორებს.
პირველობის ლიდერმა ‘ვეფხვებმა’ საკუთარ არენაზე, პატარძეულში აუტსაიდერ ‘ხულიგანას’ 11 ლელო დაუდეს და მეტოქე ‘მშრალი’ ანგარიშით 69:0 დაამარცხეს. ‘ჰეთ-თრიკი’ კახელთა მგეზავმა ლაშა ბრეგვაძემ და გუნდის კაპიტანმა, შუამარბმა ვანო გაბროშვილმა შეასრულეს. აღსანიშნავია, რომ ‘ვეფხვების’ დამრიგებლებმა, ზვიად ცუხიშვილმა და ზურა ამონაშვილმა ძირითადი შემადგენლობის რამდენიმე მორაგბეს დასვენების შეასაძლებლობა მისცეს. ‘ხულიგანას’ მდგომარეობა კი მეთოდურად რთულდება. მიუხედავად იმისა, რომ გუნდის თავკაცები: ლეგენდარული ბორჯღალოსანი გოშა შკინინი და გამოცდილი მამუკა ტყეშელაშვილი ვითარების გასაუმჯობესებლად ცდას და ღონეს არ იშურებენ, კლუბში არსებული ცოცხალი რესურსი პოზიტიური შედეგის მიღწევის შესაძლებლობას ჯერჯერობით არ იძლევა და ამად ‘ხულიგანა’ რეგიონულ ლიგაში დაქვეითების უპირველესს კანდიდატად იქცა.
ტური ნავთლუღში, ‘შევარდენზე’ ‘ივერიასა’ და ‘იუნკერების’ დაპირისპირებით დასრულდა. მცირე ფავორიტად მიჩნეული ‘ივერია’ ტაიმის შუაწელს მეორეხაზელ გოგა კაციტაძის ლელოთი 12:7 დაწინაურდა, რის შემდგომ კიკეთელებმა მეტოქეს 7 ლელო გაუტანეს, დარჩენილ დროში 40 უპასუხო ქულა მიითვალეს და ერთ-ერთი უხნესი ქართული კლუბი 12:54 დამაჯერებლად დაამარცხეს. ‘იუნკერებმა’ უკანა ხაზის საიმედო ქმედებას, სწრაფი ხელდახელ თამაშიც შეაშველეს და ორივე ფრთაზე მოპოვებული უპირატესობაც მაქსიმალურად გამოიყენეს. ჰეთ-თრიკი სწორედ კიკეთელთა მარცხენა ფრთამ ბონდო ლომიძემ შეასრულა. გიორგი ნოზაძისა და გიორგი ზაბახიძის გუნდს დიდად წაადგა ‘ლოკომოტივის’ ყოფილი ესპუარი რეზი ხარაზიშვილი. ‘იუნკერთა’ ახალბედა მგეზავი უკვე გუნდის ნამდვილ ლიდერად იქცა. განსაკუთრებული აღნიშვნის ღირსია ‘იუნკერთა’ აღმასრულებელი დირექტორის გიორგი ენუქიძის ნაყოფიერი საქმიანობა. წარსულში ცნობილი მორაგბე გუნდის დამრიგებლებს დიდ დახმარებას უწევს და თან ‘სენატორა’ ჭაბუკთა ‘ა’ ლიგის’ ბინადარ ‘იუნკერი ჩოხოსნებიდან’ პირველლიგელ კიკეთელებს საიმედო ცვლასაც უმზადებს.
ზამთრის არდადაგების წინ, მორიგ ტურში გამორჩეული, ლიდერთა შეხვედრა იქნება. ‘არესი’ ქუთაისში პატარძეულის ‘ვეფხვებს’ უმასპინძლებს.
rugby.ge
