რაგბი

სხვადასხვა

საქართველო XV ინგლისის საგრაფოებთან 15:28 დამარცხდა

AutoSharing Option
საქართველო XV-მა ინგლისის საგრაფოების ნაკრებთან ეპიზოდებში კარგი რაგბი აჩვენა და ორი ლელოც გაიტანა, მაგრამ ტაიმის დასკვნითი წუთები მეტოქემ უკეთ ჩაატარა და 28:15 იმარჯვა.

ეს იყო სერიის პირველი მატჩი, რომელსაც ქუთაისმა, „აია არენამ“ უმასპინძლა. ოთხ დღეში (11 ივნისს) ეს გუნდები უკვე თბილისში, „ავჭალაზე“ ითამაშებენ, ეს შეხვედრაც 18 საათზე დაიწყება და მასზე დასწრება თავისუფალი იქნება.

თამაში სტუმართა შეტევებით დაიწყო. ისინი ხელდახელ, სწრაფად და მრავალფეროვნად უტევდნენ და რამდენჯერმე დავჯარიმდით, რის გამოც რეფერმა სულხან ჩიხლაძემ უკვე მე-5 წუთზე ლაშა ჯაიანი გაასინბინა. ინგლისელებმა დებიუტში ორი
დარტყმა შეასრულეს ზუსტად და 6:0 დაწინაურდნენ.

საწყისი წუთების შემდეგ, საქართველო XV-მა დაცვაში თამაში გამოასწორა და თავადაც დაიწყო შეტევებზე ფიქრი. მე-12 წუთზე, ჩვენი 22-იდან ხელით დაწყებული შეტევა მეტოქემ საკუთარ ნახევარზე ჯარიმით შეაჩერა და ლელოს გადარჩა, თუმცა სინბინით მოთამაშე დაკარგა. მასპინძლებმა 3 ქულის აღებას ლელოზე თამაში არჩიეს, მოლით უპირატესობის მოპოვება ვერ მოხერხდა, ბურთი ხაზზე გავიდა, ბექა ურჯუკაშვილმა, დავით მოძღვრიშვილმა და მამუკა ნინიძემ ის მარჯვენა ფრთამდე ჩაათამაშეს, სადაც გურამ ქანდაურაშვილი გაიქცა და ალამთან ლელო გაიტანა.

გარდასახვა არაზუსტი იყო, თუმცა საქართველო XV მალე მაინც დაწინაურდა. პირველხაზელებმა - ბექა მამრიკიშვილმა და ზურა ერისთავმა ხაზი ერთმანეთის მიყოლებით გაჭრეს, მეტოქე საკუთარ 22-ში დაჯარიმდა და ნინიძემ კარის წინ 15 მეტრიდან გაიტანა - 8:6.

შესვენებამდე შედეგიანი შეტევების განხორციელების შანსი კიდევ გვქონდა, მაგრამ დაღლილობის ფონზე შეცდომებმა იმატა, დასკვნით 10 წუთში კი, ინგლისის საგრაფოებმა ორი ლელო გაიტანა. პირველ ჯერზე ისინი სწრაფად გადაეწყვნენ მარცხენა ფრთაზე, უპირატესობა შექმნეს და გამოიყენეს, მეორედ კი ხაზი მარტივად გაჭრეს და გარდასახვაც გამოიყენეს - 8:18.

მეორე ტაიმი საქართველო XV-მა აქტიურად დაიწყო, მარცხენა ფრთაზე ხაზის გაჭრის შემდეგ, ბურთი თითქმის ბოლომდე ჩათამაშდა, მცირე ხარვეზის მიუხედავად გურამ შენგელიამ მისი დაუფლება მოახერხა, ორი მბოჭავი კონტაქტით ჩამოიცილა და მისი ლელო ნინიძემ გარდასახა. სხვაობა 3 ქულამდე დავიდა, მაგრამ სტუმრებმა შეძლეს ტემპის დაგდება, რასაც ხელი სიცხემაც შეუწყო, დასკვნითი 10 წუთი კი, კვლავ ინგლისელების იყო.

სტუმრებმა ჯერ ჯარიმით გაზარდეს უპირატესობა, მერე მეტოქემ ცენტრში ჩაჭრა გადაცემა და ლელომდე ირბინა, ხოლო ზუსტმა გარდასახვამ საბოლოო შედეგი დააფიქსირა - 28:15 სტუმრების სასარგებლოდ.

საქართველო XV:
ხაზი

15. მამუკა ნინიძე (ბათუმი), 14. გურამ ქანდაურაშვილი (ხარები), 13. რევაზ ჯინჯიხაძე (ლელო-სარასენსი), 12. ბექა ურჯუკაშვილი (ბათუმი), 11. ალექსანდრე სვანიძე (არმაზი), 10. დავით მოძღვრიშვილი (აკადემია), 9. ვაჟა ხუციშვილი (ბათუმი);

შერკინება
1. ზურაბ ერისთავი (ბათუმი), 2. ბექა მამრიკიშვილი (ბათუმი), 3. რევაზ წიკლაური (აია), 4. ლაშა ჯაიანი (ექსეთერის უნივერსიტეტი, ინგლისი), 5. ალექსანდრე ქოიავა (ბათუმი), 6. გურამ შენგელია (ჯიქი), 7. კობა ჯიმშელეიშვილი (არმაზი), 8. თორნიკე აქუბარდია (ხარები).

მარქაფა
16. ლევან ლომაური (აკადემია), 17. ვახტანგ ქვათაძე (ლოკომოტივი), 18. ნოდარ მექერიშვილი (აკადემია), 19. მიხეილ ბაბუნაშვილი (აია), 20. ვანო ფუტკარაძე (ბათუმი), 21. ხვიჩა ბუჯიაშვილი (ბათუმი), 22. ბეჟან გავაშელიშვილი (ლელო-სარასენსი), 23. გიორგი ნათელაშვილი (ხარები).

2 ლელო: ქანდაურაშვილი, შენგელია

1 გარდასახვა: ნინიძე

1 ჯარიმა: ნინიძე

მთავარი მწვრთნელი: ბესიკ ხამაშურიძე

მომზადებულია rugby.ge-ს მიხედვით